1 Samuel 9

Sukuma 2019

← Chapter 8 Jump to: Chapter 10 →

1Walīho ngosha nsabi, wa mu lūganda lo Benjamini, lina lyakwe witanagwa Kishi, ng'witūnja o ng'wa Abieli, ng'witūnja o ng'wa Zeloli, ng'witūnja o ng'wa Bekolaati, ng'witūnja o ng'wa Afia, ūmò wa banhū ba lūganda lo ng'wa Benjamini.

2Walī na ng'witūnja witanagwa Saulo, nsūmba wawiza ūyo walī atī na wa kūlenganījiwa nang'hwe ū mu Baisilaeli; hama ngololoku nīhu kūbakīla pye a banhū.

3Na lūūlū ū Kishi ū ise o ng'wa Saulo akajimīīja nzobe jakwe, hūna ūng'wīla ū ng'witūnja wakwe ū Saulo, “Bebe solaga nsūmba ūmò wa batūmami ūje nang'hwe mukajikoobe ī nzobe.”

4Ng'hana ūbūūka, ūja akūbīta bītaga kū magūlya ga mu sī ya banhū ba lūganda lwa ng'wa Efulaimu, na mu sī ya Shalisha; alīyo batajipandīkile. Bīnga ū kwenūko būja mu sī ya Shalimu, nū kwene jalī jitīko. Hama ūgalūka kwiza mu sī ya lūganda lwa ng'wa Benjamini, nū ng'wene būjigayiwa.

5Aho baashika mu sī ya Sufu, ū Saulo ūng'wīla ū ntūmami ūyo walī hamò nang'hwe, “Tūshokage ī gete, nguno nose ū baba akooya ū kūjiiganika ī nzobe, andye kūkoya ū mu maganiko kūlwa nguno yise.”

6Alīyo ū ntūmami ūng'wīla, “Bebe ū mu nzengo gwenūyū akabizaga alīmo munhū o ng'wa Mulungu akūjiwe na banhū, nguno būlī mhayo ūyo ūgūhaya gūkashikīīlaga. Tūjage ho, hamo adūgije kūtoolekeja ī nzīla īyo shiigelile twīsole.”

7Ū Saulo ūng'wīla ū ntūmami wakwe, “Ūlū tūlaaje ū kūlī munhū ng'wenūyo, tūkūjūng'winha kī, īkī twamalaga ī shilīwa ū mu mfuko gwise? Tūtī na sha kūng'winha ū munhū o ng'wa Mulungu; ī gīsī tūlī na kī?”

8Ū ntūmami ūnshokeja ū Saulo ūng'wīla, “Alilolaga aha, nalī na feza ngehu ja būdito wa kwegeela ha gulamu idatū. Nakūng'winha ū munhū o ng'wa Mulungu atūwīle ī nzīla īyo shiigelile twīsole.”

9(Ī kale ū mu Baisilaeli ūlū munhū ūja kūbūūja kūlī Mulungu, wahayaga, “Tūjage kūlī moni,” nguno ū munhū ūyo akwitanagwa ng'hangi ī haha, ī kale witanagwa moni.)

10Na lūūlū ū Saulo ūng'wīla ū ntūmami wakwe, “Watūngīlīja ī gete tūjage ng'hana wa.” Hūna būgoloola bajile ū kū nzengo ūyo walī ū munhū o ng'wa Mulungu.

11Aho balī ū mu lūgendo bajile, būsanja na bashīke balītulumenha kūja kūdaha minzī; būbabūūja, “Bing'we bamayū, ū moni alīho?”

12Būbashokeja būhaya, “Alīho alīko dūhū ūko mujile kwenūko; ihuutagi mukūnsanga ko; nīyo washika lelo īyī dūhū ū mu nzengo gwise. Nguno a banhū balīfunya shitambò ū kwigūlya ū kwipandī lya kūlamīja.

13Ūlū mulashike ū mu nzengo mukūmona aho ataalī kūja ū kwipandī lya kwigūlya kūjūūlya shilīwa. A banhū batūdūla ū kwandya ū kūlya aho ataalī ū kūshika, nguno hū wei ū wa kūshilombela ī shitambò. Hanuma abo balaalīkilwe hū bakūlya; linhagi muje ko, a makanza aya hū gene a ga kūnsanga.”

