Numbers 32

Zande

← Chapter 31 Jump to: Chapter 33 →

1Were awiri Rubena na awiri Gada adu na bakere rimbasa zogozogo anya be yo ki susi. I abi ringara Yazera na ringara Girada ya gu ba re du ni ba tipa zogozogo anya.

2Awiri Gada na awiri Rubena ki ye ka fura na Mose, na Erazara boromotumo, na agu abazogo nga ga rimbasa, ki ya,

3“Atarota, na Dibona, na Yazera, na Nimera, na Esebona, na Erare, na Sebama, na Nebo, na Bone,

4nga gu ringara Yekova amangi he barangba rimbasa nga ga awiri aYisaraere, si du ni ringara tipa zogozogo anya, gamo amoyambu du na zogozogo anya be yo gbe.”

5I ki ya, “Ka ani ngba bangiro, mo fú gi ringara re fu gamo amoyambu ni gayo; ka mo ndú nga na ani ku mbiti Yaradene yo ya.”

6Mose ki ya fu awiri Gada na fu awiri Rubena, “Awirinaroni andú ka so vura, ho oni ka sunga ni kina erẽ tigaoni?

7Tipagine oni arungburasi kpoto awiri aYisaraere yo ti ni tipa ndu ku mbiti yo ku rogo gu ringara Yekova afu fu yo?

8Kina wo abaroni amangi, ni gu rago mi akedi yo Kadesa-baranea yo i ndu ka bi gu ringara re.

9Bambiko ho i andu ni ki da rogo gu ngboongboorago du Esekore yo, ki bi gu ringara re, i arungburasi kpoto awiri aYisaraere yo, ya ka i ndu nga ku rogo gu ringara nga gu Yekova afu fu yo ya.

10Ga Yekova zinga ki rungudi ni gu uru re, ko ki zunga he, ki ya,

11‘Ni rengo a nga boro sa dagba agu akumba nayega ringara Ezipeta yo, du garãyo tona ti 20 na ka ndu ku mbata yo nikabi gu ringara mi azunga he fu Abarayama tipa ha, na fu Yisaka, na fu Yakoba te, bambiko i apeka nga re na kpotoyo yo dunduko te;

12kina Kareba wiri Yefune boro Keneze, na Yosua wiri Nuna, bambiko i napeka Yekova na kpotoyo yo dunduko.’

13Ga Yekova zinga ki kĩ kuti awiri aYisaraere, ko ki mangi yo i nita ata koyo na kono ngbakungba yo tipa garã 40, daho rika ngbatungayo dunduko, nga agu yo namangi gbegberẽpai ku bangiri Yekova anyasi ni dũ.

14Oni ngére, oni du ku ba abaroni, zugazuga aboro ingapai, ka kiisa gu kere zinga kindi nga ga Yekova koyo du awiri aYisaraere ni!

15Bambiko ka oni sa tironi ku sa yo ti peka fuo ko, ko ambú yo kindi ku ngbakungba no; oni ki gbarasi agi aboro dunduko re.”

16I ki ye ki mbedi koyo du ko ni, ki ya, “Ani nikadua andugu akandoro erẽ tipa gaani zogozogo anya, na abaakporo tipa gaani rukutu yo,

17ono ani adú ni mbakadimbakadi tirani na aũvura ka ndu ku mbata yo fu awiri aYisaraere, daho ka ani da ni na yo ku rogo gayo ba. Gaani rukutu yo ki niraki rogo agu abaakporo ngapa, bambiko agu aboro naaraka rogo gu ringara re.

18Ani akáraga nga tirani ku kpurani no te ki da kina ho awiri aYisaraere ni ba sa sa ka roga gayo ringara ni.

19Bambiko ani adía nga ringara na yo ku mbiti Yaradene yo, na ku mbata yo te; bambiko gaani ringara ti ku be rani ku mbiti Yaradene ku uro no.”

