1 Kings 8 — Umbundu Bible (Embimbiliya - Bíblia Sagrada em Umbundu)

1Oco Salomone wongoluila kokuaye, ko Yerusalãi, akulu va Isareli lasongui vosi vapata, lolombuale viapata a va Isareli, ha va kopa ocikasa covisila via Yehova kimbo lia Daviti, hailio Siono.

2Kuenje alume vosi va Isareli va liongoluila ku Soma Salomone, kofesta yosãi Etanimi, haiyo osãi yepanduvali.

3Akulu vosi va Isareli veya, kuenje ovitunda via yelula ocikasa.

4Kuenje va nena ocikasa ca Yehova lombalaka yoku ñualehela la Yehova lovikuata viosi vi kola, vina via kala vombalaka. Ovitunda la va Lewi, ovo va vi nena.

5Soma Salomone kumue lohongele yosi ya Isareli yo liongoluila, va kala vosi kovaso yocikasa, loku lumba olomeme lolongombe via lua, oku vi tenda ka ca telelue, momo via lua cimue.

6Ovitunda via nena ocikasa covisila via Yehova vocitumãlo caco, vocitumãlo ci kola conjo, vohondo yi kola koku kola, vemi liavava a vakeruvi.

7Vakeruvi va nyanyumuĩla avava avo kilu liocitumãlo cocikasa, kuenje vakeruvi va sikilila ocikasa kumue lolomuangaluwa viaco.

8Olomuangaluwa viocikasa, omo via lepa ca lua, olosungu viavio via moleha vohondo yi kola, kovaso yocitumãlo ci kola. Puãi kosamua ka via molẽhẽle. Kuenje haimo vi li, toke etaili lilo.

9Vocikasa caco ka mua kaile cimue cikuavo, te lika ovawe avali ana Mose a kapelemo ko Horeve, cina Yehova a lisila ocisila la va Isareli, eci va tunda kofeka yEgito.

10Eci ovitunda via tunda vohondo yi kola, oco elende lia yukisa onjo ya Yehova.

11Oco ovitunda ka via tẽlele oku kalamo loku linga upange, omo mua kala elende, momo ulamba wa Yehova wa yukisa onjo ya Yehova.

12Oco Salomone wa popia hati, Yehova hati, Nda panga oku tumãla vowelema wowi!

13Ocili nda ku tungila onjo yoku tumalamo, nda ku tungila ocitumãlo hu kalamo otembo ka yi pui.

14Soma wa pukukako, kuenje wa sumuluisa ohongele yosi ya Isareli, oco ohongele yosi ya Isareli ya talama vilu.

15Eye wa popia hati, Yehova Suku ya Isareli a sivayiwe, una wa popia lomela waye ku tate Daviti, loku ci lemulula leka liaye, hati,

16Tunde apa ndopa omanu vange va Isareli kEgito, povapata osi a Isareli, lalimue imbo nda nolapo ha li tungi onjo, onduko yange ha yi kalamo, puãi nda nola Daviti oku viala omanu vange va Isareli.

17Tate Daviti wa kala lutima woku tungila onduko ya Yehova Suku ya Isareli onjo.

18Puãi Yehova wa popia la tate Daviti, hati, Omo vutima wove mua kala ocisimilo coku tungila onduko yange onjo, wa linga ciwa oku kala lutima waco.

19Haimo lumue ku tungi onjo, puãi omolove o tunda koviongo viove, eye o tungila onduko yange onjo.

20Yehova wa kolisa ondaka yaye yina a popele, nda piñala komangu ya tate Daviti, nda tumãla kocalo ca Isareli ndeci Yehova a likuminya, kuenje nda tungila onduko ya Yehova Suku ya Isareli onjo.

21Nda sokiyamo ocitumãlo cocikasa, muna mu kasi ocisila ca Yehova cina a lisilile lolosekulu vietu, eci a vopa kofeka ya Egito.

22Oco Salomone wa talama vilu kovaso yutala wa Yehova, kovaso ohongele yosi ya Isareli, yu wõluila ovoko aye kilu,

23kuenje wa popia hati, A Yehova Suku ya Isareli, ndaño kilu ndaño posi ka kuli Suku wa lisoka love, wukuakulava ocisila, haive wukuahenda ka yi pongoloka lovakuenje vove vana va endaila kovaso ove lutima wavo wosi.

24Wa telisila ukuenje wove, tate Daviti, eci wo likuminyile; ocili ove wa ci popia lomela wove kuenje wa ci lemulula leka liove, ndomo ci kasi etaili lilo.

