1 Chronicles 29

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 28 Jump to:

1Aur Dáúd bádsháh ne sárí jamá‘at se kahá, ki Ḳhudá ne faqat mere beṭe Sulaimán ko chuná hai, aur wuh hanoz laṛká aur nátajribakár hai, aur kám baṛá hai; kyúṉki wuh mahall insán ke liye nahíṉ balki Ḳhudáwand Ḳhudá ke liye hai.

2Aur maiṉ ne to apne maqdúr bhar apne Ḳhudá kí haikal ke liye sone kí chízoṉ ke liye soná, aur chándí kí chízoṉ ke liye chándí, aur pítal kí chízoṉ ke liye pítal, lohe kí chízoṉ ke liye lohá, aur lakṛí kí chízoṉ ke liye lakṛí, aur ‘aqíq aur jaṛáú patthar aur pachchí ke kám ke liye rang ba rang ke patthar, aur har qism ke beshqímat jawáhir, aur bahut sá saṉg i marmar taiyár kiyá hai;

3aur chúṉki mujhe apne Ḳhudá ke ghar kí lau lagí hai, aur mere pás sone aur chándí ká merá apná ḳhazána hai, so maiṉ us ko bhí un sab chízoṉ ke ‘aláwa jo maiṉ ne us muqaddas haikal ke liye nazr kí haiṉ, apne Ḳhudá ke ghar ke liye detá húṉ;

4ya‘ní tín hazár qintár soná jo Ofír ká soná hai, aur sát hazár qintár ḳhális chándí ‘imáratoṉ kí díwároṉ par manḍhne ke liye:

5aur kárígaroṉ ke háth ke har qism ke kám ke liye sone kí chízoṉ ke wáste soná, aur chándí kí chízoṉ ke wáste chándí hai. Pas kaun taiyár hai ki apní ḳhushí se apne áp ko áj Ḳhudáwand ke liye maḳhsús kare?

6Tab ábáí ḳhándánoṉ ke sardároṉ, aur Isráíl ke qabíloṉ ke sardároṉ, aur hazároṉ aur saikṛoṉ ke sardároṉ, aur sháhí kám ke názimoṉ ne apní ḳhushí se taiyár hokar,

7Ḳhudá ke ghar ke kám ke liye soná, páṉch hazár qintár aur das hazár dirham, aur chándí das hazár qintár, aur pítal aṭhárah hazár qintár, aur lohá, ek lakh qintár diyá.

8Aur jin ke pás jawáhir the, unhoṉ ne un ko Jairsoní Yahíel ke háth meṉ Ḳhudáwand ke ghar ke ḳhazáne ke liye de ḍálá.

9Tab log shádmán húe, is liye ki unhoṉ ne apní ḳhushí se diyá, kyúṉki unhoṉ ne púre dil se razámandí se Ḳhudáwand ke liye diyá thá: aur Dáúd bádsháh bhí niháyat shádmán húá.

10Pas Dáúd ne sárí jamá‘at ke áge Ḳhudáwand ká shukr kiyá; aur Dáúd kahne lagá, Ai Ḳhudáwand, hamáre báp Isráíl ke Ḳhudá, tú abadu’l ábád mubárak ho.

11Ai Ḳhudáwand, ‘azmat, aur qudrat, aur jalál, aur g̣alba, aur hashmat tere hí liye haiṉ, kyúṉki sab kuchh jo ásmán aur zamín meṉ hai terá hai; ai Ḳhudáwand, bádsháhí terí hai, aur tú hí bahaisiyat i sardár sabhoṉ se mumtáz hai;

12aur daulat aur ‘izzat terí taraf se átí haiṉ, aur tú sabhoṉ par hukúmat kartá hai, aur tere háth meṉ qudrat aur tawánáí haiṉ, aur sarfaráz karná aur sabhoṉ ko zor baḳhshná tere háth meṉ hai.

13Aur ai hamáre Ḳhudá, ham terá shukr aur tere jalálí nám kí ta‘ríf karte haiṉ.

14Par maiṉ kaun, aur mere logoṉ kí haqíqat kyá, ki ham is tarah se ḳhushí ḳhushí nazrána dene ke qábil hoṉ? kyúṉki sab chízeṉ terí taraf se miltí haiṉ aur terí hí chízoṉ meṉ se ham ne tujhe diyá hai.