20Mose ki ya fu yo, “Ka oni kpi nyemu ka manga gi pai re, ka oni úkadi aũvura ti roni ka ndu ku mbata yo fu Yekova ka so vura,

21aboro ni ba sa sa nga gaoni yo úkadi ũvura, ka si Yaradene ku barangba Yekova, daho ka ko dandi avurako ni barangba ko,

22gu ringara re ki du ni zogozogo ho ku bara bangiri Yekova; fuo gure oni ki karaga tironi tie, ka pai adú nga ku ri roni yo du Yekova ni ya, na yo du awiri aYisaraere ni a ya; gi ringara re ki ngia gaoni he ku bara bangiri Yekova.

23Ono ka oni amánga nga ha wo ya, oni ngére, oni mangi ingapai kuti Yekova; oni ki ini ni rengo ya gaoni ingapai amánga kina roni.

24Oni dúdua abaakporo tipa gaoni rukutu yo, na andugu tipa gaoni akandoro; ki mangi agu apai kuru ngbaroni yo.”

25Awiri Gada na awiri Rubena ki gumba pai fu Mose, ki ya, “Gamo amoyambu amánga a wa gaani gbia agumba ha.

26Gaani rukutu yo na adiarani, gaani rimbasa akandoro, na gaani zogozogo anya dunduko, anyé rogo agu abaakporo du Girada yo;

27ono gamo amoyambu nikasi ku mbiti yo, agu aboro ni ba sa sa ukadi aũvura tipa so vura, ku barangba Yekova ka so vura, wa gaani gbia agumba ha.”

28Mose ki rugu pai tipa yo fu Erazara boromotumo, na fu Yosua wiri Nuna, na fu agu yo nadu ku ri ga abayo akporo nga ga angbatunga awiri aYisaraere.

29Mose ki ya fu yo, “Ka awiri Gada na awiri Rubena súsi na oni ku mbiti Yaradene yo, agu aboro ni ba sa sa úkadi aũvura ka so vura, ku barangba Yekova, ringara ki du ni zogozogo ho barangba roni, si du oni ki fu gu ringara nga Girada fu yo ni gayo ukumbo.

30Ono ka i así nga na oni ku mbiti yo ni ukadiukadi yo na aũvura ya, i ki du na gayo aũkumbo kina ringara Kanana yo.”

31Awiri Gada na awiri Rubena ki karaga ha, ki ya, “Wa Yekova agumba ha fu gamo amoyambu, kina wo ani akamanga.

32Ani asi tigaani ku mbiti yo ni ukadiukadi tirani na aũvura ku barangba Yekova ku ringara Kanana yo, ono gaani ringara anye fu rani kina mbiti Yaradene no.”

33Mose ki fu he fu yo, fu awiri Gada na fu awiri Rubena, na fu bebere ngbatunga Manase wiri Yosefa, nga gu ngbi nga ga Siona nga bakindo aAmoro, na gu ngbi nga ga Ogo bakindo Basana, gaha ringara na gaha abaakporo na abangbandaha, nga kina agu abaakporo du rogo ho dunduko.

34Awiri Gada ki dua Dibona, na Atarota na Aroere,

35na Aturotasofana, na Yezera, na Yogeba,

36na Betenimera, na Betarana, nga abaakporo ngapa na andugu tipa akandoro.

37Awiri Rubena ki dua Esebona, na Erara, na Kiria-taima,

38na Nebo, na Bara-mona, ono i ki saki rimoho, na Sibema; i ki fuku kura rimo fu agu abaakporo nga gui adudua ha.

39Awiri Makira wiri Manase ki ndu ku Girada yo, ki di he, ki kusi agu aAmoro naadu yo.

40Mose ki fu Girada fu Makira wiri Manase, ko ki sungu yo.

41Yaira wiri Manase ki ndu ka dia gaha akporo, ki yambu rimoho nga Avota-yaira.

42Noba ki ndu ki di Kemata, na gaha akporo, ki yambu rimoho nga Noba, ti kina rimoko.

← Chapter 31 Jump to: Chapter 33 →