bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
1 Samuel 18
1 Samuel 18
Sukuma 2019
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 19 →
1
Ū Daūdi aho wamala ū kūyomba nū Saulo, ū Yonasani nū Daūdi bidima būnwaani būtī wa kūlekana pyī ī shikū ja būlamu wabo; ū Yonasani ūntogwa ū Daūdi gīt'ūmo walī witogelilwe we ng'wenekīlī.
2
Kūfuma lūshikū lwenūlo ū Saulo ūnsola ū Daūdi ūbiza wa ha ng'wakwe, atanzunīlīgije ū kūshoka kaya ū kūlī ise.
3
Ū Yonasani nū Daūdi būbeeja ilagane biyilahīlīla, nguno ū Yonasani akantogwa no ū Daūdi gīt'ūmo walī witogelilwe wei ng'wenekīlī.
4
Ū Yonasani wīzuula ī ng'hanjo īyo walī azwalile ūng'winha Daūdi, nī lishaati, pyī nū lūshū nū nshipi gwakwe.
5
Ū Saulo ūyūntūma ū Daūdi, wakīīta yawiza būlī kwene, nose ūntūūla kūbiza higūlya ya mabità ga bashilikale; ū mhayo gwenūyo gūūbayeja pye a banhū na a batūmami ba ng'wa Saulo.
6
Alīyo aho balīshoka kaya, numho ū Daūdi wamalile kūlībūlaga ī Līfilisiti, a bakīma bikobya kūfuma mizengo yose ū mu sī ya Isilaeli, kwiza kūnsūūng'wanha ū ntemi Saulo, kūnū bakwīmbaga na kūbina na būyegi, bakūtūlaga na shitumba na kūfuula mbiilūlū.
7
Ūlū bakūbinaga baahelelekeejaga bakwīmbaga būhaya: “Ū Saulo wabūlagile maashihūmbī gakwe, ū Daūdi ū makūmi ga maashihūmbī gakwe!”
8
Ū Saulo ūpelana no, ū būhelelekeja wenūbo būminya; wandya kwiganika, “Ū Daūdi bang'wisaabīla makūmi ga maashihūmbī, alīyo ū nene baagelela maashihūmbī dūhū! Numho apandīke na kī hangī lūūlū ūlū ītī būtemi dūhū?”
9
Na lūūlū kūfuma ikanza lyenīlo ū Saulo wandya kūnola ū Daūdi na liso lya wilu.
10
Ha lūshikū lwa ntondo yaho ū Saulo walī mu kaya, kwimanīla moyo gwabūbi kūfuma kūlī Mulungu gūng'wizīīla na nguzu ningī no. Wandya kūyombagīla mihayo gītī akūhangaga, ū Daūdi nang'hwe wandya kwītūla ī ndono yakwe gīt'ūmo wītīlaga na kale. Ū Saulo walī na'ichimu ū mu nkono gwakwe,
11
ūlīponya ū kūlī Daūdi akwiwīlaga, “Namambe lya kūjūpulukanīja na kū ndugu.” Alīyo ū Daūdi ūshisha ng'hangala ibīlī akūng'wiligaga.
12
Ū Saulo ūng'ogoha ū Daūdi, nguno ūbona hape gīkī ū SEEBA walī hamò nū Daūdi, alīyo ū wei ū SEEBA walī wamala kūneka.
13
Na lūūlū ūng'wīnja ū Daūdi a henaho, ūntūūla būtaale higūlya ya bashilikale shihūmbī, ū Daūdi ūyūbatongeela a banhū benabo ū mu makanza ga būlūgū.
14
Pyī īyo wīyītaga yajaga chiza, nguno ū SEEBA walī hamò nang'hwe.
15
Ū Saulo ongeja ū kūng'ogoha ū Daūdi aho wabona ūmo gwabeelaga būlī gwene ūyo wagwītaga.
16
Alīyo pye a Baisilaeli na a banhū ba Yuda bongeja ū kūntogwa, nguno wabatongeelaga chiza ū mu makanza ga būlūgū.
