1 Chronicles 28

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 27 Jump to: Chapter 29 →

1Aur Dáúd ne Isráíl ke sab umará ko jo qabíloṉ ke sardár the, aur un faríqoṉ ke sardároṉ ko jo bárí bárí bádsháh kí ḳhidmat karte the, aur hazároṉ ke sardároṉ, aur saikṛoṉ ke sardároṉ, aur bádsháh ke aur us ke beṭoṉ ke sab mál aur maweshí ke sardároṉ, aur ḳhwájasaráoṉ, aur baháduroṉ, balki sab zabardast surmáoṉ ko, Yarúshalem meṉ ikaṭṭhá kiyá.

2Tab Dáúd bádsháh apne páṉwoṉ par uṭh khaṛá húá, aur kahne lagá, Ai mere bháiyo, aur mere logo, merí suno: mere dil meṉ to thá, ki Ḳhudáwand ke ‘ahd ke sandúq ke liye árámgáh, aur apne Ḳhudá ke liye páṉwoṉ kí kursí banáúṉ, aur maiṉ ne us ke banáne kí taiyárí bhí kí,

3par Ḳhudá ne mujh se kahá, ki Tú mere nám ke liye ghar nahíṉ banáne páegá, kyúṉki tú jangí mard hai, aur tú ne ḳhún baháyá hai.

4Taubhí Ḳhudáwand Isráíl ke Ḳhudá ne mujhe mere báp ke sáre gharáne meṉ se chun liyá, ki maiṉ sadá Isráíl ká bádsháh rahúṉ; kyúṉki us ne Yahúdáh ko peshwá hone ke liye muntaḳhab kiyá; aur Yahúdáh ke gharáne meṉ se mere báp ke gharáne ko chuná hai, aur mere báp ke beṭoṉ meṉ se mujhe pasand kiyá, táki mujhe sáre Isráíl ká bádsháh banáe:

5aur mere sab beṭoṉ meṉ se, (kyúṉki Ḳhudáwand ne mujhe bahut se beṭe diye haiṉ,) us ne mere beṭe Sulaimán ko pasand kiyá, táki wuh Isráíl par Ḳhudáwand kí saltanat ke taḳht par baiṭhe.

6Aur us ne mujh se kahá, ki Terá beṭá Sulaimán mere ghar aur merí bárgáhoṉ ko banáegá; kyúṉki maiṉ ne use chun liyá hai, ki wuh merá beṭá ho, aur maiṉ us ká báp húṉgá.

7Aur agar wuh mere hukmoṉ aur farmánoṉ par ‘amal karne meṉ sábitqadam rahe, jaisá áj ke din hai, to maiṉ us kí bádsháhí hamesha tak qáim rakkhúṉgá.

8Pas ab sáre Isráíl, ya‘ní Ḳhudáwand kí jamá‘at ke rúbarú, aur hamáre Ḳhudá ke huzúr, tum Ḳhudáwand apne Ḳhudá ke sab hukmoṉ ko máno, aur un ke tálib ho, táki tum is achchhe mulk ke wáris ho, aur use apne ba‘d apní aulád ke wáste hamesha ke liye mírás chhoṛ jáo.

9Aur tú, ai mere beṭe Sulaimán, apne báp ke Ḳhudá ko pahchán, aur púre dil aur rúh kí musta‘iddí se us kí ‘ibádat kar; kyúṉki Ḳhudáwand sab diloṉ ko jáṉchtá hai, aur jo kuchh ḳhayál meṉ átá hai, use pahchántá hai: agar tú use ḍhúṉḍhe, to wuh tujh ko mil jáegá; aur agar tú use chhoṛe, to wuh hamesha ke liye tujhe radd kar degá.

10So hoshyár ho, kyúṉki Ḳhudáwand ne tujh ko maqdis ke liye ek ghar banáne ko chuná hai; so himmat báṉdhkar kám kar.

11Tab Dáúd ne apne beṭe Sulaimán ko haikal ke usáre, aur us ke makánoṉ, aur ḳhazánoṉ, aur báláḳhánoṉ, aur andar kí koṭhriyoṉ, aur kaffáragáh kí jagah ká namúna,

12aur un sab chízoṉ, ya‘ní Ḳhudáwand ke ghar ke sahnoṉ, aur ás pás kí koṭhriyoṉ, aur Ḳhudá ke maskan ke ḳhazánoṉ, aur nazr kí húí chízoṉ ke ḳhazánoṉ ká namúna bhí diyá jo us ko rúh se milá thá.

13Aur káhinoṉ aur Láwíoṉ ke faríqoṉ, aur Ḳhudáwand ke maskan kí ‘ibádat ke sab kám, aur Ḳhudáwand ke maskan kí ‘ibádat ke sab zurúf ke liye;

14ya‘ní sone ke zurúf ke wáste soná tolkar, har tarah kí ḳhidmat ke sab zurúf ke liye, aur chándí ke sab zurúf ke wáste chándí tolkar, har tarah kí ḳhidmat ke sab zurúf ke liye;

15aur sone ke sham‘adánoṉ, aur us ke chirág̣oṉ ke wáste ek ek sham‘adán aur us ke chirág̣oṉ ká soná tolkar, aur chándí ke sham‘adánoṉ ke wáste ek ek sham‘adán aur us ke chirág̣oṉ ke liye, har sham‘adán ke isti‘mál ke mutábiq chándí tolkar,

16aur nazr kí roṭí kí mezoṉ ke wáste ek ek mez ke liye soná tolkar, aur chándí kí mezoṉ ke liye chándí;

17aur káṉṭoṉ, aur kaṭoroṉ aur piyáloṉ ke liye ḳhális soná diyá; aur sunahle piyáloṉ ke wáste ek ek piyále ke liye tolkar, aur chándí ke piyáloṉ ke wáste ek ek piyále ke liye tolkar,

18aur baḳhúr kí qurbángáh ke liye chokhá soná tolkar; aur rath ke namúne, ya‘ní un karúbíoṉ ke liye jo par phailáe Ḳhudáwand ke ‘ahd ke sandúq ko ḍháṉke húe the, soná diyá.

19Yih sab ya‘ní is namúne ke sab kám Ḳhudáwand ke háth kí tahrír se mujhe samjháe gaye.

20Aur Dáúd ne apne beṭe Sulaimán se kahá, ki Himmat báṉdh aur hausala se kám kar, ḳhauf na kar, hirásán na ho, kyúṉki Ḳhudáwand Ḳhudá jo merá Ḳhudá hai, tere sáth hai; wuh tujh ko na chhoṛegá, aur na tark karegá, jab tak Ḳhudáwand ke maskan kí ḳhidmat ká sárá kám tamám na ho jáe.

21Aur dekh, káhinoṉ aur Láwíoṉ ke faríq Ḳhudá ke maskan kí sárí ḳhidmat ke liye házir haiṉ; aur har qism kí ḳhidmat ke liye sab tarah ke kám meṉ har shaḳhs jo máhir hai, baḳhushí tere sáth ho jáegá, aur lashkar ke sardár aur sab log bhí tere hukm meṉ hoṉge.

← Chapter 27 Jump to: Chapter 29 →