Numbers 12

Zande

← Chapter 11 Jump to: Chapter 13 →

1AMiriama na Arona ki tona gumba rimo Mose bambiko ko adi de Kusa ni diako, bambiko ko di de Kusa;

2i ki ya, “Yekova nafura na kina Mose tigu sa? Ko nafura nga na ani a wo te?” Yekova ki gi he.

3Were Mose angia bayee boro ni rengo, ki susi agu aboro nadu ri kpotosende no dunduko.

4Yekova ki gumba pai ni ba sa fu Mose, na fu Arona, na fu Miriama, ki ya, “Oni yé wa du oni biata ku bamburoko dungurati yo.” I biata ki ndu.

5Yekova ki zorõ rogo bakamikami dubo, ki ru pangbadimo bamburoko, ki yambu Arona na Miriama; i ue ki kuru.

6Ko ki ya, “Oni gí sangbare awere: Ka nebi du ho dagba roni yo, mi Yekova ka yugu tire fu ni tigimi rogo yuguyugupai yo, mi afúra na ni rogo musumo.

7Gi moyambu nga Mose ko wo te; ko du ni irarengo rogo gi kporo dunduko.

8Mi nafura na ko kina ku ngbako gbayaga, na rogo masaku yo a te; ko ki nibi kpia Yekova abi. Tipagine tie, oni agunde nga ti gumba pai ti ni kuti gi moyambu nga Mose ya?”

9Ga Yekova zinga ki rungudi kuti yo, ko ki guari;

10ho dubo aguari ni ri bamburoko; oni ngére, Miriama ki ngia kinaku ngbataka du, kpau wa kina moro gumba. Arona ki ngere ki bi Miriama, oni ngére, ri ki du nga kinaku ngbataka.

11Arona ki ya fu Mose, “Ako gi gbia, mi nakpara foro, ka mo mói nga ingapai ku ri rani wa mangi ani pai ni mungo kuti ro ya, na tipa gu pai ingi ani a ya.

12Mi nakpara foro, ka ri dú nga wa gu boro ni kpi akpi ya, nga gu ni pasioni nitona nyasa anyasa ho ni nikuru ni rukumbu nani yo.”

13Mose ki kpari fu Yekova, ki ya, “Ako Mbori, mi nazungadi ro, mo húsi ri.”

14Yekova ki ya fu Mose, “Ka bari asuku sure ku kpakpuri yo, ri adú nga na zee tipa uru saba te? I kísi ri ku gii bataya yo tipa rame saba, fuo gure i ki ye na ri berewe ku vuru bataya yo.”

15I ki kisi Miriama ku gii bataya yo tipa rame saba; ka aboro andu nga nunguro ya daho i arimisi Miriama ni berewe.

16Fuo gure aboro ki niguari Aserota yo ka ndu gayo nunguro, ki zi bataya rogo ngbakungba Parana yo.

← Chapter 11 Jump to: Chapter 13 →