Judges 19

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 18 Jump to: Chapter 20 →

1Aur un dinoṉ meṉ jab Isráíl meṉ koí bádsháh na thá, aisá húá, ki ek shaḳhs ne jo Láwí thá, aur Ifráím ke kohistání mulk ke parle sire par rahtá thá, Baitlahm i Yahúdáh se ek haram apne liye kar lí.

2Us kí haram ne us se bewafáí kí aur us ke pás se Baitlahm i Yahúdáh meṉ apne báp ke ghar chalí gayí, aur chár mahíne wahíṉ rahí.

3Aur us ká shauhar uṭhkar aur ek naukar aur do gadhe sáth lekar us ke píchhe rawána húá, ki use maná phuslákar wápas le áe. So wuh use apne báp ke ghar meṉ le gayí; aur us jawán ‘aurat ká báp use dekhkar us kí muláqát se ḳhush húá.

4Aur us ke ḳhusar ya‘ní us jawán ‘aurat ke báp ne use rok liyá, aur wuh us ke sáth tín din tak rahá: aur unhoṉ ne kháyá piyá, aur waháṉ ṭike rahe.

5Chauthe roz jab wuh subh sawere uṭhe, aur wuh chalne ko khaṛá húá, to us jawán ‘aurat ke báp ne apne dámád se kahá, Ek ṭukṛá roṭí khákar tázadam ho já, is ke ba‘d tum apní ráh lená.

6So wuh donoṉ baiṭh gaye, aur milkar kháyá piyá. Phir us jawán ‘aurat ke báp ne us shaḳhs se kahá, ki Rát bhar âur ṭikne ko rází ho já, aur apne dil ko ḳhush kar.

7Phir wuh mard chalne ko khaṛá ho gayá, lekin us ká ḳhusar us se bajidd húá; so phir us ne wahíṉ rát káṭí.

8Aur páṉchweṉ roz wuh subh sawere uṭhá, táki rawána ho, aur us jawán ‘aurat ke báp ne us se kahá, Zará ḳhátir jama‘ rakh, aur din ḍhalne tak ṭhahre raho. So donoṉ ne roṭí kháí.

9Aur jab wuh shaḳhs, aur us kí haram, aur us ká naukar chalne ko khaṛe húe, to us ke ḳhusar ya‘ní us jawán ‘aurat ke báp ne us se kahá, Dekh, ab to din ḍhalá aur shám ho chalí, so maiṉ tum se minnat kartá húṉ, ki tum rát bhar ṭhahr jáo; dekh, din to ḳhátime par hai: so yahíṉ ṭik já; terá dil ḳhush ho, aur kal subh hí subh tum apní ráh lagná, táki tú apne ghar ko jáe.

10Par wuh shaḳhs us rát rahne par rází na húá: balki uṭhkar rawána húá, aur Yabús ke sámne pahuṉchá; (Yarúshalem yihí hai,) aur do gadhe zín kase húe us ke sáth the, aur us kí haram bhí sáth thí.

11Jab wuh Yabús ke barábar pahuṉche, to din bahut ḍhal gayá thá, aur naukar ne apne áqá se kahá, Á, ham Yabúsíoṉ ke is shahr meṉ muṛ jáeṉ aur yahíṉ ṭikeṉ.

12Us ke áqá ne us se kahá, Ham kisí ajnabí shahr meṉ jo baní Isráíl meṉ se nahíṉ dáḳhil na hoṉge, balki ham Jibi‘ah ko jáeṉge.

13Phir us ne apne naukar se kahá, ki Ham in jagahoṉ meṉ se kisí meṉ chale jáeṉ, aur Jibi‘ah yá Rámah meṉ rát káṭeṉ.

14So wuh áge baṛhe aur ráste chalte hí rahe, aur Binyamín ke Jibi‘ah ke nazdík pahuṉchte pahuṉchte súraj ḍúb gayá.

15So wuh udhar ko muṛe táki Jibi‘ah meṉ dáḳhil hokar waháṉ ṭikeṉ. Aur wuh dáḳhil hokar shahr ke chauk meṉ baiṭh gayá; kyúṉki waháṉ koí ádmí un ko ṭikáne ko apne ghar na le gayá.