25Kaliye a Yehova, Suku ya Isareli, telisila ukuenje wove tate Daviti, eci wo likuminyile, huti, Kovaso ange, ku kambi kapiñala o tumãla kocalo ca Isareli, nda omãla vove va lunguka lonjila yavo, loku endaila kovaso ange ndeci ove wa endaila kovaso ange.

26Kaliye a Suku ya Isareli, hu pinga, ondaka yove yina wa popia lukuenje wove tate Daviti, yi telisiwe.

27Puãi ocili Suku o tava hẽ oku tunga kilu lieve? Ota, vilu lovilu liovailu ku suimo! Oco hẽ, vonjo eyi nda ku tungila o suamo ndati?

28Haimo a Yehova Suku yange, tava kohutililo yukuenje wove lokelombelo liaye, yevelela kevilikiyo lokohutililo yina ukuenje wove a likutilila kovaso ove etaili.

29Ovaso ove a vanje konjo yilo uteke lutanya, a vanje kocitumãlo cina ove wa popele huti, Onduko yange yi ka kalamo! Oco o yevelele kohutililo yukuenje wove a likutilila vonjo yilo.

30Yeva elombelo liukuenje wove leli liomanu vove va Isareli, eci va likutilila loku imba ovaso konjo yilo. Kocitumãlo cove kilu, tava oku yeva, kuenje eci o yevako, ecela.

31Nda omunu umue o lueyela ukuavo kuenda vo kisika oku lisinga kuenje iya loku lisingila kovaso yutala wove vonjo yilo,

32oco ove, kilu, yevelela, linga, kuenda tetuluila akuenje vove, loku pisa ondingaĩvi, ovilinga viaye vivi ha vi wila kutue waye muẽle, puãi yowisa ukuesunga loku u muisa onima yesunga liaye.

33Eci omanu vove va Isareli va kupuilua kovaso unyali, momo va ku lueyela, kuenje nda va kondokela kokuove loku limbuka onduko yove loku likutilila loku lomba kokuove vonjo yilo,

34oco ove, kilu, yevelela, kuenda ecela ekandu liomanu vove va Isareli, va tiuwiya vali kofeka yina wa ecele kolosekulu viavo.

35Eci ilu lia londa, kuenje ka kuli ombela, momo va ku lueyela, nda va likutilila loku imba ovaso konjo yilo loku limbuka onduko yove ha va kondoka kekandu liavo, eci ove o va yambula,

36oco ove, kilu, yevelela, ecela ekandu liakuenje vove leli liomanu vove va Isareli, eci o va longisa onjila yiwa muna va sesamela oku endela, kuenda lokisa ombela vofeka yove, yina wa ecele ndocipiñalo komanu vove.

37Nda vofeka muiya elambu lefengi locikakula pamue ovikula viuvuka, pamue kuiya olohuma locimbonde; nda unyali wavo o va ñualela ocingonja vovaimbo avo; nda kuiya ekundu limue pamue uvei umue;

38kuenje nda omunu umue pamue omanu vove vosi va Isareli va likutilila ohutililo yimue loku lomba elombelo limue, omunu omunu loku kulĩha ohali yutima waye muẽle, loku oluila ovoko aye konjo yilo;

39oco ove, kilu, kocitumãlo cove, yevelela, ecela, linga, kuenje muisa omunu omunu eci ca sesamela olonjila viaye viosi, momo ove wa kuliha utima waye. Momo ove, ove lika wa kulĩha ovitima viomãla vosi vomanu.

40Oco ovo va ku sumbe oloneke viosi va tumãla vofeka yina wa ecele kolosekulu vietu.

41Kuenda vali, ukombe una ka tiamela komanu vove va Isareli, eci a tunda kofeka yocipãla omo a yeva onduko yove,

42momo ovo va ka yeva oluhimo luonduko yove yinene, leka liove lia pama lolu luokuokuo kuove kuoloha; eci eya ha likutilila loku imba ovaso konjo yilo,

43ove, kilu, kocitumãlo cove, yevelela, kuenje cosi ukombe waco a ku pinga, u ciha. Oco omanu vosi vo kilu lieve va kulihe onduko yove ha va ku sumbi ndeci ca ku sumba omanu vove va Isareli, loku kulĩha okuti onjo yilo nda tunga, yi tukuiwa londuko yove.

44Nda omanu vove va tunda oku yaka lunyali wavo, loku kuama onjila wa va handeleka, kuenje va likutilila ku Yehova loku imba ovaso avo kimbo lina ove wa nola lokonjo nda tungila onduko yove,

45oco ove, kilu, yeva kohutililo yavo lokelombelo liavo kuenje va tundila olunda.

