Judges 17

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 16 Jump to: Chapter 18 →

1Aur Ifráím ke kohistání mulk ká ek shaḳhs thá, jis ká nám Míkáh thá.

2Us ne apní máṉ se kahá, Chándí ke wuh gyárah sau sikke jo tere pás se liye gaye the aur jin kí bábat tú ne la‘nat bhejí, aur mujhe bhí yihí sunákar kahá, so dekh, wuh chándí mere pás hai. Maiṉ ne us ko le liyá thá. Us kí máṉ ne kahá, Mere beṭe ko Ḳhudáwand kí taraf se barakat mile.

3Aur us ne chándí ke wuh gyárah sau sikke apní máṉ ko pher diye; tab us kí máṉ ne kahá, Maiṉ is chándí ko apne beṭe kí ḳhátir apne háth se Ḳhudáwand ke liye muqaddas kiye detí húṉ, táki wuh ek but khudá húá aur ek ḍhálá húá banáe: so ab maiṉ is ko tujhe pher detí húṉ.

4Par jab us ne wuh naqdí apní máṉ ko pher dí, to us kí máṉ ne chándí ke do sau sikke lekar un ko ḍhálnewále ko diyá, jis ne un se ek khudá húá aur ek ḍhálá húá but banáyá: aur wuh Míkáh ke ghar meṉ rahe.

5Aur is shaḳhs Míkáh ke háṉ ek butḳhána thá, aur us ne ek afod aur tiráfím ko banwáyá; aur apne beṭoṉ meṉ se ek ko maḳhsús kiyá jo us ká káhin húá.

6Un dinoṉ Isráíl meṉ koí bádsháh na thá, aur har shaḳhs jo kuchh us kí nazar meṉ achchhá ma‘lúm hotá wuhí kartá thá.

7Aur Baitlahm i Yahúdáh meṉ Yahúdáh ke gharáne ká ek jawán thá jo Láwí thá; yih wahíṉ ṭiká húá thá.

8Yih shaḳhs us shahr ya‘ní Baitlahm i Yahúdáh se niklá, ki âur kahíṉ, jaháṉ jagah mile, já ṭike: so wuh safar kartá húá Ifráím ke kohistání mulk meṉ Míkáh ke ghar á niklá.

9Aur Míkáh ne us se kahá, Tú kaháṉ se átá hai? Us ne us se kahá, Maiṉ Baitlahm i Yahúdáh ká ek Láwí húṉ, aur niklá húṉ, ki jaháṉ kahíṉ jagah mile, wahíṉ rahúṉ.

10Míkáh ne us se kahá, Mere sáth rah já aur merá báp aur káhin ho; maiṉ tujhe chándí ke das sikke sálána, aur ek joṛá kapṛá aur kháná dúṉgá. So wuh Láwí andar chalá gayá.

11Aur wuh us mard ke sáth rahne par rází húá; aur wuh jawán us ke liye aisá hí thá, jaisá us ke apne beṭoṉ meṉ se ek beṭá.

12Aur Míkáh ne us Láwí ko maḳhsús kiyá, aur wuh jawán us ká káhin baná, aur Míkáh ke ghar meṉ rahne lagá.

13Tab Míkáh ne kahá, Maiṉ ab jántá húṉ, ki Ḳhudáwand merá bhalá karegá, kyúṉki ek Láwí merá káhin hai.

← Chapter 16 Jump to: Chapter 18 →