16Aur shám ko ek pír mard apná kám karke waháṉ áyá; yih ádmí Ifráím ke kohistání mulk ká thá, aur Jibi‘ah meṉ á basá thá: par us maqám ke báshinde Binyamíní the.

17Us ne jo áṉkheṉ uṭháíṉ to us musáfir ko us shahr ke chauk meṉ dekhá; tab us pír mard ne kahá, Tú kidhar játá hai, aur kaháṉ se áyá hai?

18Us ne us se kahá, ki Ham Yahúdáh ke Baitlahm se Ifráím ke kohistání mulk ke parle sire ko játe haiṉ; maiṉ wahíṉ ká húṉ; aur Yahúdáh ke Baitlahm ko gayá húá thá, aur ab Ḳhudáwand ke ghar ko játá húṉ; yaháṉ koí mujhe apne ghar nahíṉ utártá,

19háláṉki hamáre sáth hámáre gadhoṉ ke liye bhúsá aur chárá hai, aur mere, aur terí lauṉḍí ke wáste aur is jawán ke liye jo tere bandoṉ ke sáth hai roṭí aur mai bhí hai, aur kisí chíz kí kamí nahíṉ.

20Us pír mard ne kahá, Terí salámatí ho; terí sab zarúrateṉ ba har súrat mere zimme hoṉ, lekin is chauk meṉ hargiz na ṭik.

21Wuh use apne ghar le gayá, aur us ke gadhoṉ ko chárá diyá: aur wuh apne páṉw dhokar kháne píne lage.

22Aur jab wuh apne diloṉ ko ḳhush kar rahe the, to us shahr ke logoṉ meṉ se ba‘z ḳhabísoṉ ne us ghar ko gher liyá, aur darwáza píṭne lage, aur sáhib i ḳhána ya‘ní pír mard se kahá, Us shaḳhs ko jo tere ghar meṉ áyá hai báhar le á, táki ham us ke sáth suhbat kareṉ.

23Wuh ádmí jo sáhib i ḳhána thá, báhar un ke pás jákar un se kahne lagá, Nahíṉ, mere bháiyo, aisí sharárat na karo; chúṉki yih shaḳhs mere ghar meṉ áyá hai, is liye yih himáqat na karo.

24Dekho, merí kuṉwárí beṭí aur us shaḳhs kí haram yaháṉ haiṉ; maiṉ abhí un ko báhar láe detá húṉ; tum un kí hurmat lo, aur jo kuchh tum ko bhalá dikháí de un se karo: par is shaḳhs se aisá makrúh kám na karo.

25Par wuh log us kí sunte hí na the: pas wuh mard apní haram ko pakaṛkar un ke pás báhar le áyá. Unhoṉ ne us se suhbat kí aur sárí rát subh tak us ke sáth badzátí karte rahe, aur jab din nikalne lagá, to us ko chhoṛ diyá.

26Wuh ‘aurat pau phaṭte húe áí, aur us mard ke ghar ke darwáze par jaháṉ us ká ḳháwind thá girí, aur raushní hone tak paṛí rahí.

27Aur us ká ḳháwind subh ko uṭhá, aur ghar ke darwáze khole, aur báhar niklá, ki rawána ho: aur dekho, wuh ‘aurat jo us kí haram thí, ghar ke darwáze par apne háth ástáne par phailáe húe paṛí thí.

28Us ne us se kahá, Uṭh, ham chaleṉ; par kisí ne jawáb na diyá. Tab us shaḳhs ne use apne gadhe par lád liyá; aur wuh mard uṭhá, aur apne makán ko chalá gayá.

29Aur us ne ghar pahuṉchkar chhurí lí, aur apní haram ko lekar us ke a‘zá káṭe, aur us ke bárah tukṛe karke Isráíl kí sab sarhaddoṉ meṉ bhej diye.

30Aur jitnoṉ ne yih dekhá, wuh kahne lage, ki Jab se baní Isráíl Misr se nikal áe, us din se áj tak aisá fi‘l na kabhí húá, aur na dekhne meṉ áyá; so is par g̣aur karo, aur saláh karke batáo.

← Chapter 18 Jump to: Chapter 20 →