Numbers 11

Zande

← Chapter 10 Jump to: Chapter 12 →

1Aborokidunakpakanahe, kinigumba gbegberẽpai ku tu Yekova yo; ho Yekova agi he ni, gako zinga ki rungudi; ga Yekova we ki kĩ dagba yo, ki riti bete gu rago arita ti digida bataya yo.

2Aboro ki kpari fu Mose; Mose ki kpari fu Yekova, we ki bisi.

3Si du i ayambu rimo gu ba ti ni re nga Tabera, bambiko yo ga Yekova we akĩ ni dagba yo.

4Gu kodikodi ngbatunga aboro nadu dagba yo ki tona ka kpi nyemu he ni kere he; awiri aYisaraere ki tona ka kpara berewe a, ki ya, “Ako, da nikafu pasio fu rani ani ri he?

5Ani tingidi pa atĩo, nga agu ra ani anari ra Ezipeta yo gbua, na akoforo, zuzuhe wa apaipai, na abaro, na amatangburu, na rukutu amatangburu fũ afú gbe;

6ono awere ome ti mbisimorani wa sa te; he ho be rani fuo kina gi manu ani angera fuo ho te re.”

7Ono manu adu wa zuzu rindikiwe, kpiaha adu bangirise wa kpia bedara.

8Aboro ki nindu kirikiri, ka adungura ha, ka sa ha ti ambia, watadu suka ha sangu yo ki niudi he rogo baba ime aakoro yo, ki nimeke rukutu akpokuta rogo ho; nziraha ki du ngbayo yo wa nzira ngamungamu nzeme.

9Ho ndomo aniti ni ku ri bataya yuru, manu ki niti a ku ri he.

10Mose ki gi kpe aboro i nikpari bataya yo dunduko na rikayo, aboro ni ba sa sa pa ngbadimo gayo abamburoko; ga Yekova zinga ki rungudi ni bakere he, Mose ki nierẽ aerã.

11Mose ki ya fu Yekova wẽ, “Tipagine mangi mo ga moyambu ti ni gbegberẽ were? Na tipagine mo aina nga pai ti ni fere ya, wa mo namoi gu mbusa nga ga agi aboro re dunduko ku rire?

12Mi navungu agi aboro dunduko re? Mi nakusi yo, ya mo fere wẽ, ‘Mo tindi yo ti ngbaduro, wa nambuti gude niaka gude ngbamai, ku rogo gu ringara mo azunga he fu abayo tipa ha?’

13Wari ka mi bi pasio ni ka fu he fu agi aboro dunduko re? Bambiko i nakpara fu kina re, niya, ‘Mo fú pasio fu rani, ani ri he.’

14Mi arengba nga ka tinda agi aboro re dunduko ni sa re te, bambiko rõi he arõa fere ki susi.

15Ono ka mo mangi were na mi, mo ími re aimo ni ba sa kindi, ka mi ngba bangiro, ka mi bi nga gi kerepai ya.”

16Yekova ki ya fu Mose, “Mo dungura akumba 70 nga ga aYisaraere abaakumba fere, nga agu yo ini mo yo ka du ni ga aboro abaakumba, na gayo abarukumbata yo; ki ye na yo koyo du bamburoko dungurati ni, i ki ru yo na mo a.

17Mi azórã ki ye ka fura na mo yo; mi adía bete gu toro du rogo ro yo, ki moi ko ku rogo yo yo; i atinda gu rõrõi sunge nga ga agi aboro re na mo, ka kina ro tindi nga ha ni sa ro ya.

18Mo yá fu aboro wẽ, ‘Oni kpára tironi ziazia ku gba, oni arí pasio; bambiko oni akpari ku tu Yekova yo niya, “Da nikafu pasio fu rani ani ri he? Bambiko si angba fu rani Ezipeta yo” Si du Yekova akafu pasio ti ni fu roni, oni niri he.

19Oni arí nga ha tipa uru sa te, tipa uru ue a te; tipa uru bisue a te, tipa uru bawe a te, tipa uru 20 a te;

20ono tipa diwi sa, daho fuõho ka gberã ni ngba õroni, oni ki sogo ho asoga; bambiko oni gindiga Yekova du dagba roni, ki kpari bara bangiriko, niya, “Tipagine ani akuru ti ni ringara Ezipeta yo?” ’ ”

21Ono Mose ki ya, “Agu aboro du mi dagba yo, i ni aborondue 600,000; mo aya, ‘Mi afú pasio fu yo, i ka ri tipa diwi sa!’

22Rimbasa akandoro na rimbasa abagara ka i imi ra fu yo, si rengbe na yo? I adúngura agu atĩo adungura du baime yo dunduko fu yo, ka rengbe na yo?”

23Yekova ki ya fu Mose, “Be Yekova ni guru he? Awere mo nikabi watadu gi pai nikada ti rengo, watadu si adá nga te.”

24Mose ki kuru ku zegi yo, ka gumba sangba Yekova fu aboro; ko ki dungura akumba 70 nga ga aboro abaakumba, ki moi yo kirikiri pati bamburoko.

25Yekova ki zorõ rogo dubo ka gumba pai fu ko, ki di oete gu toro naadu rogo ko yo, ki moi ko ku rogo agu abaakumba yo 70 re; ho toro anye ni ri yo, i ki nigumba pai wa anebi. Ono i amánga nga ha wo berewe te.

26Ono aboro anye ue bataya yo, rimo gu ko sa nangia Eredada, rimo gu kura ko ki ngia Medada, toro ki nye ri yo; i adu dagba agu yo yo i ake yo, ono i andu nga koyo du bamburoko ni te, i ki gumba pai wa anebi kina bataya yo.

27Paranga ki nizuba ni oto ka ora ka gumba ha fu Mose, ki ya. “Eredada na Medada nagumba pai wa anebi bataya yo.”

28Yosua wiri Nuna, ga Mose mounda, nga gu ko sa dagba gako siasia aboro yo, ki karaga ha ki ya, “Gi gbia nga Mose, mo zá yo.”

29Mose ki ya fu ko, “Mo nakpi yo akpi tipa gi pai? Ako, ka Mbori idi he ga Yekova aboro dunduko du ni anebi, Yekova ki moi gako toro ri yo!”

30Mose ki karaga tiko ku bataya yo, ko na ga aYisaraere abaakumba.

31Bakere yuge ki kuru yo du Yekova ni, ki ye na ambirigba yo du baime tikpo ni, ami ki niti ku pati bataya, tipa nduge rogo ra wa uru sa ku pavuru bataya ku bani, na nduge rogo ra wa uru sa ku pavuru bataya ku bani a, kirikiri pati bataya, baguta ra ki du wa bagiza mbiribe ue auru kpotosende.

32Aboro ki guari ku ari dunduko ni gu uru re, na yuru a, na rogo kura uru a wo, ka dungura ambirigba. Gu ni nanidungura ra ni umba ra ni anidungura ra wa aritere 3,690; i ki gbaragi ra dunduko tipa yo kirikiri pati bataya.

33Ho pasiora adu ni kina ngbayo yo, ka i ata ri nga ha ya, ga Yekova zinga ki rungudi Kuti aboro, Yekova ki imi agu yo ni bakere kaza gberãngbi.

34Si du i ayambu rimo gu ba re nga Kiburoto-atava, bambiko yo i akpisidi agu aboro ni nakpi nyemu he ni kere he.

35Aboro andu nunguro Kiburoto-atava ku Aserota yo; i ki nye Aserota yo.

← Chapter 10 Jump to: Chapter 12 →