1 Kings 9

Umbundu Bible (Embimbiliya - Bíblia Sagrada em Umbundu)

← Chapter 8 Jump to: Chapter 10 →

1Eci Salomone a malusula oku tunga onjo ya Yehova lonjo ya Soma, leci cosi Salomone a yonguile oku linga,

2oco Yehova wa tukulukila Salomone onjanja yavali, ndeci o tukulukilile ko Giveone.

3Oco Yehova wa popia laye hati, Nda yeva ohutililo yove lelombelo liove wa lombela kovaso ange. Nda kolisa onjo yilo ove wa tunga, si kapimo onduko yange otembo ka yi pui, kuenje ovaso ange lutima wange vi kalamo ño hũ.

4Love nda wendela kovaso ange ndeci ca endaile so Daviti, lutima wocili loku sunguluka, hu lingi cosi nda ku handeleka loku lava ovisila viange lovihõlo viange,

5oco ame ñolisa ño hũ ocalo cusoma wove kIsareli, ndeci nda likuminya la so Daviti, siti, Ka ku ku kambela kapiñala kocalo ca Isareli.

6Puãi nda poku ñuama ene pamue omala vene vu pambuka, kuenje ko lavi ovihandeleko viange lovisila viange vina ndo kapeli kovaso ene, puãi wendi loku vumba olosuku vikuavo loku vi fendela,

7oco Isareli vofeka nda va ihĩle, ndu sonjamo, kuenda onjo yilo yina nda kolisila onduko yange, ndi yi takumula kovaso ange, londuko ya Isareli yi linga ndolusapo kuenda ndepembe pokati kolofeka viosi.

8Onjo yilo yi linga ondunda yeyala, wosi o pitako o komoha loku sika ovilua, kuenje va popia vati, Nye Yehova a lingila ndoco lofeka yilo, lonjo yilo?

9Kuenje va tambulula vati, Omo va yanduluka Yehova Suku yavo, una wopila olosekulu viavo kofeka yEgito, kuenje va kakatela olosuku vikuavo, va vi fendela loku vi vumba, oco Yehova a va muisila ohali eyi yosi.

10Vanyamo akuĩ avali, Salomone wa tunga olonjo vivali: onjo ya Yehova lonjo ya Soma.

11Hirama, Soma ya Turo, wa ecele ku Salomone ovinendele vionguva levi viongaye kuenda ulu, cosi muẽle a yonguile wo ciha. Oco kovaso yanyamo aco, Soma Salomone wa eca ku Hirama akuĩ avali kovaimbo vofeka ya Galilea.

12Hirama wa tunda ko Turo ha tali ovaimbo Salomone a wihile, puãi ka sanjukile lao.

13Yu wa popia hati, A manjange, o ovaimbo aco a, wa nyiha? Oco va a luka vati, ofeka ya Kavulu, toke etaili lilo.

14Hirama wa tumĩle ku Soma ocita lakui avali kolotalendo viulu.

15Ca kala ndomo cina Soma Salomone a konga vakuopange wocikisika, ha va tungi onjo ya Yehova lonjo yaye muẽle la Milo locimbaka ca Yerusalãi la Hasore la Megido la Gesere.

16Fareo soma yEgito wa tundile oku ka kuata imbo lia Gesere, yu wa li yoka londalu kuenje wa ipa va Kanana vana va tungile vimbo, yu wa li eca ndombanjaile komolaye ukãi haeye ukãi wa Salomone.

17Salomone wa tunga Gesere la Bete Horone yokombuelo,

18la Bahalata la Tamare vekalasoko, vofeka;

19lovaimbo osi olosila ana a Salomone kuenda ovaimbo akalu la a akuatuvalu la cosi Salomone a pangele oku tunga ko Yerusalãi pamue ko Levanone pamue vali kolofeka viosi viuviali waye.

20Omanu vosi vana ha va Isareliko haivo va supile po va Hiti la va Amori la va Perisi la va Hiwi la va Yewusi,

21omãla vavo vana va sialele vofeka, haivo va Isareli ka va telele oku kundula pe, Salomone wa va konga ha va lingi apika toke etaili lilo.

22Puãi pu va Isareli, Salomone kopilepo apika, puãi va kala vakuavita lakuenje vaye lolombuale viaye lavakesongo liaye lavakesongo liakalu aye lavakuatuvalu tuaye.

23Asongui vana va songola upange wa Salomone, va soka ovita vitãlo lakuĩ atãlo kalume, ovo va tumĩla olondingupange.

24Puãi omõla a Fareo ukãi wa tunda vimbo lia Daviti, wa enda konjo yaye yina Salomone o tungilile. Oco Salomone wa tunga Milo.

25Olonjanja vitatu vunyamo, Salmone wa lumba ovilumba vioku pia elisi lovilumba viombembua kutala una a tungilile Yehova, kuenda wa timĩhila insensu kutala wa kala kovaso a Yehova. Oco wa malusula onjo.

26Soma Salomone wa tunga olonaviyu kEciongevere, konele ya Eloti, kocikulo co Kalunga Kakusuka, vofeka ya Edome.

27Hirama wa tuma akuenje vaye haivo vakuoloño wokalunga, ha va kala volonaviyu kumue lakuenje va Salomone.

28Ovo veya ko Ofiri, yu vopako ovita vikuãla lakui avali kolotalendo viulu kuenje vo nena ku Soma Salomone.

← Chapter 8 Jump to: Chapter 10 →