bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
1 Samuel 15
1 Samuel 15
Sukuma 2019
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 16 →
1
Ū Sang'weli walī wang'wīla ū Saulo, “Ū SEEBA akanitūma ū nene kūkwitīīla maguta gīkī ūbize ntemi wa banhū bakwe a Baisilaeli, na lūūlū yigwaage gete ī mihayo ya ng'wa SEEBA.
2
Ū SEEBA ū Ndūji wa shose alīhaya gīkī, ‘A Baamaleki nakūbinha nsaango kūlwa mihayo īyo bakabīītīla a Baisilaeli aho bakabanyama mu nzīla ng'wikanza lya kūfuma Misili.
3
Alilūūlū, jaga ūkalwe būlūgū nabo a Baamaleki ūshikenaagūle gete pyī ī shikolo shabo; na a boi yaya ū kūbalekeela, babūlagage bose pyī ūmo bagelelile, bagosha na bakīma, na a baana pye na a beeleele; nī ng'ombe, ng'holo, ngamīla; būyaga nī nzobe.’”
4
Hūna ū Saulo ūbitana a banhū biza kwibilinga Telaimu; aho wababala būshika bashilikale shihūmbī magana abīlī a ba kūshimīza wa magūlū, a ba kūfuma Yuda a bene būbiza shihūmbī ikūmi.
5
Hanuma ya henaho ū Saulo nī libità lyakwe ūja ū kū nzengo gwa Baamaleki, ūūkibanda mu mongo.
6
Baalīmo na Bakeni, a bene ūbawīla, “Īngagi ū mu Baamaleki mulekane nabo, natizūmukenaagūla hamò nabo. Nguno a bing'we mukabīītīla yawiza a Baisilaeli a bose aho baafumaga Misili.” Na lūūlū a Bakeni bikomanya bīnga ū mu Baamaleki.
7
Ū Saulo wandya kwilwisha būlūgū nabo a Baamaleki, ūbandīja ba kwipandī lya Havila, ūja akūbatūlaga kūshisha Shūūli, kīya ya Misili.
8
Ū ntemi wa Baamaleki witanagwa Agagi, ūndima alī mpanga gīko, a banhū a bangī ū Saulo ūbamala pye kūbabūlaga wa līlūshū.
9
Alīyo ū Saulo na a bashilikale bakwe būneka ū Agagi, nī ng'holo ī jawiza nī ng'ombe, nī ndama ī ng'īnu na a baana ba ng'holo pyī ījo jali jawiza wiza būjileka ū kūjikenaagūla. Alīyo īja būbibūbi, nūūlū ndebu lebu, būjibūlaga pye gete ī jenījo.
10
Hūna ū mhayo go ng'wa SEEBA gūng'wizīīla ū Sang'weli kūhaya gīkī,
11
“Nalī na būpīna kūlwa kūng'wīta ū Saulo kūbiza ntemi, nguno wagalūkile ī haha ūnileka, atūshishikīlījaga ī shilagīlo shane.” Ū Sang'weli akakoya no ū būjikū wenūbo, ūkeeyūla akūnīlīīlaga ū SEEBA!
12
Aho wela ī ntondo yaho ī dilū, ūja kūmona ū Saulo alīyo ūwīlwa, “Ū Saulo wajile Kalimeli kwīmīīlīja lī gīnhū, bayūlībona a banhū baang'wizūkwa; ūlū alīnge ū kwenūko akūja Giligaali.”
13
Ū Sang'weli aho wakampandīka nose, ū Saulo ūhaya, “SEEBA akwīlūkīle mbango, naashishikīlīgije ī shilagīlo sha ng'wa SEEBA.”
14
Ū Sang'weli ūmūūja, “Al'ī ng'holo ījo nalījiigwa jikūng'aalaga, nī ng'ombe ījo naliigwa jikūkumbaga, ja kinehe najo hangī?”
15
Ū Saulo ūhaya, “A bashilikale baajenhile kūfuma ū kū Baamaleki; baalekeelile ng'holo na ng'ombe ī jawiza, tūjenha kūlwa kūjifunya shitambò kūlī SEEBA Mulungu wako, lelo ī jingī twajibūlagile pye gete.”
16
Kūshika henaho ū Sang'weli ūng'wīla, “Huumūlaga! Degelekaga nakūwīle īyo waniwīlaga SEEBA ū būjikū ūbo wabītaga lelo.” Ū Saulo ūsadūka ūhaya, “Niwīlage!”
17
Hūna ū Sang'weli ūng'wīla, “Ū bebe nūūlū īkī wibonaga ī kale gīkī ūlī ndo, ūtigeleelilwe mhayo gose gose, angū ūtītilwe kūbiza ntwe gwa ng'anda ja Baisilaeli? Tūhaya ū SEEBA akakwitīīla magūta ūkwīta kūbiza ntemi wa Baisilaeli.
