Numbers 27

Zande

← Chapter 26 Jump to: Chapter 28 →

1Agu ade ki mbedi nga awiri Serofada, wiri Efere, Efere ki ngia wiri Girada, Girada ki ngia wiri Makira, Makira ki ngia wiri Manase, nga rika Manase wiri Yosefa. Rimo agu awiriko nangia ade du re: Mara, Noa, Ogura, Mireka, na Tirusa.

2I ki ye ku bara bangiri Mose, na ku bara bangiri Erazara boromotumo, ku bara bangiri abazogo na ku bara bangiri rimbasa aYisaraere dunduko ku ngbadimo bamburoko dungurati yo.

3I ki ya, “Barani akpi ngbakungba yo; ko adu nga dagba gu rika nadungura tiyo kuti Yekova rogo gu rika nangia ga Kora te, ono ko akpi kina tipa boro gako ingapai; ka awiriko adu nga ho ni akumbagude ya.

4Tipagine ka i di rimo barani ti ni dagba rikayo yo, bambiko akumbagude adu nga be ko te? Mo fú ũkumbo fu rani dagba awirina barani yo.”

5Mose ki ndu na gayo pai ku bara bangiri Yekova.

6Yekova ki ya fu Mose,

7“Agu awiri Serofada nga ade gumba rengo; mo afu ringara fu yo a dagba awirina bayo yo, agu ahe ka ngia ga bayo mo fú he fu yo.

8Mo ki gumba pai fu awiri aYisaraere, ki ya, ‘Ka boro kpi, ka awirini adu nga ho nga akumbagude ya, oni ki fu gani ringara fu kina gu wirini nga de.

9Ka wirini adu nga ho nga de ya, oni ki fu gani ringara tie fu awiribani.

10Ka awiribani adu nga ti ni ya, oni ki fu gani ringara fu awirina bani.

11Ka awirina bani adu nga ti ni ya, oni ki fu gani ringara fu mbembedi gumeni dagba gani rika, ni ki nidi he ni gam. Gi pai re adú ni rugapai fu awiri aYisaraere ripa sarangbanga a, a wa Yekova arugu Mose na ni.’ ”

12Yekova ki ya fu Mose, “Mo bíti ku ri gi bagangara yo re nga Abarima, ka bi gu ringara nga gu fu mi fu awiri aYisaraere.

13Ho mo ka bi he ni, mo agá koyo du atitaro ni, wa Arona unvuruamo aga tigako a,

14bambiko oni asa mungu kuti sangbare ngbakungba Zina yo, rago ga rimbasa aboro sakapai, ka sa re ziazia ku bangiriyo pati aime yo.” Si nangia agu aime nga Meriba du Kadesa yo ngbakungba Zina yo.

15Mo se ki ya fu Yekova,

16“Yekova, nga gu Mbori nga ga atoro aboro dunduko, ko yúgu gu boro nikadu ku ri rimbasa aboro,

17ka ndu ku bara bangiriyo, ki ye koyo du yo ni, nikangbe fu yo ku mbata yo, ki niyega na yo a; ka gu rimbasa nga ga Yekova yo dú nga wa agu akandoro adu nga babandara ti ra ya ya.” Yekova ki ya fu Mose,

18“Mo di Yosua wiri Nuna, nga gu kumba du toro rogo ko yo, ki moi bero ku riko;

19ki moi ko ku bara bangiri Erazara boromotumo, na ku bara bangiri rimbasa aboro dunduko, ki asia pa rugaapai fu ko ku bangiriyo.

20Mo ki moi bete ga irisa ku riko, ya rimbasa awiri aYisaraere nigí sangbako.

21Ko ki ru bara bangiri Erazara nga boromotumo, nga gu ko nikasana he tipa ko rogo ga Urima sarangbanga ku bara bangiri Yekova; i akúra kuti sangbako, i ki nirimi kuti sangbako a, ko na awiri aYisaraere dunduko, nga rimbasa dunduko a.”

22Mose ki mangi a wa Yekova arugu ko na ni; ko ki di Yosua, ki moi ko ko ru bara bangiri Erazara nga boromotumo, na bara bangiri rimbasa dunduko,

23ko ki moi abeko ku riko, ki rugu ko a wa Yekova agumba pa ha ku ngba Mose.

← Chapter 26 Jump to: Chapter 28 →