14Būlinha bajile ū kū nzengo, aho balingīla mo dūhū ī gīkī, ū Sang'weli nang'hwe ūūyū; aliiza kūdimana nabo alīlinha ajile ū kwipandī lya kwigūlya.

15Alilūūlū, ū lūshikū lwigolo yaho, ū SEEBA walī wang'olekeja ū Sang'weli ū mhayo gwenūyo; ūng'wīla gīkī,

16“Ī ntondo makanza gītī genaya nakūkūtūmīla munhū wa kūfuma mu sī ya lūganda lwa ng'wa Benjamini; ū ng'wenūyo ng'witīīlage maguta abize ntongeeji wa banhū bane a Baisilaeli. Akūbapīja a banhū bane kūfuma ū mu nkono gwa Bafilisiti; nguno naababonile a banhū bane, nū kūlīla kwabo kwanipandīkile.”

17Hūna lūūlū ū Sang'weli aho wamona ū Saulo, ū SEEBA ūng'wīla, “Ū ng'wenūyū h'ū munhū ūyo nakakūwīla mhola jakwe; h'ūyo akūbiza ntongeeji wa banhū baane.”

18Ī likanza lyenīlo ū Saulo ūng'wegeela ū Sang'weli aho baashika ha mita; ūng'wīla, “Baba nalīlomba ūnoolekeje ūko īlī ī numba ya moni!”

19Ū Sang'weli ūnshokeja, “Ū nene hū nalī ng'wene ū moni, tongelaga tūje ū kwipandī lya kwigūlya, nguno ī lelo ūkūlya hamò naane, ntondo dilū nakūkūwīla pyī īyo īlī mu ng'holò yako, hūna nakūlage ūje.

20Ī ya nzobe ījo jashishaga shikū idatū jijimīīlile, ī yene ītizūkūkoya nguno jilongile. Ī gīsī ng'hana, īyo banhū bingī bayikūmbilwe ū mu Isilaeli ībīkilwe kūlwa nguno ya ng'wa nani, ūlū ītī kūlwa nguno yako na numba ya ng'wa so?”

21Ū Saulo ūshosha, “Ū nene natī munhū wa lūganda lwa ng'wa Benjamini ūlo lūlī lūdo ū mu ng'anda jose ja Baisilaeli? Ū lūdūgū ūlo nafumile nalo lūtī lūdo lwa bado ū mu ndūgū ja lūganda lwa ng'wa Benjamini; mhayo kī gwakwenheleja nose ūniwīle mihayo īlī gīko?”

22Hūna ū Sang'weli ūnshisha ū Saulo nū ntūmami wakwe ū mu numba īyo baalīīlaga shilīwa, ūbatūūla kwigasha h'ipandī lya bakūjiwa kūtinda bose abo baalīmo, banhū gītī makūmi adatū gīko.

23Hanuma ū Sang'weli ūng'wīla ū nzugi, “Yenhage aha ī nyama īyo nakakūwīla kwībīka ha mhūjo.”

24Ū nzugi ūgwenha ū gūlūmbū, nī shisho shalī hamò nago, ūntengela ū Saulo. Ū Sang'weli ūng'wīla, “Ī yenīyī hū'īyo walī wabīkīlilwe bebe. Lyaga nguno yalī ītūūlilwe kūlwa nguno yako kūlw'ikanza lyenīlī, kūfuma aho nakahayīla gīkī, ‘Nakūbiza na bageni.’” Ū Saulo ūlya shilīwa hamò na Sang'weli ū lūshikū lwenūlo.

25Aho bika ū kūfuma ū kwipandī lya kwigūlya baashika ū mu nzengo, ū Sang'weli ūhooya nū Saulo kwigūlya ya numba yakwe.

26Ntondo yaho ī dilū aho baamisha, ū Sang'weli ūng'witana ū Saulo ū kwigūlya ya numba ūko walī; ūng'wīla, “Bebe igolanyage koi wangū nakūshindīkīle.” Ū Saulo aho wamalamaja, wika būfuma bajile nū Sang'weli.

27Bahayeegeela kūgūkīla ū nzengo, ū Sang'weli ūng'wīla ū Saulo, “Ng'wīlage ū ntūmami wako atonge hado, ū bebe ūshiige hanuma hamò nane nakwinhe mhayo gwa kūfuma kūlī Mulungu!”

← Chapter 8 Jump to: Chapter 10 →