1 Chronicles 17

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 16 Jump to: Chapter 18 →

1Aur jab Dáúd apne mahall meṉ rahne lagá, to us ne Nátan nabí se kahá, Maiṉ to deodár ke mahall meṉ rahtá húṉ, par Ḳhudáwand ke ‘ahd ká sandúq ḳhaime meṉ hai.

2Nátan ne Dáúd se kahá, ki Jo kuchh tere dil meṉ hai, so kar, kyúṉki Ḳhudá tere sáth hai.

3Aur usí rát aisá húá, ki Ḳhudá ká kalám Nátan par názil húá, ki

4Jákar mere bande Dáúd se kah, ki Ḳhudáwand yúṉ farmátá hai, ki Tu mere rahne ke liye ghar na banáná:

5kyúṉki jab se maiṉ baní Isráíl ko nikál láyá áj ke din tak maiṉ ne kisí ghar meṉ sukúnat nahíṉ kí, balki ḳhaima ba ḳhaima aur maskan ba maskan phirtá rahá húṉ.

6Un jagahoṉ meṉ jaháṉ jaháṉ maiṉ sáre Isráíl ke sáth phirtá rahá, kyá maiṉ ne Isráílí qázíoṉ meṉ se, jin ko maiṉ ne hukm kiyá thá ki mere logoṉ kí gallabání kareṉ, kisí se ek harf bhí kahá, ki Tum ne mere liye deodár ká ghar kyúṉ nahíṉ banáyá?

7Pas tú mere bande Dáúd se yúṉ kahná, ki Rabb u’l afwáj yúṉ farmátá hai, ki Maiṉ ne tujhe bheṛsále meṉ se, jab tú bheṛ bakriyoṉ ke píchhe píchhe chaltá thá, liyá, táki tú merí qaum Isráíl ká peshwá ho:

8aur jaháṉ kahíṉ tú gayá, maiṉ tere sáth rahá, aur tere sab dushmanoṉ ko tere sámne se káṭ ḍálá hai, aur maiṉ rú e zamín ke baṛe baṛe ádmíoṉ ke nám kí mánind terá nám kar dúṉgá.

9Aur maiṉ apní qaum Isráíl ke liye ek jagah ṭhahráúṉgá, aur un ko qáim kar dúṉgá, táki apní jagah base raheṉ aur phir haṭáe na jáeṉ, aur na sharír log phir un ko dukh dene páeṉge, jaisá shurú‘ meṉ húá,

10aur us waqt bhí jab maiṉ ne hukm diyá, ki merí qaum Isráíl par qází muqarrar hoṉ; aur maiṉ tere sab dushmanoṉ ko mag̣lúb karúṉgá. Másiwá is ke maiṉ tujhe batátá húṉ, ki Ḳhudáwand tere liye ek ghar banáegá.

11Aur jab tere din púre ho jáeṉge, táki tú apne bápdádá ke sáth mil jáne ko chalá jáe, to maiṉ tere ba‘d terí nasl ko, tere beṭoṉ meṉ se, barpá karúṉgá, aur us kí saltanat ko qáim karúṉgá.

12Wuh mere liye ghar banáegá, aur maiṉ us ká taḳht hamesha ke liye qáim karúṉgá.

13Maiṉ us ká báp húṉgá, aur wuh merá beṭá hogá; aur maiṉ apní shafaqat us par se nahíṉ haṭáúṉgá, jaise maiṉ ne us par se jo tujh se pahle thá haṭá lí:

14balki maiṉ us ko apne ghar meṉ aur apní mamlukat meṉ abad tak qáim rakkhúṉgá, aur us ká taḳht abad tak sábit rahegá.

15So Nátan ne in sab bátoṉ aur is sárí royá ke mutábiq aisá hí Dáúd se kahá.

16Tab Dáúd bádsháh andar jákar Ḳhudáwand ke huzúr baiṭhá, aur kahne lagá, Ai Ḳhudáwand Ḳhudá, maiṉ kaun húṉ, aur merá gharáná kyá hai, ki tú ne mujh ko yaháṉ tak pahuṉcháyá?

17Aur yih, ai Ḳhudá, terí nazar meṉ chhoṭí bát thí; balki tú ne to apne bande ke ghar ke haqq meṉ áyanda bahut dinoṉ ká zikr kiyá hai, aur tú ne, ai Ḳhudáwand Ḳhudá, mujhe aisá máná, ki goyá maiṉ baṛá manzilatwálá ádmí húṉ.

18Bhalá Dáúd tujh se us ikrám kí nisbat jo tere ḳhádim ká húá âur kyá kahe? kyúṉki tú apne bande ko jántá hai.

19Ai Ḳhudáwand, tú ne apne bande kí ḳhátir apní hí marzí se in baṛe baṛe kámoṉ ko záhir karne ke liye itní baṛí bát kí.

20Ai Ḳhudáwand, koí terí mánind nahíṉ, aur tere siwá jise ham ne apne kánoṉ se suná hai âur koí Ḳhudá nahíṉ.

21Aur rú e zamín par terí qaum Isráíl kí tarah âur kaun sí qaum hai jise Ḳhudá ne jákar apní ummat banáne ko áp chhuṛáyá, táki tú apní ummat ke sámne se, jise tú ne Misr se ḳhalásí baḳhshí, qaumoṉ ko dúr karke baṛe aur muhíb kámoṉ se apná nám kare?

22Kyúṉki tú ne apní qaum Isráíl ko hamesha ke liye apní qaum ṭhahráyá hai; aur tú áp, ai Ḳhudáwand, un ká Ḳhudá húá hai.

23Aur ab, ai Ḳhudáwand, wuh bát jo tú ne apne bande ke haqq meṉ aur us ke gharáne ke haqq meṉ farmáí, abad tak sábit rahe, aur jaisá tú ne kahá hai waisá hí kar.

24Aur terá nám abad tak qáim aur buzurg ho, táki kahá jáe, ki Rabb u’l afwáj Isráíl ká Ḳhudá hai, balki wuh Isráíl hí ke liye Ḳhudá hai; aur tere bande Dáúd ká gharáná tere huzúr qáim rahe.

25Kyúṉki tú ne, ai mere Ḳhudá, apne bande par záhir kiyá hai, ki tú us ke liye ek ghar banáegá; so tere bande ko tere huzúr du‘á karne ká hausala húá.

26Aur ai Ḳhudáwand, tú hí Ḳhudá hai, aur tú ne apne bande se is bhaláí ká wa‘da kiyá:

27aur tujhe pasand áyá, ki tú apne bande ke gharáne ko barakat baḳhshe, táki wuh abad tak tere huzúr páedár rahe; kyúṉki tú, ai Ḳhudáwand, barakat de chuká hai, so wuh abad tak mubárak hai.

← Chapter 16 Jump to: Chapter 18 →