bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Judges 8
Judges 8
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 9 →
1
Aur Ifráím ke logoṉ ne us se kahá, ki Tú ne ham se yih sulúk kyúṉ kiyá, ki jab tú Midyáníoṉ se laṛne ko chalá to ham ko na bulwáyá? So unhoṉ ne us ke sáth baṛá jhagṛá kiyá.
2
Us ne un se kahá, Maiṉ ne tumhárí tarah bhalá kyá hí kiyá hai? Kyá Ifráím ke chhoṛe húe angúr bhí Abí‘azar kí fasl se bihtar nahíṉ haiṉ?
3
Ḳhudá ne Midyán ke sardár ‘Oreb aur Zaeb ko tumháre háth meṉ kar diyá. Pas, tumhárí tarah maiṉ kar hí kyá saká húṉ? Jab us ne yih kahá, to un ká g̣ussa us kí taraf se dhímá ho gayá.
4
Tab Jida‘ún aur us ke sáth ke tín sau ádmí, jo báwujúd thake máṉde hone ke phir bhí píchhá karte hí rahe the, Yardan par ákar pár utre.
5
Tab us ne Sukkát ke báshindoṉ se kahá, ki In logoṉ ko jo mere pairau haiṉ roṭí ke girde do, kyúṉki yih thak gaye haiṉ, aur maiṉ Midyán ke donoṉ bádsháhoṉ Zibah aur Zilmana‘ ká píchhá kar rahá húṉ.
6
Sukkát ke sardároṉ ne kahá, Kyá Zibah aur Zilmana‘ ke háth ab tere qabze meṉ á gaye haiṉ jo ham tere lashkar ko roṭiyáṉ deṉ?
7
Jida‘ún ne kahá, Jab Ḳhudáwand Zibah aur Zilmana‘ ko mere háth meṉ kar degá, to maiṉ tumháre gosht ko babúl aur sadá guláb ke káṉṭoṉ se nuchwáúṉgá.
8
Phir waháṉ se wuh Fanúel ko gayá, aur waháṉ ke logoṉ se bhí aisí hí bát kahí, aur Fanúel ke logoṉ ne bhí use waisá hí jawáb diyá jaisá Sukkátíoṉ ne diyá thá.
9
So us ne Fanúel ke báshindoṉ se bhí kahá, ki Jab maiṉ salámat lauṭúṉgá, to is burj ko ḍhá dúṉgá.
10
Aur Zibah aur Zilmana‘ apne pandrah hazár ádmíoṉ ke lashkar samet Qarqúr meṉ the, kyúṉki faqat itne hí ahl i mashriq ke lashkar meṉ se bach rahe the, is liye ki ek lákh bís hazár shamsherzan mard qatl ho gaye the.
11
So Jida‘ún un logoṉ ke ráste se jo Nubah aur Yugbiháh ke mashriq kí taraf ḍeroṉ meṉ rahte the gayá, aur us lashkar ko márá; kyúṉki wuh lashkar befikr paṛá thá.
12
Aur Zibah aur Zilmana‘ bháge, aur us ne un ká píchhá karke un donoṉ Midyání bádsháhoṉ Zibah aur Zilmana‘ ko pakaṛ liyá, aur sáre lashkar ko bhagá diyá.
13
Aur Yúás ká beṭá Jida‘ún Hars kí chaṛháí ke pás se jang se lauṭá.
14
Aur us ne Sukkátíoṉ meṉ se ek jawán ko pakaṛkar us se daryáft kiyá; so us ne use Sukkát ke sardároṉ aur buzurgoṉ ká hál batá diyá jo shumár meṉ sathattar the.
15
Tab wuh Sukkátíoṉ ke pás ákar kahne lagá, ki Zibah aur Zilmana‘ ko dekh lo, jin kí bábat tum ne tanzan mujh se kahá thá, Kyá Zibah aur Zilmana‘ ke háth tere qabze meṉ á gaye haiṉ, ki ham tere ádmíoṉ ko jo thak gaye haiṉ roṭiyáṉ deṉ?
16
Tab us ne shahr ke buzurgoṉ ko pakṛá, aur babúl aur sadá guláb ke káṉṭe lekar un se Sukkátíoṉ kí tádíb kí.
17
Aur us ne Fanúel ká burj ḍhákar us shahr ke logoṉ ko qatl kiyá.
