1 Chronicles 5

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 4 Jump to: Chapter 6 →

1Aur Isráíl ke pahlauṭhe Rúbin ke beṭe, (kyúṉki wuh us ká pahlauṭhá thá, lekin is liye ki us ne apne báp ke bichhaune ko nápák kiyá thá, us ke pahlauṭhe hone ká haqq Isráíl ke beṭe Yúsuf kí aulád ko diyá gayá, táki nasabnáma pahlauṭhepan ke mutábiq na ho.

2Kyúṉki Yahúdáh apne bháiyoṉ se zoráwar ho gayá, aur sardár usí meṉ se niklá, lekin pahlauṭhe ká haqq Yúsuf ká húá:)

3so Isráíl ke pahlauṭhe Rúbin ke beṭe yih haiṉ: Hanúk, aur Fallú, Hasron, aur Karmí.

4Yúel ke beṭe yih haiṉ: us ká beṭá Sama‘iyáh, Sama‘iyáh ká beṭá Júj, Júj ká beṭá Sima‘í,

5Sima‘í ká beṭá Míkáh, Míkáh ká beṭá Riyáyáh, Riyáyáh ká beṭá Ba‘l,

6Ba‘l ká beṭá Baírah jis ko Asúr ká bádsháh Tilgátpilnásar asír karke le gayá; wuh Rúbíníoṉ ká sardár thá.

7Aur us ke bháí apne apne gharáne ke mutábiq, jab un kí aulád ká nasabnáma likhá gayá, yih the; sardár Ya‘íel, aur Zakariyáh,

8aur Bála‘ bin ‘Azaz, bin Sama‘, bin Yúel; wuh ‘Aro‘ír meṉ, Nabo aur Ba‘l Ma‘ún tak,

9aur mashriq kí taraf daryá e Furát se biyábán meṉ dáḳhil hone kí jagah tak basá húá thá, kyúṉki mulk i Jili‘ád meṉ un ke chaupáye bahut baṛh gaye the.

10Aur Sáúl ke aiyám meṉ unhoṉ ne Hájiríoṉ se laṛáí kí, jo un ke háth se qatl húe, aur wuh Jili‘ád ke mashriq ke sáre ‘iláqe meṉ un ke ḍeroṉ meṉ bas gaye.

11Aur baní Jadd un ke muqábil mulk i Basan meṉ Salkah tak base húe the:

12awwal Yúel thá, aur Sáfam dúsrá aur Ya‘ní, aur Sáfat Basan meṉ the:

13aur un ke ábáí ḳhándánoṉ ke bháí yih haiṉ: Míkáel, aur Masullám, aur Sab‘a, aur Yúrí, aur Ya‘kán, aur Zí‘a, aur ‘Ibr, yih sátoṉ.

14Yih baní Abíḳhail bin Húrí, bin Yárúáh, bin Jili‘ád, bin Míkáel, bin Yasísí, bin Yahdú, bin Búz the;

15Aḳhí bin ‘Abdíel, bin Júní, in ke abáí ḳhándánoṉ ká sardár thá.

16Aur wuh Basan meṉ Jili‘ád, aur us ke qasboṉ, aur Shárún kí sárí nawáhí meṉ, jaháṉ tak un kí hadd thí base húe the.

17Yahúdáh ke bádsháh Yútám ke aiyám meṉ, aur Isráíl ke bádsháh Yarubi‘ám ke aiyám meṉ, un sabhoṉ ke nám un ke nasabnámoṉ ke mutábiq likhe gaye.

18Aur baní Rúbin, aur Jaddíoṉ aur Munassí ke ádhe qabíle meṉ súrmá, ya‘ní aise log jo sipar aur teg̣ uṭháne ke qábil, aur tírandáz aur jangázmúda the, chauálís hazár sát sau sáṭh the jo jang par jáne ke láiq the.

19Yih Hájiríoṉ, aur Yatúr, aur Nafís, aur Nodab se laṛe;

20aur un se muqábala karne ke liye madad páí, aur Hájirí, aur sab jo un ke sáth the, un ke hawále kiye gaye; kyúṉki unhoṉ ne laṛáí meṉ Ḳhudá se du‘á kí, aur un kí du‘á qubúl húí, is liye ki unhoṉ ne us par bharosá rakkhá.

21Aur wuh un kí mawáshí le gaye; un ke úṉṭoṉ meṉ se pachás hazár, aur bheṛ bakriyoṉ meṉ se ḍháí lákh, aur gadhoṉ meṉ se do hazár, aur ádmíoṉ meṉ se ek lákh.

22Kyúṉki bahut se log qatl húe, is liye ki jang Ḳhudá kí thí. Aur wuh asírí ke waqt tak un kí jagah base rahe.

23Aur Munassí ke ádhe qabíle ke log mulk meṉ base: wuh Basan se Ba‘l Harmún, aur Sanír, aur Harmún ke paháṛ tak phail gaye.

24Aur un ke ábáí ḳhándánoṉ ke sardár yih the: ‘Ífr, aur Yasa‘í, aur Ilíel, ‘Azríel, Yarmiyáh, aur Húdáwiyáh, aur Yahdel, jo zabardast súrmá, aur námwar, aur apne ábáí ḳhándánoṉ ke sardár the.

25Aur unhoṉ ne apne bápdádá ke Ḳhudá kí hukm‘udúlí kí, aur jis mulk ke báshindoṉ ko Ḳhudá ne un ke sámne se halák kiyá thá un hí ke deotáoṉ kí pairawí meṉ unhoṉ ne zinákárí kí.

26Tab Isráíl ke Ḳhudá ne Asúr ke bádsháh Púl ke dil ko aur Asúr ke bádsháh Tilgátpilnásar ke dil ko ubhárá, aur wuh un ko, ya‘ní Rúbíníoṉ, aur Jaddíoṉ, aur Munassí ke ádhe qabíle ko asír karke le gaye, aur un ko Ḳhalah, aur Ḳhábúr, aur Hárá, aur Jauzán kí nadí tak le áe; yih áj ke din tak wahíṉ haiṉ.

← Chapter 4 Jump to: Chapter 6 →