bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Judges 7
Judges 7
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 8 →
1
Tab Yarubba‘l, ya‘ní Jida‘ún, aur sab log jo us ke sáth the sawere hí uṭhe, aur Harod ke chashme ke pás ḍerá kiyá; aur Midyáníoṉ kí lashkargáh un ke shimál kí taraf koh i Morih ke muttasil wádí meṉ thí.
2
Tab Ḳhudáwand ne Jida‘ún se kahá, Tere sáth ke log itne ziyáda haiṉ, ki maiṉ Midyáníoṉ ko un ke háth meṉ nahíṉ kar saktá, aisá na ho, ki Isráílí mere sámne apne úpar faḳhr karke kahne lageṉ, ki Hamáre háth ne ham ko bacháyá.
3
So tú ab logoṉ meṉ suná sunákar manádí kar de, ki Jo koí tarsán aur hirásán ho, wuh lauṭkar koh i Jili‘ád se chalá jáe: chunáṉchi un logoṉ meṉ se báís hazár to lauṭ gaye, aur das hazár báqí rah gaye.
4
Tab Ḳhudáwand ne Jida‘ún se kahá, ki Log ab bhí ziyáda haiṉ; so tú un ko chashme ke pás níche le á, aur waháṉ maiṉ terí ḳhátir un ko ázmáúṉgá; aur aisá hogá, ki jis kí bábat maiṉ tujh se kahúṉ, ki Yih tere sáth jáe, wuhí tere sáth jáe; aur jis ke haqq meṉ maiṉ kahúṉ, ki Yih tere sáth na jáe, wuh na jáe.
5
So wuh un logoṉ ko chashme ke pás níche le gayá, aur Ḳhudáwand ne Jida‘ún se kahá, ki Jo jo apní zabán se pání chapaṛ chapaṛ karke kutte kí tarah piye, us ko alag rakh, aur waise hí har aise shaḳhs ko jo ghuṭne ṭekkar piye.
6
So jinhoṉ ne apná háth apne muṉh se lagákar chapaṛ chapaṛ karke piyá, wuh gintí meṉ tín sau mard the; aur báqí sab logoṉ ne ghuṭne ṭekkar pání piyá.
7
Tab Ḳhudáwand ne Jida‘ún se kahá, ki Maiṉ in tín sau ádmíoṉ ke wasíle se, jinhoṉ ne chapaṛ chapaṛ karke piyá, tum ko bacháúṉgá, aur Midyáníoṉ ko tere háth meṉ kar dúṉgá; aur báqí sab log apní apní jagah ko lauṭ jáeṉ.
8
Tab un logoṉ ne apná apná tosha aur narsingá apne apne háth meṉ liyá, aur us ne sab Isráílí mardoṉ ko un ke ḍeroṉ kí taraf rawána kar diyá, par un tín sau mardoṉ ko rakh liyá; aur Midyáníoṉ kí lashkargáh us ke níche wádí meṉ thí.
9
Aur usí rát Ḳhudáwand ne us se kahá, ki Uṭh, aur níche lashkargáh meṉ utar já; kyúṉki maiṉ ne use tere háth meṉ kar diyá hai.
10
Lekin agar tú níche játe ḍartá hai, to tú apne naukar Fúráh ke sáth lashkargáh meṉ utar já.
11
Aur tú sun legá, ki wuh kyá kah rahe haiṉ. Is ke ba‘d tujh ko himmat hogí, ki tú us lashkargáh meṉ utar jáe. Chunáṉchi wuh apne naukar Fúráh ko sáth lekar un sipáhíoṉ ke pás jo us lashkargáh ke kanáre the gayá.
12
Aur Midyání, aur ‘Amálíqí, aur ahl i mashriq kasrat se wádí ke bích ṭiḍḍiyoṉ kí mánind phaile paṛe the; aur un ke úṉṭ kasrat ke sabab se samundar ke kanáre kí ret kí mánind beshumár the.
