Judges 14

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 13 Jump to: Chapter 15 →

1Aur Samsún Timnat ko gayá, aur Timnat meṉ us ne Filistíoṉ kí beṭiyoṉ meṉ se ek ‘aurat dekhí;

2aur us ne ákar apne máṉ báp se kahá, Maiṉ ne Filistíoṉ kí beṭiyoṉ meṉ se Timnat meṉ ek ‘aurat dekhí hai: so tum us se merá biyáh kará do.

3Us ke máṉ báp ne us se kahá, Kyá tere bháiyoṉ kí beṭiyoṉ meṉ yá merí sárí qaum meṉ koí ‘aurat nahíṉ hai jo tú námaḳhtún Filistíoṉ meṉ biyáh karne játá hai? Samsún ne apne báp se kahá, Usí se merá biyáh kará de, kyúṉki wuh mujhe bahut pasand átí hai.

4Par us ke máṉ báp ko ma‘lúm na thá, ki yih Ḳhudáwand kí taraf se hai, kyúṉki wuh Filistíoṉ ke ḳhiláf bahána ḍhúṉḍhtá thá. Us waqt Filistí Isráílíoṉ par hukmrán the.

5Phir Samsún aur us ke máṉ báp Timnat ko chale, aur Timnat ke tákistánoṉ meṉ pahuṉche aur dekho, ek jawán sher Samsún ke sámne ákar garajne lagá.

6Tab Ḳhudáwand kí rúh us par názil húí, aur us ne use bakrí ke bachche kí tarah chír ḍálá, go us ke háth meṉ kuchh na thá: lekin jo us ne kiyá use apne báp yá máṉ ko na batáyá.

7Aur us ne jákar us ‘aurat se báteṉ kíṉ; aur wuh Samsún ko bahut pasand áí.

8Aur kuchh ‘arse ke ba‘d wuh use lene ko lauṭá, aur sher kí lásh dekhne ko katrá gayá aur dekhá, ki sher ke panjar meṉ shahd kí makkhiyoṉ ká hujúm aur shahd hai.

9Us ne use háth meṉ le liyá, aur khátá húá chalá, aur apne máṉ báp ke pás ákar un ko bhí diyá, aur unhoṉ ne bhí kháyá: par us ne un ko na batáyá, ki yih shahd us ne sher ke panjar meṉ se nikálá thá.

10Phir us ká báp us ‘aurat ke háṉ gayá: waháṉ Samsún ne baṛí ziyáfat kí; kyúṉki jawán aisá hí karte the.

11Wuh use dekhkar us ke liye tís rafíqoṉ ko le áe ki us ke sáth raheṉ.

12Samsún ne un se kahá, Maiṉ tum se ek pahelí púchhtá húṉ: so agar tum ziyáfat ke sát din ke andar andar use bújhkar mujhe us ká matlab batá do, to maiṉ tís katání kurte aur tís joṛe kapṛe tum ko dúṉgá:

13aur agar tum batá na sako, to tum tís katání kurte aur tís joṛe kapṛe mujh ko dená. Unhoṉ ne us se kahá, ki Tú apní pahelí bayán kar, táki ham use suneṉ.

14Us ne un se kahá, Khánewále meṉ se to kháná niklá, Aur zabardast meṉ se miṭhás niklí. Aur wuh tín din tak us pahelí ko hall na kar sake.

15Aur sátweṉ din unhoṉ ne Samsún kí bíwí se kahá, ki Apne shauhar ko phuslá, táki is pahelí ká matlab wuh ham ko batá de, nahíṉ to ham tujh ko aur tere báp ke ghar ko ág se jalá deṉge: kyá tum ne ham ko isí liye buláyá hai, ki ham ko faqír kar do? kyá bát bhí yúṉ hí nahíṉ?

16Aur Samsún kí bíwí us ke áge rokar kahne lagí, Tujhe to mujh se nafrat hai: tú mujh ko piyár nahíṉ kartá: tú ne merí qaum ke logoṉ se pahelí púchhí, par wuh mujhe na batáí. Us ne us se kahá, Ḳhúb! Maiṉ ne use apne máṉ báp ko to batáyá nahíṉ, aur tujhe batá dúṉ?

17So wuh us ke áge jab tak ziyáfat rahí sátoṉ din rotí rahí: aur sátweṉ din aisá húá, ki us ne use batá hí diyá; kyúṉki us ne use niháyat tang kiyá thá: aur us ‘aurat ne wuh pahelí apní qaum ke logoṉ ko batá dí.

18Aur us shahr ke logoṉ ne sátweṉ din súraj ke ḍúbne se pahle us se kahá, Shahd se míṭhá âur kyá hotá hai? aur sher se zoráwar âur kaun hai? Us ne un se hahá, Agar tum merí bachhiyá ko hal meṉ na jotte, To merí pahelí kabhí na bújhte.

19Phir Ḳhudáwand kí rúh us par názil húí, aur wuh Asqalon ko gayá Waháṉ us ne un ke tís ádmí máre, aur un ko lúṭkar kapṛoṉ ke joṛe pahelí bújhnewáloṉ ko diye; aur us ká g̣ussa bhaṛak uṭhá, aur wuh apne máṉ báp ke ghar chalá gayá.

20Par Samsún kí bíwí us ke ek rafíq ko jise Samsún ne dost banáyá thá de dí gayí.

← Chapter 13 Jump to: Chapter 15 →