1 Chronicles 12

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 11 Jump to: Chapter 13 →

1Yih wuh haiṉ jo Siqláj meṉ Dáúd ke pás áe, jab ki wuh hanoz Qís ke beṭe Sáúl ke sabab se chhipá rahtá thá; aur wuh un surmáoṉ meṉ the jo laṛáí meṉ us ke madadgár the.

2Un ke pás kamáneṉ thíṉ, aur wuh faláḳhun se patthar marte, aur kamán se tír chaláte waqt dahine aur báeṉ donoṉ háthoṉ ko kám meṉ lá sakte the; aur Sáúl ke Binyamíní bháiyoṉ meṉ se the.

3Aḳhí‘azar sardár thá, phir Yúás baní Samá‘ah Jibi‘átí; aur Yaziel, aur Falat jo ‘Azmáwat ke beṭe the aur Barákah aur Yáhú ‘Anatotí,

4aur Ismá‘iyah Jiba‘úní jo tísoṉ meṉ súrmá aur un tísoṉ ká sardár thá: aur Yarmiyáh, aur Yahazíel, aur Yúhanán, aur Yúzabád Jadírátí,

5Ili‘auzí, aur Yarímot, aur Ba‘liyáh, aur Samariyáh, aur Safatiyáh Ḳharúfí,

6Ilqánah, aur Yasiyáh, aur ‘Azirel, aur Yú‘azar, aur Yasúbi‘ám jo Qorahí the;

7aur Yúíláh, aur Zabadiyáh jo Yarohám Jadúrí ke beṭe the.

8Aur Jaddíoṉ meṉ se bahutere alag hokar biyábán ke qil‘e meṉ Dáúd ke pás á gaye; wuh zabardast súrmá aur jangámoḳhta log the jo ḍhál aur barchhí ká isti‘mál jánte the; un kí súrateṉ aisí thíṉ, jaisí sheroṉ kí súrateṉ, aur wuh paháṛoṉ par kí harniyoṉ kí mánind tezrau the;

9awwal ‘Azar thá, ‘Abadiyáh dúsrá, Ilíáb tísrá,

10Mismannah chauthá, Yarmiyáh páṉchwáṉ,

11‘Attaí chhaṭá, Ilíel sátwáṉ,

12Yúhanán áṭhwáṉ, Ilzabád nauwáṉ,

13Yarmiyáh daswáṉ, Makbání gyárahwáṉ.

14Yih baní Jadd meṉ se sarlashkar the; in meṉ sab se chhoṭá sau ke barábar, aur sab se baṛá hazár ke barábar thá.

15Yih wuh haiṉ jo pahle mahíne meṉ Yardan ke pár gaye, jab us ke sab kanáre ḍúbe húe the, aur unhoṉ ne wádíoṉ ke sab logoṉ ko mashriq aur mag̣rib kí taraf bhagá diyá.

16Aur baní Binyamín aur Yahúdáh meṉ se kuchh log qil‘e meṉ Dáúd ke pás áe.

17Tab Dáúd un ke istiqbál ko niklá, aur un se kahne lagá, Agar tum nekníyatí se merí madad ke liye mere pás áe ho, to merá dil tum se milá rahegá; par agar mujhe mere dushmanoṉ ke háth meṉ pakaṛwáne áe ho, háláṉki merá háth zulm se pák hai, to hamáre bápdádá ká Ḳhudá yih dekhe, aur malámat kare.

18Tab rúh ‘Amásí par názil húí, jo un tísoṉ ká sardár thá, aur wuh kahne lagá, Ham tere haiṉ, ai Dáúd, aur ham terí taraf haiṉ, ai Yassí ke beṭe: salámatí, terí salámatí, aur tere madadgároṉ kí salámatí ho; kyúṉki terá Ḳhudá terí madad kartá hai. Tab Dáúd ne un ko qubúl kiyá, aur un ko fauj ke sardár banáyá.

19Aur Munassí meṉ se kuchh log Dáúd se mil gaye, jab wuh Sáúl ke muqábil jang ke liye Filistíoṉ ke sáth niklá, par unhoṉ ne un kí madad na kí, kyúṉki Filistíoṉ ke umará ne saláh karke use lauṭá diyá, aur kahne lage, ki Wuh hamáre sir káṭkar apne áqá Sáúl se já milegá.

