bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Judges 6
Judges 6
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 7 →
1
Aur baní Isráíl ne Ḳhudáwand ke áge badí kí, aur Ḳhudáwand ne un ko sát baras tak Midyáníoṉ ke háth meṉ rakkhá.
2
Aur Midyáníoṉ ká háth Isráílíoṉ par g̣álib húá; aur Midyáníoṉ ke sabab se baní Isráíl ne apne liye paháṛoṉ meṉ khoh, aur g̣ár, aur qil‘e baná liye.
3
Aur aisá hotá thá, ki jab baní Isráíl kuchh bote the, to Midyání, aur ‘Amálíqí, aur ahl i mashriq un par chaṛh áte the;
4
aur un ke muqábil ḍere lagákar G̣azzah tak khetoṉ kí paidáwár ko barbád kar ḍálte, aur baní Isráíl ke liye na to kuchh ma‘ásh, na bheṛ bakrí, na gáe bail, na gadhá chhoṛte the.
5
Kyúṉki wuh apne chaupáyoṉ aur ḍeroṉ ko sáth lekar áte aur ṭiḍḍiyoṉ ke dal kí mánind áte, aur wuh aur un ke úṉṭ beshumár hote the; yih log mulk ko tabáh karne ke liye á játe the.
6
So Isráílí Midyáníoṉ ke sabab se niháyat ḳhastahál ho gaye, aur baní Isráíl Ḳhudáwand se faryád karne lage.
7
Aur jab baní Isráíl Midyáníoṉ ke sabab se Ḳhudáwand se faryád karne lage,
8
to Ḳhudáwand ne baní Isráíl ke pás ek nabí ko bhejá: us ne un se kahá, ki Ḳhudáwand Isráíl ká Ḳhudá yúṉ farmátá hai, ki Maiṉ tum ko Misr se láyá, aur maiṉ ne tum ko g̣ulámí ke ghar se báhar nikálá.
9
Maiṉ ne Misríoṉ ke háth se, aur un sabhoṉ ke háth se jo tum ko satáte the tum ko chhuṛáyá, aur tumháre sámne se un ko dafa‘ kiyá, aur un ká mulk tum ko diyá;
10
aur maiṉ ne tum se kahá thá, ki Ḳhudáwand tumhárá Ḳhudá maiṉ húṉ; so tum un Amoríoṉ ke deotáoṉ se, jin ke mulk meṉ baste ho, mat ḍarná; par tum ne merí bát na mání.
11
Phir Ḳhudáwand ká firishta ákar ‘Ufrah meṉ balút ke ek daraḳht ke níche jo Yúás Abí‘azrí ká thá baiṭhá; aur us ká beṭá Jida‘ún mai ke ek kolhú meṉ gehúṉ jháṛ rahá thá, táki us ko Midyáníoṉ se chhipá rakkhe.
12
Aur Ḳhudáwand ká firishta use dikháí dekar us se kahne lagá, ki Ai zabardast súrmá, Ḳhudáwand tere sáth hai.
13
Jida‘ún ne us se kahá, Ai mere Málik, agar Ḳhudáwand hí hamáre sáth hai, to ham par yih sab hádise kyúṉ guzre, aur us ke wuh sab ‘ajíb kám kaháṉ gaye, jin ká zikr hamáre bápdádá ham se yúṉ karte the, ki Kyá Ḳhudáwand hí ham ko Misr se nahíṉ nikál láyá? par ab to Ḳhudáwand ne ham ko chhoṛ diyá, aur ham ko Midyáníoṉ ke háth meṉ kar diyá.
14
Tab Ḳhudáwand ne us par nigáh kí, aur kahá, ki Tú apne isí zor meṉ já, aur baní Isráíl ko Midyáníoṉ ke háth se chhuṛá: kyá maiṉ ne tujhe nahíṉ bhejá?
15
Us ne us se kahá, Ai málik, maiṉ kis tarah baní Isráíl ko bacháúṉ? Merá gharáná Munassí meṉ sab se g̣aríb hai, aur maiṉ apne báp ke ghar meṉ sab se chhoṭá húṉ.
16
Ḳhudáwand ne us se kahá, Maiṉ zarúr tere sáth húṉgá, aur tú Midyáníoṉ ko aisá már legá, jaise ek ádmí ko.
17
Tab us ne us se kahá, ki Ab agar mujh par tere karam kí nazar húí hai, to is ká mujhe koí nishán dikhá, ki mujh se tú hí báteṉ kartá hai.
18
Aur maiṉ terí minnat kartá húṉ, ki Tú yaháṉ se na já, jab tak maiṉ tere pás phir na áúṉ, aur apná hadya nikálkar tere áge na rakkhúṉ. Us ne kahá, ki Jab tak tú phir á na jáe, maiṉ ṭhahrá rahúṉgá.
19
Tab Jida‘ún ne jákar bakrí ká ek bachcha, aur ek aifah áṭe kí fatírí roṭiyáṉ taiyár kíṉ; aur gosht ko ek ṭokrí meṉ, aur shorbá ek háṉḍí meṉ ḍálkar us ke pás balút ke daraḳht ke níche lákar guzráná.
20
Tab Ḳhudá ke firishte ne use kahá, Is gosht aur fatírí roṭiyoṉ ko le jákar us chaṭán par rakh, aur shorbe ko unḍel de. Us ne waisá hí kiyá.