17
Ū Saulo ūng'wīla ū Daūdi, “Ūūyū aha nshīke wane ū ntaale ū Melabu, nakūkwinha abize nke wako; ū bebe idadīlage dūhū ūbūlwe ū būlūgū bo ng'wa SEEBA kūlwa nguno yane.” Ū Saulo wiwīlaga, “Natizūnkuumya na nkono gwane ū nene, nabalekele Bafilisiti bakūmūlaga.”
18
Alīyo ū Daūdi ūng'wīla ū Saulo, “Ū nene nalī nani, nūūlū a bang'wise, a ba lūdūgū lo ng'wa baba ba nani, nose nigeleelwe kūbiza nkwīlīma wa ntemi?”
19
Gwike aho lyashika ī likanza lya ng'wa Daūdi kwinhwa ū Melabu gīkī abize nke, ū nshīke ng'wenūyo ūtoojiwa kūlī Adilieli muna Mehola.
20
Gwike ū nshīke o ng'wa Saulo ū Mikali walī antogilwe ū Daūdi, a banhū aho bang'wīla ū mhayo gwenūyo ū Saulo ūtogwa no.
21
Wiganika, “Nakūntooja ū ng'wenūyo h'akūbiza lūtu lwa kūngwasha, gūngwīle ū nkono gwa Bafilisiti.” Na lūūlū ū Saulo ūng'wīla ū Daūdi, “Lelo lūūlū ū lūkangala lwa kabīlī lwenūlū ūkūbiza nkwīlīma wane.”
22
Hūna ū Saulo ūbalagīla a batūmami bakwe alībawīla, “Ng'witanagi ha mhūjo ū Daūdi mulūngalūnge nang'hwe mung'wīle gīkī, ‘Bebe ū ntemi akūtogilwe, nīyo na a batūmami bakwe pye bakūtogilwe, byalagwa hoi.’”
23
Būng'wīla ū Daūdi ī mihayo yenīyo. Daūdi nang'hwe ūbashokeja alīhaya, “A bing'we angū mmho muliganika gīkī ū kūbiza nkwīlīma wa ntemi gūlī mhayo ndo? Ū nene nalī ng'habi wape, nūūlū kūmanīīka hado dūhū nī chene natamanīīkile!”
24
A batūmami bakwe ū Saulo būng'wīla, “Ū Daūdi washosha mihayo yīīyī na yīīyī.”
25
Ū Saulo ūhaya, “Ng'wīlagi ū Daūdi gīkī, ‘Ū ntemi atūhayaga kūkwiwa sabo jose jose, alīyo alītogwa kwenhelwa makoba igana līmò ga Bafilisiti, amalīlwe shiilī kū banishi bakwe.’” A maganiko ga ng'wa Saulo gaalī ha gīkī ū Daūdi ache mu nzīla ya nkono gwa Bafilisiti.
26
A batūmami ba ng'wa Saulo aho bang'wīla ū Daūdi ī mihayo yenīyī, gūnyeja ū gwa kūbiza nkwīlīma wa ntemi. Na lūūlū aho lītaalī kūshila ī likanza īlo līkatūūlwa,
27
ū Daūdi ūbūūka na a banhū bakwe, ūūkabūlaga Bafilisiti magana abīlī, ūgatīna a makoba gabo, ūgenha gīkī abize nkwīlīma wa ntemi; wiza ūng'winha ū ntemi a gose gīt'ūmo walī wahayīla. Na ng'hana ū Saulo ūntooja ū Daūdi ū nshīkwe wakwe ū Mikali.
28
Gwike ū Saulo aho wabona, hama witegeleja hape gīkī ū SEEBA walī hamò nū Daūdi, nī gīkī ū nshīke wakwe ū Mikali walī antogilwe ū Daūdi,
29
akongeja ū kūng'ogoha ū Daūdi, ūng'wisaaba kūbiza ng'wanishi wakwe shikū jose ja būlamu wakwe.
30
A bataale ba mabità ga Bafilisiti nabo bongeja kūmaniza kūbikoloosha gīkī balwe būlūgū. Alīyo būl'ikanza ūlū biza, ū Daūdi wapandīkaga būtindi būtaale kūtinda a batūmami ba ng'wa Saulo a bangī; na lūūlū ī lina lyakwe lyongeja kūkumūka.
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 19 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31