46Nda va ku lueyela, omo ka kuli omunu ka lueya, kuenje ove o va temela loku va eca kunyali, leye ha endi lavo kumandekua vofeka yunyali, nda ocipãla nda ocipepi;

47haimo nda vofeka yumandekua wavo va litiulamo ha va pongoloka loku lomba kokuove vofeka yava va va tuala kumandekua, ha vati, Tua linga ekandu, tua lueya, tua linga emande!—

48nda va kondokela kokuove lutima wavo wosi lomuenyo wavo wosi vofeka yovanyali vavo vana va va tuala kumandekua, kuenje nda va likutilila loku imba ovaso kofeka yavo, yina wa ecele kolosekulu viavo, lokimbo lina wa nola lokonjo nda tungila onduko yove;

49oco ove, kilu, kocitumãlo cove, yeva kohutililo yavo lokelombelo liavo, va tundila olunda.

50Ecela omanu vove va ku lueyela, ecela olohole viavo viosi vina va ku lueyela; va muisa ohenda kovaso yava va va tuala kumandekua, oco va va kuatele ohenda.

51Momo ovo omanu vove, haivo ocipiñalo cove, cina wopa kEgito vofolono yutale.

52Ovaso ove a patulukile kelombelo liukuenje wove lokelombelo liomanu vove va Isareli, hu va yevelela kuosi va ka vilikiyila kokuove.

53Momo pomanu vosi vo kilu lieve, ove wa va tepapo ha va lingi ocipiñalo cove, ndeci wa popele lukuenje wove Mose, cina wopa olosekulu vietu kEgito, a Yehova Suku.

54Oco eci Salomone a mala oku likutilila ohutililo yilo yosi loku lomba ku Yehova, wa votokela kovaso yutala wa Yehova, momo wa kekamele kolongolo loku oluila ovoko aye kilu.

55Oco wa talama vilu, kuenje wa sumuluisa ohongele yosi ya Isareli, yu wa popia lolukandi hati,

56Yehova a sivayiwe, una wa muisa epuyuko omanu vaye va Isareli ndeci muẽle a likuminyile, omo layimue ondaka ya kamba kohuminyo yaye yosi yiwa, yina a likuminyile lukuenje waye Mose.

57Yehova Suku yetu a kale letu, ndeci a kaile lolosekulu vietu. Ka ka tu sie, ka ka tu yanduluke.

58Oco a tiamisile ovitima vietu kokuaye, ha tu endaila volonjila viaye viosi loku lava ovihandeleko viaye lovisila viaye lovihõlo viaye, vina a handelekele olosekulu vietu.

59Olondaka evi viange, nda lomba kovaso a Yehova, utanya luteke vi kale ocipepi la Yehova Suku yetu, oco eteke keteke a tundile olunda ukuenje waye lomanu vaye va Isareli.

60Oco omanu vosi vo kilu lieve va limbuke okuti Yehova eye Suku, ka kuli ukuavo.

61Utima wene wosi u tiamele ku Yehova Suku yetu, ha wendaili vovisila viaye loku lava ovihandeleko viaye, ndeci etaili lilo.

62Oco Soma kumue la Isareli yosi va lumba ovilumba kovaso a Yehova.

63Salomone wa lumba ovilumba viombembua ku Yehova, via soka akui avali lavivali kolohũlũkãi violongombe kuenda ocita lakui avali kolohũlũkãi violomeme. Oco Soma kumue la va Isareli vosi va tumbika onjo ya Yehova.

64Keteke liaco, Soma wa kolisa onepa yo pokati la kati kocitali, cina ca kala kovaso yonjo ya Yehova. Oko a lumbila ocilumba coku pia elisi locilumba colomema lulela wovilumba viombembua. Momo utala wosipi una wa kala kovaso a Yehova, utito calua, ovilumba vioku pia elisi lovilumba violomema lulela wovilumba viombembua, ka via suileko.

65Koloneke viaco Salomone wa linga ofesta, kumue la Isareli yosi. Owiñi walua wa kalako tunde ko Hamati toke kolui luEgito, wa liongoluila kovaso a Yehova Suku yetu, oloneke epanduvali kuenda oloneke epanduvali, ndokuti ekui koloneke vikuãla.

66Keteke liecelala, wa sandola omanu, yu va sivaya Soma kuenje va enda kolonjo viavo lesanju lutima we yuka onjolela omo Yehova a muisa ukuenje waye Daviti lomanu vaye va Isareli esumuluho lialua.