15Kyúṉki ham tere áge pardesí aur musáfir haiṉ jaise hamáre bápdádá the; hamáre din rú e zamín par sáye kí tarah haiṉ, aur qiyám nasíb nahíṉ.

16Ai Ḳhudáwand, hamáre Ḳhudá, yih sárá zaḳhíra jo ham ne taiyár kiyá hai, ki tere pák nám ke liye ek ghar banáeṉ, tere hí háth se milá hai, aur sab terá hí hai.

17Ai mere Ḳhudá, maiṉ yih bhí jántá húṉ, ki tú dil ko jáṉchtá hai, aur rástí meṉ terí ḳhushnúdí hai. Maiṉ ne to apne dil kí rástí se yih sab kuchh razámandí se diyá; aur mujhe tere logoṉ ko jo yaháṉ házir haiṉ, tere huzúr ḳhushí ḳhushí dete dekhkar masarrat hásil húí.

18Ai Ḳhudáwand, hamáre bápdádá, Abrahám, Izháq, aur Isráíl ke Ḳhudá, apne logoṉ ke dil ke ḳhayál aur tasawwur meṉ yih bát sadá jamáe rakh, aur un ke dil ko apne jánib musta‘idd kar:

19aur mere beṭe Sulaimán ko aisá kámil dil ‘atá kar ki wuh tere hukmoṉ, aur shahádatoṉ, aur áín ko máne, aur in sab bátoṉ par ‘amal kare, aur us haikal ko banáe, jis ke liye maiṉ ne taiyárí kí hai.

20Phir Dáúd ne sárí jamá‘at se kahá, Ab apne Ḳhudáwand Ḳhudá ko mubárak kaho. Tab sárí jamá‘at ne Ḳhudáwand apne bápdádá ke Ḳhudá ko mubárak kahá, aur sir jhukákar unhoṉ ne Ḳhudáwand aur bádsháh ke áge sijda kiyá.

21Aur dúsre din Ḳhudáwand ke liye zabíhoṉ ko zabh kiyá, aur Ḳhudáwand ke liye soḳhtaní qurbáníáṉ chaṛháíṉ, ya‘ní ek hazár bail, aur ek hazár meṉḍhe, aur ek hazár barre ma‘ un ke tapáwanoṉ ke chaṛháe aur bakasrat qurbáníáṉ kíṉ jo sáre Isráíl ke liye thíṉ;

22aur unhoṉ ne us din niháyat shádmání ke sáth Ḳhudáwand ke áge kháyá piyá. Aur unhoṉ ne dúsrí bár Dáúd ke beṭe Sulaimán ko bádsháh banákar us ko Ḳhudáwand kí taraf se peshwá hone aur Sadoq ko káhin hone ke liye masah kiyá.

23Tab Sulaimán Ḳhudáwand ke taḳht par apne báp Dáúd kí jagah bádsháh hokar baiṭhá, aur iqbálmand húá; aur sárá Isráíl us ká mutí‘ húá.

24Aur sab umará, aur bahádur, aur Dáúd bádsháh ke sab beṭe bhí, Sulaimán bádsháh ke mutí‘ húe.

25Aur Ḳhudáwand ne sáre Isráíl kí nazar meṉ Sulaimán ko niháyat sarfaráz kiyá, aur use aisá sháhána dabdaba ‘ináyat kiyá jo us se pahle Isráíl meṉ kisí bádsháh ko nasíb na húá thá.

26Aur Dáúd bin Yassí ne sáre Isráíl par saltanat kí.

27Aur wuh ‘arsa, jis meṉ us ne Isráíl par saltanat kí, chálís baras ká thá; us ne Habrún meṉ sát baras, aur Yarúshalem meṉ teṉtís baras saltanat kí.

28Aur us ne niháyat buṛhápe meṉ ḳhúb ‘umrrasída, aur daulat o ‘izzat se ásúda hokar, wafát páí, aur us ká beṭá Sulaimán us kí jagah bádsháh húá.

29Aur Dáúd bádsháh ke kám, shurú‘ se áḳhir tak, sab ke sab Samúel g̣aibbín kí tawáríḳh meṉ, aur Nátan nabí kí tawáríḳh meṉ, aur Jád g̣aibbín kí tawáríḳh meṉ,

30ya‘ní us kí sárí hukúmat aur zor, aur jo zamáne us par aur Isráíl par, aur zamín kí sab mamlukatoṉ par guzre, sab un meṉ likhe haiṉ.

← Chapter 28 Jump to: