1 Chronicles 20

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 19 Jump to: Chapter 21 →

1Phir naye sál ke shurú‘ meṉ, jab bádsháh jang ke liye nikalte haiṉ, Yoáb ne zabardast lashkar le jákar baní ‘Ammon ke mulk ko ujáṛ ḍálá, aur ákar Rabbah ko gher liyá. Lekin Dáúd Yarúshalem meṉ rah gayá thá. Aur Yoáb ne Rabbah ko sar karke use ḍhá diyá.

2Aur Dáúd ne un ke bádsháh ke táj ko us ke sir par se utár liyá, aur us ká wazn ek qintár soná páyá, aur us meṉ beshqímat jawáhir jaṛe the; so wuh Dáúd ke sir par rakkhá gayá; aur wuh us shahr meṉ se bahut sá lúṭ ká mál nikál láyá.

3Aur us ne un logoṉ ko jo us meṉ the báhar nikálkar ároṉ, aur lohe ke híṉgoṉ, aur kulháṛoṉ se káṭá. Aur Dáúd ne baní ‘Ammon ke sab shahroṉ se aisá hí kiyá. Tab Dáúd aur sab log Yarúshalem ko lauṭ áe.

4Is ke ba‘d Jazar meṉ Filistíoṉ se jang húí. Tab Húsátí Sibkí ne Saffí ko jo pahlawán ke beṭoṉ meṉ se ek thá qatl kiyá, aur Filistí mag̣lúb húe.

5Aur Filistíoṉ se phir jang húí. Tab Ya‘úr ke beṭe Ilhanán ne Játí Júliyat ke bháí Lahmí ko, jis ke bhále kí chhaṛ juláhe ke shahtír ke barábar thí, már ḍálá.

6Phir Ját meṉ ek âur jang húí; jaháṉ ek baṛá qaddáwar ádmí thá, jis ke chaubís ungliyáṉ, ya‘ní háthoṉ meṉ chha chha aur páṉwoṉ meṉ chha chha thíṉ, aur wuh bhí usí pahlawán ká beṭá thá.

7Jab us ne Isráíl kí fazíhat kí, to Dáúd ke bháí Sima‘í ke beṭe Yúnatan ne us ko már ḍálá.

8Yih Ját meṉ usí pahlawán se paidá húe the, aur Dáúd aur us ke ḳhádimoṉ ke háth se qatl húe.

← Chapter 19 Jump to: Chapter 21 →