1 Samuel 20 — Sukuma 2019

1Ū Daūdi ūpeela wīnga ī Nayoti ya Lama, ūja kūlī Yonasani ūūkamūūja, “Bebe ī gete naakenije mhayo kī? Ū būhūbi wane būlī ha kī? Nankenije kī ū namhala nose alīkooba kūnīngīja būpaga?”

2Yonasani nang'hwe ūnshokeja alīhaya, “Gūtī gīko, ūtūūcha yaya; nguno ū baba atīko kwīta mhayo gose gose, gūbize ntaale nūūlū ndo, aho ataalī kūnimanya ū nene. Nose nibūlī anibise ū gwenūyū? Ītī gīko na hado yaya!”

3Ū Daūdi ūng'wilahīlīla ū Yonasani alīng'wīla, “Ū so amanile hape gete gīkī ū bebe ūnitogilwe no, na lūūlū wabonile gīkī, ‘Ū Yonasani atizūgūmana ū mhayo gwenūyū, nguno akūpīnīhala kapīnīhalīle kataale no.’ Alīyo nalīkwilahīlīla kūlī SEEBA mpanga, na kū būpanga wako gīkī, ī haha ū nene natī kūle nalyo ī licha”

4Hūna ū Yonasani ūng'wīla ū Daūdi, “Mhayo gose gose ūyo ūlanilombe nakwītīle nakūkwītīla.”

5Ū Daūdi ūhaya, “Alidegelekaga ī ntondo shikūbiza shigukulu sha ng'weji mpya, ū nene shiniigeleelilwe kūlya hamò nū ntemi; alīyo nilekage naje nakibise kū malaale, kūshisha mhīndī ya lūshikū lwa ntondo būngī.”

6Ūlū ūnilula ū namhala ng'wīlage, “Ū Daūdi akanikūmbīlīja nanzunīlīje apeele wangū Betelehemu kū nzengo gwa ng'wawe; ashike kaya nguno a banhū ba lūdūgū lo ng'wawe balīfunya shitambò sha ng'waka.”

7Ūlū ūhaya gīkī, “Ndūhū makoye, numho ū nene ntūmami wako nalī mhola. Alīyo ūlū ūsaaya, a henaho deebaga hape gete gīkī alī na ng'hūmbū ja kūnītīla yabūbi.

8Gwike ū bebe shikwigeleelilwe ūnītīle yawiza, nguno ū nene ntūmami wako ūkaningīja mu shilahīlo sha kwiyilahīja hamò nang'ho kū būtongi bo ng'wa SEEBA. Na lūūlū ūlū nalī na būkenaagūji nibūlagage ū bebe; gīsī īlīho nguno kī ya kūnitūūla mu nkono gwa namhala.”

9Ū Yonasani ūshosha hangī alīhaya, “Yaya ū gwenūyo gūtī gwa kūkwegeela ū bebe; ī gīsī, ūlū ni nagemile nūūlū kūng'ulang'uja hado dūhū gīkī ū baba alīhaya kūkwītīla yabūbi ni nataalī kūkūwīla?”

10Ū Daūdi a henaho ūbūūja, “Alilūūlū ī gīsī, nani akūnimanīkīja ūlū ūkūshokeja na būkalī ū namhala?”

11Ū Yonasani ūng'wīla, “Alitūjage kū malaale ūko.” Būfuma būbīlī wabo būja kū malaale.

12Hūna ū Yonasani ūng'wīla ū Daūdi, “Nalīkwilahīlīla kūlī SEEBA Mulungu wa Isilaeli gīkī, ī ntondo būngī kūshika ikanza gītī īlī nakūbiza naahooyaga nū baba. Ī gīsī ūlū ūbiza akūyegelile, numho nakūlekela kī ū kūkwenhela ī mhola nang'ho ūdeebe?

13Alīyo ū baba ūlū ūbiza alī na ng'hūmbū ja kūkwītīla yabūbi, Ū SEEBA ni anitūlage habbahu na kūtinda ho, ūlū nūūleka kūkwigwīlīja na kūkūlaga ūje mu mhola; hūna ū SEEBA abize hamò nang'ho gīt'ūmo alī hamò na baba.