21
Tab Ḳhudáwand ke firishte ne us ‘asá kí nok se jo us ke háth meṉ thá gosht aur fatírí roṭiyoṉ ko chhúá, aur us patthar se ág niklí, aur us ne gosht aur fatírí roṭiyoṉ ko bhasam kar diyá. Tab Ḳhudáwand ká firishta us kí nazar se g̣áib ho gayá.
22
Aur Jida‘ún ne ján liyá, ki wuh Ḳhudáwand ká firishta thá. So Jida‘ún kahne lagá, Afsos hai, ai málik Ḳhudáwand, ki maiṉ ne Ḳhudáwand ke firishte ko rúbarú dekhá.
23
Ḳhudáwand ne us se kahá, Terí salámatí ho; ḳhauf na kar: tú maregá nahíṉ.
24
Tab Jida‘ún ne waháṉ Ḳhudáwand ke liye mazbah banáyá, aur us ká nám Yahowáh Salom rakkhá: aur wuh Abí‘azríoṉ ke ‘Ufrah meṉ áj tak maujúd hai.
25
Aur usí rát Ḳhudáwand ne use kahá, ki Apne báp ká jawán bail, ya‘ní wuh dúsrá bail jo sát baras ká hai le, aur Ba‘l ke mazbah ko jo tere báp ká hai ḍhá de, aur us ke pás kí Yasírat ko káṭ ḍál:
26
aur Ḳhudáwand apne Ḳhudá ke liye is gaṛhí kí choṭí par qái‘de ke mutábiq ek mazbah baná, aur us dúsre bail ko lekar us Yasírat kí lakṛí se jise tú káṭ ḍálegá soḳhtaní qurbání guzrán.
27
Tab Jida‘ún ne apne naukaroṉ meṉ se das ádmíoṉ ko sáth lekar jaisá Ḳhudáwand ne use farmáyá thá kiyá; aur chúṉki wuh yih kám apne báp ke ḳhándán aur us shahr ke báshindoṉ ke ḍar se din ko na kar saká, is liye use rát ko kiyá.
28
Jab us shahr ke log subh sawere uṭhe, to kyá dekhte haiṉ, ki Ba‘l ká mazbah ḍháyá húá, aur us ke pás kí Yasírat kaṭí húí, aur us mazbah par jo banáyá gayá thá wuh dúsrá bail chaṛháyá húá hai.
29
Aur wuh ápas meṉ kahne lage, Kis ne yih kám kiyá? Aur jab unhoṉ ne tahqíqát aur pursish kí, to logoṉ ne kahá, ki Yúás ke beṭe Jida‘ún ne yih kám kiyá hai.
30
Tab us shahr ke logoṉ ne Yúás se kahá, ki Apne beṭe ko nikál lá, táki qatl kiyá jáe, is liye ki us ne Ba‘l ká mazbah ḍhá diyá, aur us ke pás kí Yasírat káṭ ḍálí hai.
31
Yúás ne un sabhoṉ ko jo us ke sámne khaṛe the kahá, Kyá tum Ba‘l ke wáste jhagṛá karoge, yá tum use bachá loge? jo koí is kí taraf se jhagṛá kare, wuh isí subh márá jáe: agar wuh ḳhudá hai, to áp hí apne liye jhagṛe, kyúṉki kisí ne us ká mazbah ḍhá diyá hai.
32
Is liye us ne us din Jida‘ún ká nám yih kahkar Yarubba‘l rakkhá, ki Ba‘l áp is se jhagaṛ le, is liye ki is ne us ká mazbah ḍhá diyá hai.
33
Tab sab Midyání, aur ‘Amálíqí, aur ahl i mashriq ikaṭṭhe húe; aur pár hokar Yazra‘el kí wádí meṉ unhoṉ ne ḍerá kiyá.
34
Tab Ḳhudáwand kí rúh Jida‘ún par názil húí; so us ne narsingá phúṉká, aur Abí‘azar ke log us kí pairawí meṉ ikaṭṭhe húe.
35
Phir us ne sáre Munassí ke pás qásid bheje; so wuh bhí us kí pairawí meṉ faráham húe: aur us ne Áshar, aur Zabúlún, aur Naftálí ke pás bhí qásid rawána kiye; so wuh un ke istiqbál ko áe.
36
Tab Jida‘ún ne Ḳhudá se kahá, ki Agar tú apne qaul ke mutábiq mere háth ke wasíle se baní Isráíl ko riháí dení cháhtá hai,
37
to dekh, maiṉ bheṛ kí ún khalíhán meṉ rakh dúṉgá, so agar os faqat ún hí par paṛe, aur ás pás kí zamín sab súkhí rahe, to maiṉ ján lúṉgá, ki tú apne qaul ke mutábiq baní Isráíl ko mere háthoṉ ke wasíle se riháí baḳhshegá.
38
Aur aisá hí húá: kyúṉki wuh subh ko jo sawere uṭhá, aur us ún ko dabáyá, aur ún meṉ se os nichoṛí to piyála bhar pání niklá.
39
Tab Jida‘ún ne Ḳhudá se kahá, ki Terá g̣ussa mujh par na bhaṛke, maiṉ faqat ek bár âur ‘arz kartá húṉ; maiṉ terí minnat kartá húṉ, ki faqat ek bár âur is ún se ázmáish kar lúṉ. Ab sirf ún hí ún ḳhushk rahe, aur ás pás kí sab zamín par os paṛe.
40
So Ḳhudá ne us rát aisá hí kiyá: kyúṉki faqat ún hí ḳhushk rahí, aur sárí zamín par os paṛí.
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21