18
Hama walī wakūtūmile nīmo ūkūwīla gīkī, ‘Jaga ūkababūlage pye gete a banhū benabo, a Baamaleki, nguno babūbi no; ūkilwishe nabo būlūgū kūshisha ūbamale gete.’
19
Nibūlī lūūlū walekile ū kūng'wigwa ū SEEBA? Nguno kī wajigwīlīīlile ī nding'wa jenīji, wīta yabūbi gīko mu miso ga ng'wa SEEBA?”
20
Nang'hwe ū Saulo ūhaya, “Naaligwile gete ī lilaka lya ng'wa SEEBA ū nene, nūja nūūkagwīta ū nīmo ūyo walī wanitūmile. Nūūbabūlaga pye a Baamaleki, ū ntemi wabo ū Agagi nūng'wenha kūūnū.
21
Ū kūfuma ū mu nding'wa ījo jalī ja kūkenaagūlwa kū būtongi bo ng'wa SEEBA, a bashilikale būjisola pyī ī ng'holo nī ng'ombe ījo jalī jawiza, būjenha Giligaali kūlwa kūmfunīja shitambò SEEBA Mulungu wako.”
22
Alīyo ū Sang'weli ūshosha alīhaya, “Ū SEEBA akayejiagwa na shitambò sha kūpemvwa hamò na manong'ho, gīt'ūmo akayegaga kūlwa kūligwa ilaka lya ng'wa SEEBA? Managa gīkī ū wigwi būlī wawiza kūtinda shitambò; nū kūzunya kūtongwa kūlī kwawiza kūtinda mazezele ga ng'ondi.
23
Nguno ī ng'haani jitikīlile na būbi wa būlogi, nū būlemiigwa būlī gītī būhūbi wa kūlamya shiikolile. Na lūūlū īkī wagūlemile ū mhayo go ng'wa SEEBA, nū wei wakūlemaga ūtizikala ho a ha būtemi.”
24
Ū Saulo ūhaya, “Naahūbile nguno naalekile ū kūshishikīlīja ī shilagīlo sha ng'wa SEEBA nī mihayo yako, nakabogoha a banhū nīdegeleka ī mihayo yabo.
25
Gwike ī haha nalīkwikūmbīlīja ūnikūlīlwe ū būkenaagūji wane, tūshoke dege naje nakanamye ū SEEBA.”
26
Ū Sang'weli ūng'wīla, “Ū nene natīko ū kūshoka hamò nang'ho; ū bebe īkī wagūlemile ū mhayo go ng'wa SEEBA, nū wei wakūlemaga, ūtikala ho a ha būtemi wa Baisilaeli!”
27
Ū Sang'weli aho wagalūka gīkī aje, ū Saulo ūndima ī ng'hanjo yakwe ha neno yūtandūka.
28
Ī likanza lyenīlo ū Sang'weli ūng'wīla, “Ī lelo yenīyī ū SEEBA wabūtandūla ū būtemi wa Baisilaeli kūwīnja ū mu nkono gwako; wamalaga kūng'winha nzenganwa ng'wiyo, ūyo alī wawiza kūkūtinda ū bebe.
29
Nīyo ū wei ūyo alī Ikūjo lya Isilaeli atalomalomaga, nūūlū atagalūchaga maganiko; atabizile gītī banhū gīkī agalūche a maganiko gakwe.”
30
Ū Saulo ūshosha alīhaya, “Nalī ng'hūbi, gwike nalīkūlomba ūninhe ī likūjo lyane ū kū būtongi wa banamhala bane, nū kū būtongi wa Baisilaeli; wize hamò nane naje nakanamye ū SEEBA Mulungu wako.”
31
Hūna ū Sang'weli ūshoka hamò nū Saulo, ū Saulo ūnamya ū SEEBA.
32
Hanuma ya henaho ū Sang'weli ūhaya, “Ng'wenhagi aha ū Agagi ū ntemi wa Baamaleki.” Ū Agagi wiza wabalaganaga, aliganika, “Ī mihayo yabūbi ī y'icha yamalile kūbīta.”
33
Alīyo ū Sang'weli ūng'wīla gīkī, “Ūmo līlūshū lyako lyabenhelegije bakīma kūjimīīja baana babo, h'ūmo nū noko ī lelo akūbiza ūmò wabo ū mu kūjimīīja baana.” Na lūūlū ū Sang'weli ūmutagūla ū Agagi mapingili mapingili kū būtongi bo ng'wa SEEBA, ūmūlagīla kwenūko Giligaali.
34
Hanuma ya henaho ū Sang'weli wīnga ūshoka Lama; ū Saulo ūja kū ng'wakwe Gibea ya ng'wa Saulo.
35
Lyaakashika ī likanza lya kūcha kwakwe ū Sang'weli atajile kūmona hangī ū Saulo, nūūl'īkī ū Sang'weli walīlaga ng'hangala ningī kūlwa ng'wa Saulo. Alīyo ū SEEBA akapīnīhala nguno walī wang'wīta ū Saulo kūbiza ntemi wa Baisilaeli.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31