18
Phir us ne Zibah aur Zilmana‘ se kahá, ki Wuh log jin ko tum ne Tabúr meṉ qatl kiyá kaise the? Unhoṉ ne jawáb diyá, Jaisá tú hai, waise hí wuh the. Un meṉ se har ek sháhzádoṉ kí mánind thá.
19
Tab us ne kahá, ki Wuh mere bháí, merí máṉ ke beṭe the: so Ḳhudáwand kí hayát kí qasam agar tum un ko jítá chhoṛte, to maiṉ bhí tum ko na mártá.
20
Phir us ne apne baṛe beṭe Yatar ko hukm kiyá, ki Uṭh, un ko qatl kar. Par us laṛke ne apní talwár na kheṉchí, kyúṉki use ḍar lagá, is liye ki wuh abhí laṛká hí thá.
21
Tab Zibah aur Zilmana‘ ne kahá, Tú áp uṭhkar ham par wár kar; kyúṉki jaisá ádmí hotá hai, waisí hí us kí táqat hotí hai. So Jida‘ún ne uṭhkar Zibah aur Zilmana‘ ko qatl kiyá, aur un ke úṉṭoṉ ke gale ke chandan hár le liye.
22
Tab baní Isráíl ne Jida‘ún se kahá, ki Tú ham par hukúmat kar, tú, aur terá beṭá, aur terá potá bhí; kyúṉki tú ne ham ko Midyáníoṉ ke háth se chhuṛáyá.
23
Tab Jida‘ún ne un se kahá, ki Na maiṉ tum par hukúmat karúṉ, aur na merá beṭá, balki Ḳhudáwand hí tum par hukúmat karegá.
24
Aur Jida‘ún ne un se kahá, ki Maiṉ tum se yih ‘arz kartá húṉ, ki tum meṉ se har shaḳhs apní lúṭ kí báliyáṉ mujhe de de. (Yih log Ismá‘ílí the, is liye un ke pás sone kí báliyáṉ thíṉ.)
25
Unhoṉ ne jawáb diyá, ki Ham in ko baṛí ḳhushí se deṉge. Pas unhoṉ ne ek chádar bichháí, aur har ek ne apní lúṭ kí báliyáṉ us par ḍál díṉ.
26
So wuh sone kí báliyáṉ jo us ne máṉgí thíṉ wazn meṉ ek hazár sát sau misqál thíṉ, ‘aláwa un chandan hároṉ aur jhumkoṉ aur Midyání bádsháhoṉ kí arg̣awání poshák ke jo wuh pahine the, aur un zanjíroṉ ke jo un ke úṉṭoṉ ke gale meṉ paṛí thíṉ.
27
Aur Jida‘ún ne un se ek afod banwáyá, aur use apne shahr ‘Ufrah meṉ rakkhá; aur waháṉ sab Isráílí us kí pairawí meṉ zinákárí karne lage, aur wuh Jida‘ún aur us ke gharáne ke liye phandá ṭhahrá.
28
Yúṉ Midyání baní Isráíl ke áge mag̣lúb húe, aur unhoṉ ne phir kabhí sir na uṭháyá. Aur Jida‘ún ke dinoṉ meṉ chálís baras tak us mulk meṉ amn rahá.
29
Aur Yúás ká beṭá Yarubba‘l jákar apne ghar meṉ rahne lagá.
30
Aur Jida‘ún ke sattar beṭe the jo us hí ke sulb se paidá húe the; kyúṉki us kí bahut sí bíwiyáṉ thíṉ.
31
Aur us kí ek haram ke bhí jo Sikm meṉ thí us se ek beṭá húá, aur us ne us ká nám Abímalik rakkhá.
32
Aur Yúás ke beṭe Jida‘ún ne ḳhúb ‘umrrasída hokar wafát páí, aur Abí‘azríoṉ ke ‘Ufrah meṉ apne báp Yúás kí qabr meṉ dafn húá.
33
Aur Jida‘ún ke marte hí baní Isráíl bargashta hokar Ba‘lím kí pairawí meṉ zinákárí karne lage, aur Ba‘l Barít ko apná ma‘búd baná liyá.
34
Aur baní Isráíl ne Ḳhudáwand apne Ḳhudá ko, jis ne un ko har taraf un ke dushmanoṉ ke háth se riháí dí thí, yád na rakkhá,
35
aur na wuh Yarubba‘l ya‘ní Jida‘ún ke ḳhándán ke sáth un sab nekíoṉ ke ‘iwaz meṉ jo us ne baní Isráíl se kí thíṉ, mihr se pesh áe.
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 9 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21