13
Aur jab Jida‘ún pahuṉchá, to dekho, waháṉ ek shaḳhs apná ḳhwáb apne sáthí se bayán kartá húá kah rahá thá, Dekh, maiṉ ne ek ḳhwáb dekhá hai, ki jau kí ek roṭí Midyání lashkargáh meṉ girí aur luṛhaktí húí ḍere ke pás pahuṉchí, aur us se aisí ṭakráí ki wuh gir gayá, aur us ko aisá ulaṭ diyá, ki wuh ḍerá farsh ho gayá.
14
Tab us ke sáthí ne jawáb diyá, ki Yih Yúás ke beṭe Jida‘ún Isráílí mard kí talwár ke siwá âur kuchh nahíṉ: Ḳhudá ne Midyán ko aur sáre lashkar ko us ke háth meṉ kar diyá hai.
15
Jab Jida‘ún ne ḳhwáb ká mazmún aur us kí ta‘bír suní to sijda kiyá, aur Isráílí lashkar meṉ lauṭkar kahne lagá, Uṭho, kyúṉki Ḳhudáwand ne Midyání lashkar ko tumháre háth meṉ kar diyá hai.
16
Aur us ne un tín sau ádmíoṉ ke tín g̣ol kiye, aur un sabhoṉ ke háth meṉ ek ek narsingá aur us ke sáth ek ek ḳhálí ghaṛá diyá, aur har ghaṛe ke andar ek mash‘al thí.
17
Aur us ne un se kahá, ki Mujhe dekhte rahná, aur waisá hí karná; aur dekho, jab maiṉ lashkargáh ke kanáre já pahuṉchúṉ, to jo kuchh maiṉ karúṉ, tum bhí waisá hí karná.
18
Jab maiṉ aur wuh sab jo mere sáth haiṉ narsingá phúṉkeṉ, to tum bhí lashkargáh kí har taraf narsinge phúṉkná, aur lalkárná ki Yahowáh kí jai aur Jida‘ún kí jai.
19
So bích ke pahar ke shurú‘ meṉ jab naye pahrewále badle gaye, to Jida‘ún aur wuh sau ádmí jo us ke sáth the lashkargáh ke kanáre áe; aur unhoṉ ne narsinge phúṉke, aur un ghaṛoṉ ko jo un ke háth meṉ the toṛá.
20
Aur un tínoṉ g̣oloṉ ne narsinge phúṉke aur ghaṛe toṛe, aur mash‘aloṉ ko apne báeṉ háth meṉ, aur narsingoṉ ko phúṉkne ke liye apne dahine háth meṉ le liyá, aur chillá uṭhe, ki Yahowáh kí aur Jida‘ún kí talwár.
21
Aur yih sab ke sab lashkargáh ke chaugird apní apní jagah khaṛe ho gaye. Tab sárá lashkar dauṛne lagá, aur unhoṉ ne chillá chillákar un ko bhagáyá.
22
Aur unhoṉ ne tín sau narsingoṉ ko phúṉká, aur Ḳhudáwand ne har shaḳhs kí talwár us ke sáthí aur sab lashkar par chalwáí, aur sárá lashkar Sarírát kí taraf Bait Sittah tak aur Tabbát ke qaríb Abíl Mahúlah kí sarhadd tak bhágá.
23
Tab Isráílí mard Naftálí, aur Áshar, aur Munassí kí hudúd se jama‘ hokar nikle, aur Midyáníoṉ ká píchhá kiyá.
24
Aur Jida‘ún ne Ifráím ke tamám kohistání mulk meṉ qásid rawána kiye aur kahlá bhejá, ki Midyáníoṉ ke muqábale ko utar áo, aur un se pahle pahle daryá e Yardan ke gháṭoṉ par Bait Barah tak qábiz ho jáo. Tab sáre Ifráímí jama‘ hokar daryá e Yardan ke gháṭoṉ par Bait Barah tak qábiz ho gaye.
25
Aur unhoṉ ne Midyán ke do sardároṉ ‘Oreb aur Zaeb ko pakaṛ liyá aur ‘Oreb ko ‘Oreb kí chaṭán par, aur Zaeb ko Zaeb ke kolhú ke pás qatl kiyá; aur Midyáníoṉ ko ragedá; aur ‘Oreb aur Zaeb ke sir Yardan pár Jida‘ún ke pás le áe.
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 8 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21