20Jab wuh Siqláj ko já rahá thá, Munassí meṉ se ‘Adnah, aur Yúzabád, aur Yadí‘el, aur Míkáel, aur Yúzabád, aur Ilíhú, aur Ziltí jo baní Munassí meṉ hazároṉ ke sardár the us se mil gaye.

21Unhoṉ ne g̣áratgaroṉ ke jathe ke muqábale meṉ Dáúd kí madad kí: kyúṉki wuh zabardast súrmá, aur lashkar ke sardár the.

22Balki roz ba roz log Dáúd ke pás us kí madad ko áte gaye, yaháṉ tak ki Ḳhudá kí fauj kí mánind ek baṛí fauj taiyár ho gayí.

23Aur jo log jang ke liye hathyár báṉdhkar Habrún meṉ Dáúd ke pás áe, táki Ḳhudáwand kí bát ke muwáfiq Sáúl kí mamlukat ko us kí taraf muntaqil kareṉ, un ká shumár yih hai:

24baní Yahúdáh chha hazár áṭh sau jo sipar aur neza liye húe jang ke liye musallah the.

25Baní Shama‘ún meṉ se jang ke liye sát hazár ek sau zabardast súrmá.

26Baní Láwí meṉ se chár hazár chha sau.

27Aur Yahoyada‘ Hárúníoṉ ká sardár thá, aur us ke sáth tín hazár sát sau the;

28aur Sadoq ek jawán súrmá, aur us ke ábáí gharáne ke báís sardár.

29Aur Sáúl ke bháí baní Binyamín meṉ se tín hazár: lekin us waqt tak un ká bahut baṛá hissa Sáúl ke gharáne ká tarafdár thá.

30Aur baní Ifráím meṉ se bís hazár áṭh sau zabardast súrmá jo apne ábáí ḳhándánoṉ meṉ námí ádmí the.

31Aur Munassí ke ádhe qabíle se aṭhárah hazár, jin ke nám batáe gaye the, ki ákar Dáúd ko bádsháh banáeṉ.

32Aur baní Ishkár meṉ se aise log jo zamáne ko samajhte aur jánte the, ki kyá karná munásib hai, do sau the; aur un ke sab bháí un ke hukm meṉ the.

33Aur Zabúlún meṉ se aise log jo maidán meṉ jáne aur har qism ke jangí álát ke sáth ma‘rakaáráí ke qábil the pachás hazár; yih saffáráí karní jánte the aur dodile na the.

34Aur Naftálí meṉ se ek hazár sardár, aur un ke sáth saiṉtís hazár ḍháleṉ aur bhále liye húe.

35Aur Dáníoṉ meṉ se aṭháís hazár chha sau ma‘rakaáráí karnewále.

36Aur Áshar meṉ se chálís hazár jo maidán meṉ jáne aur ma‘rakaáráí ke qábil the.

37Aur Yardan ke pár ke Rúbíníoṉ, aur Jaddíoṉ, aur Munassí ke ádhe qabíle meṉ se, ek lákh bís hazár, jin ke sáth laṛáí ke liye har qism ke jangí álát the.

38Yih sab jangí mard jo ma‘rakaáráí kar sakte the, ḳhulús i dil se Habrún ko áe, táki Dáúd ko sáre Isráíl ká bádsháh banáeṉ; aur báqí sáre Isráílí bhí Dáúd ko bádsháh banáne par muttafiq the.

39Aur wuh waháṉ Dáúd ke sáth tín din tak ṭhahre, aur kháte píte rahe; kyúṉki un ke bháiyoṉ ne un ke liye taiyárí kí thí.

40Másiwá in ke jo un ke qaríb ke the, balki Ishkár, aur Zabúlún, aur Naftálí tak ke log gadhoṉ, aur úṉṭoṉ, aur ḳhachcharoṉ, aur bailoṉ par roṭiyáṉ, aur maide kí baní húí kháne kí chízeṉ, aur anjír kí ṭíkkiyáṉ, kulche, aur kishmish ke guchchhe, aur mai, aur tel láde húe, aur bail, aur bheṛ bakriyáṉ ifrát se láe; is liye ki Isráíl meṉ ḳhushí thí.

← Chapter 11 Jump to: Chapter 13 →