bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
1 Samuel 4
1 Samuel 4
Sukuma 2019
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 5 →
1
A Baisilaeli a bose bandya kūgūpandīka ū mhayo go ng'wa SEEBA mu nzīla ya ng'wa Sang'weli. Ū mu shikū jenījo a Baisilaeli bakingīla mu būlūgū wa kwilwisha na Bafilisiti; būūkakoma ng'hambī yabo Ebenezeeli, a Bafilisiti būkoma ī ng'hambī yabo Afeki.
2
A Bafilisiti bilwisha nabo a Baisilaeli; ū būlūgū aho waseba gete a Baisilaeli būtindwa. Banhū babo ba kūshika gītī shihūmbī shinè būbūlagwa na Bafilisiti ū kū būlūgū kwenūko.
3
Bahayūshoka ū kū ng'hambī a bashilikale, a banamhala ba Baisilaeli bibūūja, “Nibūlī ī lelo ū SEEBA watūtūūla mu būpyenwa būtaale gīkī ū kū būtongi wa Bafilisiti? Tūjagi ī Shilo tūkalyenhe ī lisandīko lya būlagane bo ng'wa SEEBA, lībize ū kū būtongi wise, atūpīje ū mu nkono gwa banishi bise.”
4
Būtūma banhū ī Shilo būūkalyenha ī lisandīko lya būlagane bo ng'wa SEEBA ū Ndūji wa shose, ūyo isumbī lyakwe lya būtemi līlī ha gatī gatī ya makelubi. Na a bitūnja ba ng'wa Eli a ba Hofuni nū Finehasi būja kwikala nalyo ī lisandīko lya būlagane bo ng'wa SEEBA.
5
Aho lyashika ū mu ng'hambī ī lisandīko lya būlagane bo ng'wa SEEBA, pye a Baisilaeli būyega no, būyoga na'ilaka lya higūlya no no no, kūshisha ī sī yūtingina.
6
A Bafilisiti aho bīyiigwa ī yoge yenīyo būhaya, “Al'ī yombo ī nhaale yenīyo ya kinehe ū kū ng'hambī ya Bahebulania?” Aho badeeba gīkī lizaga isandīko lya ng'wa SEEBA ū kū ng'hambī,
7
a Bafilisiti bogoha; bandya kwiwīla, “Biza bamulungu ū mu ng'hambī, twaacha! Gūtaalī kwilonga mhayo gūlī gīko na kamò yaya.
8
Twaashila! Nani akūtūpīja ū mu nkono gwa bamulungu a ba nguzu benaba? A bamulungu benaba angū hū bene abo bakabatūla bana Misili na mahūūya ga būlī mbika ng'witogolo.
9
Bing'we Bafilisiti timbyagi ng'holò mulwe nyagosha, ūlū ng'ūdondosha bakūmusuga a Bahebulania, gīt'ūmo ng'walī mubasugīlile a bing'we; ipandagi chanda mulwe nyagosha.”
10
Na ng'hana a Bafilisiti būūlwa, būbapyena a Baisilaeli; būlī ng'wene ūpeela kwiheema lyakwe. Ū būbūlagi būbiza būtaale no, a Baisilaeli būjimīīja bashilikale shihūmbī makūmi adatū ba kūshimīza wa magūlū.
11
Nī lisandīko lya ng'wa SEEBA lyūding'wa, pye na a bitūnja ba ng'wa Eli būbīlī wabo, ū Hofuni nū Finehasi, būbūlagwa.
12
Ū lūshikū lwenūlo munhū ūmò wa mu lūganda lo ng'wa Benjamini ūpeela kūfuma ū kū būlūgū, ūja ī Shilo na shizwalo shakwe shitandagūkile, hama ookalaga lūbuubu ū kū ntwe.
13
Aho alīshika, ū Eli walī wigasha hisumbī lyakwe hihī na'ikūūwa alindanile; nguno ī ng'holò yakwe yalī yogoha no kūlwa isandīko lya ng'wa SEEBA. Ū munhū ng'wenūyo wahayūshika ū mu nzengo, aho wabawīla īyo yalī yilonga, pyī ū nzengo gūūtandūka kūlīla ng'hūngū.
14
Ū Eli aho wīyigwa ī ng'hūngū ūbūūja, “Ni yaakī hangī ī ng'hūngū yenīyo?” Ū munhū ng'wenūyo ūja wangū aho walī ū Eli.
15
Ī shikū jenījo ū Eli walī namhala wa būlamu wa myaka makūmi anaane na kenda; nīyo na miso gakwe gaalī gooya ū kūbona.
16
Na lūūlū ū munhū ng'wenūyo ūng'wīla ū Eli, “Baba nafuma ū kū būlūgū ī haha yenīyī,” nīnga ko lelo īyī, niza nalīpeela. Ū Eli ūbūūja, “Yaja ko kinehe ng'wana wane?”
17
Ū munhū ūyo akeenha mhola ūhaya, “A Bafilisiti babapeeja a Baisilaeli; nī libità lyajimīīja banhū bingī no. Na a bitūnja bako, ū Hofuni nū Finehasi baacha; nī lisandīko lya ng'wa SEEBA lyading'wa.”
18
Aho walīhaya dūhū ī lisandīko lya ng'wa SEEBA, ū namhala Eli ūgwa sagaalī ū kūfuma a h'isumbī lyakwe. Walī bbihī na mita, ūgwīla henaho ūbīnzīka ī nhingo ūcha, nguno walī namhala; hangī ū mīlī gwakwe gwalī ndito. A Baisilaeli walī wabatongeela ikanza lya myaka makūmi anè.
19
Walīho na ng'wīnga wakwe, nke o ng'wa Finehasi, walī nda ya bbihī kūbyala; aho wajipandīka ī mhola gīkī lyadimagwa ī lisandīko lya ng'wa SEEBA, nū ise būkwi waacha; nū ngoshi wachīlaga kū būlūgū, ū nkīma ng'wenūyo ūlung'wa būsūngū wa kūbyala ī likanza lyenīlo; alīyo ū būsūngū būbiza wakīlanīja no,
20
būmūlaga. Aho alī ng'wikanza lya kūcha a bakīma abo bangunanhaga būng'wīla, “Timbyaga ng'holò wabyala ng'wana ngosha.” Alīyo atoolekegije gīkī akabigwa nūūlū kūbashokeja.
21
Ū ng'wana ūng'wilīka lina lya Ikaboodi, kūnū alīhaya; “Lyīngaga ī likūjo ū mu Isilaeli!” Nguno ī lisandīko lya ng'wa Mulungu lyalī lyading'wa, nū nkwiye ūcha hamò nū ngoshi wakwe.
22
Ūhaya, “Ī lisandīko lya ng'wa Mulungu lyadimagwa, lyīngaga ī likūjo ū mu Baisilaeli!”
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31