1 Chronicles 15

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 14 Jump to: Chapter 16 →

1Aur Dáúd ne Dáúd ke shahr meṉ apne liye mahall banáe, aur Ḳhudá ke sandúq ke liye ek jagah taiyár karke us ke liye ek ḳhaima khaṛá kiyá.

2Tab Dáúd ne kahá, ki Láwíoṉ ke siwá âur kisí ko Ḳhudá ke sandúq ko uṭháná nahíṉ cháhiye, kyúṉki Ḳhudáwand ne un hí ko chuná hai, ki Ḳhudá ke sandúq ko uṭháeṉ, aur hamesha us kí ḳhidmat kareṉ.

3Aur Dáúd ne sáre Isráíl ko Yarúshalem meṉ jama‘ kiyá, táki Ḳhudáwand ke sandúq ko us jagah jo us ne us ke liye taiyár kí thí le áeṉ.

4Aur Dáúd ne baní Hárún ko aur Láwíoṉ ko ikaṭṭhá kiyá:

5ya‘ní baní Qihát meṉ se; Úríel sardár, aur us ke ek sau bís bháiyoṉ ko:

6baní Mirárí meṉ se; ‘Asáyáh sardár, aur us ke do sau bís bháiyoṉ ko:

7baní Jairsom meṉ se: Yúel sardár, aur us ke ek sau tís bháiyoṉ ko:

8baní Ilísafan meṉ se; Sama‘iyáh sardár, aur us ke do sau bháiyoṉ ko:

9baní Habrún meṉ se; Ilíel sardár, aur us ke assí bháiyoṉ ko:

10baní ‘Uzzíel meṉ se; ‘Ammínadáb sardár, aur us ke ek sau bárah bháiyoṉ ko.

11Aur Dáúd ne Sadoq aur Abíyátar káhinoṉ ko, aur Úríel aur ‘Asáyáh, aur Yúel, aur Sama‘iyáh, aur Ilíel, aur ‘Ammínadáb, Láwíoṉ ko buláyá,

12aur un se kahá, ki Tum Láwíoṉ ke ábáí ḳhándánoṉ ke sardár ho; tum apne áp ko pák karo; tum bhí aur tumháre bháí bhí táki tum Ḳhudáwand Isráíl ke Ḳhudá ke sandúq ko us jagah jo maiṉ ne us ke liye taiyár kí hai lá sako.

13Kyúṉki jab tum ne pahlí bár use na uṭháyá, to Ḳhudáwand hamárá Ḳhudá ham par ṭúṭ paṛá, kyúṉki ham áín ke mutábiq us ke tálib nahíṉ húe the.

14Tab káhinoṉ aur Láwíoṉ ne Ḳhudáwand Isráíl ke Ḳhudá ke sandúq ko láne ke liye apne áp ko pák kiyá.

15Aur baní Láwí ne Ḳhudá ke sandúq ko, jaisá Músá ne Ḳhudáwand ke kalám ke muwáfiq hukm kiyá thá, choboṉ se apne kandhoṉ par uṭhá liyá.

16Aur Dáúd ne Láwíoṉ ke sardároṉ ko farmáyá, ki apne bháiyoṉ meṉ se gánewáloṉ ko muqarrar kareṉ, ki músíqí ke sáz, ya‘ní sitár aur barbat, aur jháṉjh bajáeṉ, aur áwáz baland karke ḳhushí se gáeṉ.

17So Láwíoṉ ne Haimán bin Yúel ko muqarrar kiyá; aur us ke bháiyoṉ meṉ se Ásaf bin Barakiyáh ko; aur un ke bháiyoṉ baní Mirárí meṉ se Aitán bin Qausayáh ko;

18aur un ke sáth un ke dúsre darje ke bháiyoṉ ya‘ní Zakariyáh, Bin, aur Ya‘zíel, aur Simírámot, aur Yahíel aur ‘Unní, aur Ilíáb, aur Bináyáh, aur Ma‘siyáh, aur Mattitiyáh, aur Ilifalahú, aur Miqniyáh, aur ‘Obed Adom, aur Ya‘íel ko jo darbán the.

19Pas gánewále Haimán, Ásaf, aur Aitán muqarrar húe ki pítal kí jháṉjhoṉ ko zor se bajáeṉ;

20aur Zakariyáh, aur ‘Azíel, aur Simírámot, aur Yahíel, aur ‘Unní, aur Ilíáb, aur Ma‘siyáh, aur Bináyáh sitár ko ‘Alámot rág par chheṛeṉ;

21aur Mattitiyáh, aur Ilifalahú, aur Miqniyáh, aur ‘Obed Adom, aur Ya‘íel, aur ‘Azaziyáh Shaminít rág par sáz bajáeṉ.

22Aur Kanániyáh Láwíoṉ ká sardár gít par muqarrar thá: wuh gít sikhátá thá, kyúṉki wuh baṛá hí máhir thá.

23Aur Barakiyáh, aur Ilqánah sandúq ke darbán the.

24Aur Shabaniyáh, aur Yahúsafat, aur Nataniel, aur ‘Amásí, aur Zakariyáh, aur Bináyáh, aur Ilí‘azar káhin, Ḳhudá ke sandúq ke áge áge narsinge phúṉkte játe the; aur ‘Obed Adom aur Yahiyáh sandúq ke darbán the.

25So Dáúd, aur Isráíl ke buzurg, aur hazároṉ ke sardár rawána húe, ki Ḳhudáwand ke ‘ahd ke sandúq ko ‘Obed Adom ke ghar se ḳhushí manáte húe láeṉ.

26Aur aisá húá, ki jab Ḳhudá ne un Láwíoṉ kí jo Ḳhudáwand ke ‘ahd ke sandúq ko uṭháe húe the madad kí, to unhoṉ ne sát bail aur sát meṉḍhe qurbán kiye.

27Aur Dáúd, aur sab Láwí jo sandúq ko uṭháe húe the aur gánewále, aur gánewáloṉ ke sáth Kanániyáh jo gáne meṉ ustád thá katání pairáhanoṉ se mulabbas the; aur Dáúd katán ká afod bhí pahine thá.

28Yúṉ sab Isráílí na‘ra márte aur narsingoṉ, aur turhiyoṉ, aur jháṉjhoṉ kí áwáz ke sáth sitár aur barbat ko zor se bajáte húe, Ḳhudáwand ke ‘ahd ke sandúq ko láe.

29Aur aisá húá, ki jab Ḳhudáwand ke ‘ahd ká sandúq Dáúd ke shahr meṉ pahuṉchá, to Sáúl kí beṭí Míkal ne khiṛkí meṉ se jháṉkkar Dáúd bádsháh ko ḳhúb náchte kúdte dekhá; aur us ne apne dil meṉ us ko haqír jáná.

← Chapter 14 Jump to: Chapter 16 →