1 Chronicles 22

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 21 Jump to: Chapter 23 →

1Aur Dáúd ne kahá, Yihí Ḳhudáwand Ḳhudá ká ghar, aur yihí Isráíl kí soḳhtaní qurbání ká mazbah hai.

2Aur Dáúd ne hukm diyá, ki un pardesiyoṉ ko jo Isráíl ke mulk meṉ the jama‘ kareṉ; aur us ne saṉgtarásh muqarrar kiye, ki Ḳhudá ke ghar ke banáne ke liye patthar káṭkar ghaṛeṉ.

3Aur Dáúd ne darwázoṉ ke kiwáṛoṉ kí kíloṉ aur qabzoṉ ke liye bahut sá lohá, aur itná pítal ki tol se báhar thá,

4aur deodár ke beshumár laṭṭhe taiyár kiye, kyúṉki Saidání aur Súrí deodár ke laṭṭhe kasrat se Dáúd ke pás láte the.

5Aur Dáúd ne kahá, ki Merá beṭá Sulaimán laṛká aur nátajribakár hai; aur zarúr hai ki wuh ghar jo Ḳhudáwand ke liye banáyá jáe, niháyat ‘azímu’sh shán ho, aur sab mulkoṉ meṉ us ká nám aur shuhrat ho: so maiṉ us ke liye taiyárí karúṉgá. Chunáṉchi Dáúd ne apne marne se pahle bahut taiyárí kí.

6Tab us ne apne beṭe Sulaimán ko buláyá, aur use tákíd kí ki Ḳhudáwand Isráíl ke Ḳhudá ke liye ek ghar banáe.

7Aur Dáúd ne apne beṭe Sulaimán se kahá, Yih to ḳhud mere dil meṉ thá, ki Ḳhudáwand apne Ḳhudá ke nám ke liye ek ghar banáúṉ;

8lekin Ḳhudáwand ká kalám mujhe pahuṉchá, ki Tú ne bahut ḳhúnrezí kí hai, aur baṛí baṛí laṛáiyáṉ laṛá hai; so tú mere nám ke liye ghar na banáná: kyúṉki tú ne zamín par mere sámne bahut ḳhún baháyá hai.

9Dekh, tujh se ek beṭá paidá hogá: wuh mard i sulh hogá, aur maiṉ use chároṉ taraf ke sab dushmanoṉ se amn baḳhshúṉgá; kyúṉki Sulaimán us ká nám hogá, aur maiṉ us ke aiyám meṉ Isráíl ko amn o amán baḳhshúṉgá.

10Wuhí mere nám ke liye ek ghar banáegá; wuh merá beṭá hogá, aur maiṉ us ká báp húṉgá; aur maiṉ Isráíl par us kí saltanat ká taḳht abad tak qáim rakkhúṉgá.

11Ab, ai mere beṭe, Ḳhudáwand tere sáth rahe, aur tú iqbálmand ho, aur Ḳhudáwand apne Ḳhudá ká ghar baná, jaisá us ne tere haqq meṉ farmáyá hai.

12Ab Ḳhudáwand tujhe ‘aql o dánáí baḳhshe, aur Isráíl kí bábat terí hidáyat kare, táki tú Ḳhudáwand apne Ḳhudá kí sharí‘at ko mántá rahe.

13Tab tú iqbálmand hogá, basharte ki tú un áín aur ahkám par jo Ḳhudáwand ne Músá ko Isráíl ke liye diye ihtiyát karke ‘amal kare. So himmat báṉdh, aur hausala rakh; ḳhauf na kar; hirásán na ho.

14Dekh, maiṉ ne mashaqqat se Ḳhudáwand ke ghar ke liye ek lákh qintár soná, aur das lákh qintár chándí, aur beandáza pítal aur lohá taiyár kiyá hai; kyúṉki wuh kasrat se hai; aur lakṛí aur patthar bhí maiṉ ne taiyár kiye haiṉ; aur tú un ko âur baṛhá saktá hai.

15Aur bahut se kárígar, patthar aur lakṛí ke káṭne aur taráshnewále, aur sab tarah ke hunarmand jo qism qism ke kám meṉ máhir haiṉ tere pás haiṉ.

16Sone aur chándí, aur pítal, aur lohe ká kuchh hisáb nahíṉ hai. So uṭh, aur kám meṉ lag já, aur Ḳhudáwand tere sáth rahe.

17Is ke ‘aláwa Dáúd ne Isráíl ke sab sardároṉ ko apne beṭe Sulaimán kí madad ká hukm diyá, aur kahá,

18Kyá Ḳhudáwand tumhárá Ḳhudá tumháre sáth nahíṉ hai? aur kyá us ne tum ko chároṉ taraf chain nahíṉ diyá hai? kyúṉki us ne is mulk ke báshindoṉ ko mere háth meṉ kar diyá hai, aur mulk Ḳhudáwand aur us ke logoṉ ke áge mag̣lúb húá hai.

19So ab tum apne dil ko aur apní ján ko Ḳhudáwand apne Ḳhudá kí talásh meṉ lagáo; aur uṭho, aur Ḳhudáwand Ḳhudá ká maqdis banáo, táki tum Ḳhudáwand ke ‘ahd ke sandúq ko, aur Ḳhudá ke pák bartanoṉ ko, us ghar meṉ jo Ḳhudáwand ke nám ká banegá le áo.

← Chapter 21 Jump to: Chapter 23 →