1 Samuel 3

Sukuma 2019

← Chapter 2 Jump to: Chapter 4 →

1Ū nyanda ū Sang'weli watūmamaga kū būtongi bo ng'wa SEEBA ha sīlīlī ya ng'wa Eli, alīyo ū mu shikū jenījo ū mhayo go ng'wa SEEBA gwalī nambu; gwalī gūtoolechiagwa hingī ū kū banhū.

2Lwise lūmò būjikū ū namhala Eli walī alaalile aho walaalaga na kale; ī tala ya ng'wa SEEBA yabakaga, yalī ītaalī ū kūjimiwa, gwike ū mu shikū jenījo a miso gakwe gakasangwa gandya kūdeda, ooya ū kūbona chiza.

3Ū Sang'weli nang'hwe walī walaala ū mu hekalu ya ng'wa SEEBA, ūko lyalī ī lisandīko lya ng'wa Mulungu.

4Kwimanīla ū SEEBA wang'witana ū Sang'weli; nang'hwe ū Sang'weli widīka ūshosha, “Kalame nalīho.”

5Ūpeela ajile ū kūlī namhala Eli ūūkang'wīla, “Nalīho baba wanitana.” Ū Eli ūhaya, “Mm yaya natitanile ū nene, shokaga dūhū ūkalaale.” Ūshoka ng'hana ūūkalaala.

6Ū SEEBA witana hangī, “Sang'weli!” Ū Sang'weli ūbūūka ūja ū kūlī Eli ūūkang'wīla, “Naashika baba wanitana.” Ū namhala Eli ūhaya, “Ng'wana wane, natitanile ū nene shokaga ūkalaale.”

7Ū mu shikū jenījo ū Sang'weli wal'ataalī ū kūūmana ū SEEBA, nguno wal'ataalī ū kūkundūlīlwa ū mhayo go ng'wa SEEBA.

8Ū SEEBA ūng'witana ū Sang'weli lūkangala lwa kadatū; ū Sang'weli ūbūūka ūja ū kūlī Eli ūūkang'wīla, “Nalīho baba wanitana.” A henaho ū Eli witegeleja nose gīkī SEEBA alīng'witana ū nyanda.

9Na lūūlū ū Eli ūng'wīla ū Sang'weli, “Jaga ūkalaale, ūlū alitane hangī ūkūshosha gīkī, ‘Yombaga SEEBA, ū ntūmami wako alīdegeleka.’” Ng'hana ū Sang'weli ūja ūūkalaala ha būlaalo wakwe wa shikū jose.

10Ū SEEBA wiza wīmīīla witana gīt'ūmo wītīlaga ī ng'hangala ī jingī; ūhaya, “Sang'weli! Sang'weli.” Ū Sang'weli widīka ūhaya, “Yombaga ū ntūmami wako alīdegeleka.”

11Hūna ū SEEBA ūng'wīla, “Managa gīkī nalī hihī kwīta mhayo ntaale ū mu Baisilaeli, ūyo būlī ng'wene ū wa kūgwigwa, a matū gakwe gakūding'himīla.

12Ū ng'wikanza lyenīlo ī kaya ya ng'wa Eli nakwīshikīlīgīja ū nsango gwayo kūlenganīla nī mihayo ī yose īyo nayīhaya kūfuma wandījo wayo kūshisha būkalīkījo wayo.

13Nguno nang'wīla gīkī ī kaya yakwe nakwīyinha nsango gwa weleelo, kūlwa būkenaagūji ūbo abūmanile; nguno a bitūnja bakwe bandalahile no ū SEEBA, alīyo ū wei alemeelilwe ū kūbahūgūla.

14Na lūūlū nīyilahīlīlile ī kaya ya ng'wa Eli gīkī, ‘Ū būbi wa numba ya ng'wa Eli būtīko kwīnjiwa mu nzīla ya shitambò nūūlū shakwinha shose shose īsho shilafunyiwe.’”

15Hūna ū Sang'weli wikala ha būlīīlī kūshisha dilū; aho wela wīlugūla ī milyango ya numba ya ng'wa SEEBA. Alīyo ogoha ū kūng'wīla ū Eli ī ya koolekegeje ka ng'wa SEEBA;

16hūna ū Eli ūng'witana alīhaya, “Ng'wana wane Sang'weli!” Sang'weli nang'hwe widīka alīhaya, “Kalame baba, nalīho.”

17Ū Eli ūng'wīla, “Walī wakūwīla mhayo kī? Ūtizūnibisa mhayo nūūlū gūmò. Ūlū ūlanibise mhayo nūūlū gūmò ū mu yose īyo wakūwīlaga ū Mulungu, akūkūtūla hataale na kūtinda ho.”

18Na ng'hana ū Sang'weli ūng'wīla pyī ī yose, atamisile mhayo nūūlū gūmò. Nang'hwe ū Eli ūhaya, “Ū wei alī SEEBA, ni ītage ūyo alīgūbona gūlībeela mu miso gakwe.”

19Ū SEEBA walī hamò nū Sang'weli ū mu kakūlīle kakwe, atagūlekile ū mhayo gwakwe gūjimīīle sagala sagala.

20Nīyo pye a Baisilaeli, kwandīja Dani kūshisha Beeli-sheba, būūdeeba gīkī ū Sang'weli walī ng'hangi nsolwa o ng'wa SEEBA.

21Ū SEEBA ongeja kwiyoolecha ū kūlī Sang'weli ī Shilo, ū SEEBA wiyoolecha ū kūlī Sang'weli ū kwenūko mu nzīla ya mhayo gwakwe.

← Chapter 2 Jump to: Chapter 4 →