14Gwike aho nataalī nalī mu sī, nane ūkūnoolekeja wiza gītī bo ng'wa SEEBA natizūbūlagwa;

15nīyo ū wiza wako ūtizūbīngīja na a banhū ba shibyalīlwe shane, nūūlū ni līkashika ikanza lya ng'wa SEEBA kūbakenaagūla pye a banishi ba ng'wa Daūdi bashile mo gete ū mu sī.”

16A henaho ū Yonasani ūbiza wabeeja ilagane nī kaya ya ng'wa Daūdi; ūhaya, “Ū SEEBA ni abīītīlage ya kūbamalīla shiilī a banishi ba ng'wa Daūdi.”

17Ū Yonasani ūng'wīta ū Daūdi kūlahīla būpya ī shilahīlo shakwe kūlwa nguno ya būtogwa ūbo walī antogilwe, nguno walī antogilwe gīt'ūmo walī iitogelilwe wei ng'wenekīlī.

18Hūna ū Yonasani ūng'wīla ū Daūdi, “Ī ntondo shikūbiza shigukulu sha ng'weji mpya, bakūkūlula, nguno ī lisumbī lyako līkūbiza lītī na munhū.

19Hūna ī mhīndī ya lūshikū ū lwa ntondo būngī, ūkūja ūkibise ū kwipandī īlo walī wibisa ū lūshikū lwene ī mihayo yenīyī īkandīja, aho walī wishīkīja h'iwe lī Ezeli ūlindīīla henaho.

20Nakūlasa masonga a datū, gītī munhū akūlasaga shikolo shilebe.

21Hanuma nakūntūma nyanda nang'wīle, ‘Jaga ūgasoleela a masonga.’” Ūlū nūng'wīla, “Gasoleelage a masonga, gayo galī bbihī nang'ho kū lwandī lwa kwizīīla kūūnū;” ūlū wigwa gīko nzūgū. Nguno nalīkwilahīlīla kūlī SEEBA mpanga gīkī, numho īlīho mhola; gatīho makoye gose gose.

22Alīyo ūlū nūng'wīla ū nyanda gīkī, “Bebe a masonga gayo galī kū būtongi wako ūko, a henaho numho jaga; nguno numho ū SEEBA wakwīnjaga a henaha ūje ipandī līngī.

23Alīyo ī mihayo īyo twīhooyelaga, ī ya ha gatī yako na nene; ū mu yenīyo ū SEEBA alī nkaanīji wise, ū bebe nū nene, shikū ja welelo bose.”

24Na ng'hana ū Daūdi wibisa ū kū malaale; aho shashika ī shigukulu sha ng'weji mpya, ū ntemi wigasha ū kūlya ī shilīwa.

25Wigasha a hisumbī lyakwe lya shikū jose, kū lwandī lwa meeza ū lwa kū ndugu, ū Yonasani wīmīīla iilolile nū ise; ū Abuneeli wigasha bbihī nū Saulo, a ha wigaasho bo ng'wa Daūdi hūbiza dalali ho.

26Ū lūshikū lwenūlo ū Saulo atahayile mhayo gose gose, nguno wiganikaga, “Mmho ū Daūdi wilongelilwe mhayo nebe gwang'wītile kūbiza nsoso; atūūkīja kūbiza wasosohalile.”

27Alīyo na a ha ntondo yaho, ū lūshikū lwa kabīlī ū mu ng'weji, ū wigaasho bo ng'wa Daūdi walī dalali dūhū. Nose ū Saulo ūmūūja ū ng'witūnja wakwe ū Yonasani, “Ni kinehe shi ū ng'witūnja o ng'wa Yese atūyubyagiho a ha shilīwa? Nguno ī igolo walī atīho, nī lelo atīho!”

28Ū Yonasani ūshosha alīhaya, “Ū Daūdi akanikūmbīlīja nanzunīlīje aje Betelehemu.

