1 Chronicles 23

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 22 Jump to: Chapter 24 →

1Ab Dáúd buḍḍhá aur ‘umrrasída ho gayá thá, so us ne apne beṭe Sulaimán ko Isráíl ká bádsháh banáyá.

2Aur us ne Isráíl ke sab sardároṉ ko, káhinoṉ aur Láwíoṉ samet ikaṭṭhá kiyá.

3Aur tís baras ke aur us se ziyáda ‘umr ke Láwí gine gaye, aur un kí gintí ek ek ádmí ko shumár karke aṛtís hazár thí.

4In meṉ se chaubís hazár Ḳhudáwand ke ghar ke kám kí nigrání par muqarrar húe, aur chha hazár sardár aur munsif the;

5aur chár hazár darbán the; aur chár hazár un sázon se Ḳhudáwand kí ta‘ríf karte the, jin ko maiṉ ne ya‘ní Dáúd ne madhsaráí ke liye banáyá thá.

6Aur Dáúd ne un ko Jairson, Qihát, aur Mirárí nám baní Láwí ke faríqoṉ meṉ taqsím kiyá.

7Jairsoníoṉ meṉ se yih the: La‘dán, aur Sima‘í.

8La‘dán ke beṭe: sardár Yahíel, aur Zaitám, aur Yúel, yih tín the.

9Sima‘í ke beṭe: Salúmít, aur Hazíel, aur Hárán, yih tín the. Yih La‘dán ke ábáí ḳhándánoṉ ke sardár the.

10Aur Sima‘í ke beṭe: Yahat, Zíná, aur Ya‘os, aur Barí‘ah; yih chároṉ Sima‘í ke beṭe the.

11Awwal Yahat thá, aur Zízah dúsrá; aur Ya‘os aur Barí‘ah ke beṭe bahut na the, is sabab se wuh ek hí ábáí ḳhándán meṉ gine gaye.

12Aur Qihát ke beṭe: ‘Amrám, Izhár, Habrún, aur ‘Uzzíel, yih chár the.

13‘Amrám ke beṭe: Hárún aur Músá the. Aur Hárún alag kiyá gayá, táki wuh aur us ke beṭe hamesha páktarín chízoṉ kí taqdís kiyá kareṉ, aur sadá Ḳhudáwand ke áge baḳhúr jaláeṉ, aur us kí ḳhidmat kareṉ, aur us ká nám lekar barakat deṉ.

14Rahá mard i Ḳhudá Músá, so us ke beṭe Láwí ke qabíle meṉ gine gaye.

15Aur Músá ke beṭe: Jairsom, aur Ilí‘azar the.

16Aur Jairsom ká beṭá Sabúel sardár thá.

17Aur Ilí‘azar ká beṭá Rahabiyáh sardár thá. Aur Ilí‘azar ke âur beṭe na the, par Rahabiyáh ke bahut se beṭe the.

18Izhár ká beṭá Salúmít sardár thá.

19Habrún ke beṭoṉ meṉ awwal Yariyáh Amariyáh dúsrá, Yaházíel tísrá, aur Yaqami‘ám chauthá thá.

20‘Uzzíel ke beṭoṉ meṉ awwal Míkáh sardár, aur Yasiyáh dúsrá thá.

21Mirárí ke beṭe: Mahlí, aur Múshí, aur Mahlí ke beṭe: Ilí‘azar aur Qís the.

22Aur Ilí‘azar mar gayá, aur us ke koí beṭá na thá, faqat beṭiyáṉ thíṉ; aur un ke bháí Qís ke beṭoṉ ne un se biyáh kiyá.

23Múshí ke beṭe: Mahlí, aur ‘Edar, aur Yarímot, yih tín the.

24Láwí ke beṭe yihí the jo apne apne ábáí ḳhándán ke mutábiq the: un ke ábáí ḳhándánoṉ ke sardár, jaisá wuh nám ba nám ek ek karke gine gaye, yihí haiṉ; wuh bís baras aur us se úpar kí ‘umr se Ḳhudáwand ke ghar kí ḳhidmat ká kám karte the.

25Kyúṉki Dáúd ne kahá, ki Ḳhudáwand Isráíl ke Ḳhudá ne apne logoṉ ko árám diyá hai, aur wuh abad tak Yarúshalem meṉ sukúnat karegá:

26aur Láwíoṉ ko bhí maskan, aur us kí ḳhidmat ke sab zurúf ko phir kabhí uṭháná na paṛegá.

27Kyúṉki Dáúd kí pichhlí bátoṉ ke muwáfiq baní Láwí jo bís baras aur us se ziyáda ‘umr ke the gine gaye:

28kyúṉki un ká kám yih thá, ki Ḳhudáwand ke ghar kí ḳhidmat ke waqt sahnoṉ, aur koṭhriyoṉ meṉ, aur sab muqaddas chízoṉ ke pák karne meṉ, ya‘ní Ḳhudá ke ghar kí ḳhidmat ke kám meṉ, baní Hárún kí madad kareṉ.

29Aur nazr kí roṭí ká, aur maide kí nazr kí qurbání ká ḳhwáh wuh beḳhamírí roṭiyoṉ yá tawe par kí pakí húí chízoṉ, yá tulí húí chízoṉ kí ho, aur har tarah ke tol aur náp ká kám kareṉ;

30aur har subh aur shám ko khaṛe hokar Ḳhudáwand kí shukrguzárí aur sitáish kareṉ;

31aur sabtoṉ, aur naye chándoṉ, aur muqarrara ‘ídoṉ meṉ hamesha Ḳhudáwand ke huzúr púrí ta‘dád meṉ sab soḳhtaní qurbáníáṉ us qá‘ide ke mutábiq jo un ke báre meṉ hai, chaṛháyá kareṉ:

32aur Ḳhudáwand ke ghar kí ḳhidmat ko anjám dene ke liye ḳhaima e ijtimá‘ kí hifázat aur maqdis kí nigrání aur apne bháí baní Hárún kí itá‘at kareṉ.

← Chapter 22 Jump to: Chapter 24 →