29Akanilomba alīhaya gīkī, ‘Nizunīlījage naje, nguno a banhū ba lūdūgū lwa ng'wise balīfunya shitambò ū mu nzengo; ū nkūlū wane wanitanile nane nabize nalīko. Akahaya gīkī, Ūlū ūlīnichīla shigongo nizunīlījage naje nakababone a bakūlū baane.’ H'ī nguno yene atīho a ha meeza ya ntemi.”

30A henaho ū būpelanu bo ng'wa Saulo būmpembekela ū Yonasani; ūng'wīla, “Ū būchilū na būnyang'hani bo ng'wa noko wenūbū, ū bebe ūliganika ū nene natamanile ī gīkī ūlī kū lwandī lwa ng'witūnja o ng'wa Yese, mhayo ūyo gūlī gw'igiisha minala ū kūlī bebe, na gwa magooke ū kūlī noko ūyo wakūbyala?

31Managa gīkī ū ng'witūnja o ng'wa Yese aho ataalī alīho ū mu sī īyī, ū bebe ūtīko ū kwīmīīla pyī nū būtemi wako. Na lūūlū lagījaga ī haha enhwe halī nene aha, nguno shing'wigeleelilwe ache!”

32Ū Yonasani ūmūūja ū ise, “Nibūlī shing'wigeleelilwe ache? Wītile mhayo kī?”

33Alīyo ū Saulo ūponya ichimu gīkī amūlage ū Yonasani; gwike dūhū lyūmfuuja. A henaho ū Yonasani witegeleja gete gīkī gashi ng'hana ū ise walī na ng'hūmbū ja kūmūlaga ū Daūdi.

34Wīnga a ha meeza wapelanaga no, ū lūshikū lwa kabīlī lwa ng'weji ūleka nū kūlya ī shilīwa kūlwa nguno ya kūpīnīhajiwa nī mihayo ya minala īyo ise wang'wītīlaga ū Daūdi.

35Aho wela ī dilū, ū Yonasani ūja ū kwipandī īlo baalī baalagana kūmaanhīja nū Daūdi; ūja na kayanda kado.

36Ūkawīla a kayanda kaakwe, “Peelaga ūje ūlīgasoleela a masonga ayo nalīlasa.” A kayanda aho kapeela, ūlasa isonga ū kū būtongi wako lyūkakīlanhya.

37A kayanda kenako kahayūshika aho līkagwīla ī lisonga lya ng'wa Yonasani, ūūkahamukīla alīhaya, “Bebe ī lisonga, lītī kū būtongi wako?”

38Hūna ū Yonasani ūūkahamukīla hangī alīkawīla, “Jaga wangū! Kangīlījaga, yaya ū kwigedya gedya!” Na ng'hana a kayanda kenako kūūgakumingīja a masonga kūshoka kūlī ntaale wako.

39(Alīyo kaalī kataadeebaga ī mihayo yenīyī yalī na makūlū kī; Yonasani na Daūdi dūhū h'abo baalī bamanile.)

40Hanuma ū Yonasani ūūkinha a kayanda ī shilanga shakwe, ūūkawīla, “Shokaga lūūlū ūshitwale kaya ī shikolo shenīshi.”

41Aho kīnga a kayanda, ū Daūdi ūbūūka a h'iwe aho walī wibanda; winama ū kū būtongi bo ng'wa Yonasani, ūshisha ng'hangala idatū akwinamaga kūshisha wakuumya hasī ū būshū wakwe. Hūna bandya kūlīla būbīlī wabo kūnū bakwibbipaga kūlwa būtogwa, ū Daūdi ūlīla kūtinda no!

42Ū Yonasani ūhaya, “Jaga mu mhola, nguno twaamala kwiyilahīlīla mu lina lya ng'wa SEEBA kūbiza na būnwani; tūhaya gīkī, ‘Ū SEEBA alī nkaanīji ha gatī yako nū nene, na ha gatī ya shibyalīlwe shane nī shibyalīlwe shako welelo bose.’” Hūna ū Daūdi wīnga ho, ū Yonasani nang'hwe ūshoka mu nzengo.