Numbers 9

Zande

← Chapter 8 Jump to: Chapter 10 →

1Yekova ki gumba pai fu Mose ngbakungba Sinai yo, ti bambata diwi nga ga ue garã fuo kura yo ringara Ezipeta yo, ki ya,

2“Awiri aYisaraere ká kuti pa manga pumbo susiri ti gaha ringbisiringbisi rago.

3Ti 14 rame rogo gi diwi re, nyemu, oni ka amanga ha ti gaha ringbisiringbisi rago; kuti agu andika nga gaha, kuti agu arugute dunduko nga gaha, oni ka ka kuti ni.”

4Mose ki gumba pai fu awiri aYisaraere, ya i ka ka kuti pa manga pumbo susiri kindi.

5Si du i ki ka kuti pa manga pumbo susiri kindi ni bambata diwi, ti 14 rame nga ga gu diwi re nyemu ngbakungba Sinai yo; kuti agu apai dunduko Yekova arugu Mose na ni, wo awiri aYisaraere amangi.

6Ono akumba adu yo nadu ni birikobiriko yo be kpisida kangba boro, si du i arengba nga ka manga pumbo susiri ti gu uru te re; i ki ye ku bara bangiri Mose na ku bara bangiri Arona ti gu uru re;

7agu akumba re ki ya fu ko, “Ani bibiriko tigaani be kpisida kangba boro; tipagine ka ani ayé nga na gu gamunihe mbedisatise ti ni nga ga Yekova ti ringbisiringbisi rago dagba awiri aYisaraere yo ya?”

8Mose ki ya fu yo, “Oni súngu; mi gi sangba Yekova tipa roni.”

9Yekova ki ya fu Mose,

10“Mo gúmba ha fu awiri aYisaraere, ki ya, Ka ngia boro dagba roni watadu dagba atitaroni yo ka du ni birikobiriko ni be gu pai nga pa kpisida kangba boro, watadu du ngba tuturũ nunguro vurũ, ni mángi pumbo susiri kindi fu Yekova.

11Ti ue diwi ti 14 rameru i ka nimangi he nyemu; i aniri he na gu kpokuta adu nga na agbooro ti ni ya na hĩhĩ kpepasio.

12I ahe nga gu yangara ha ku wiso te, ka i akíta nga meme pasioho ya; i aká kuti agu arugute dunduko nga ga pumbo susiri.

13Ono gu boro du gigiri, ka ni andu nga nunguro ya, ki mbu pa manga pumbo susiri, i anikpara gu boro re akpara ku sa yo ti gani aboro, bambiko ni afu nga gamunihe mbedisatise nga ga Yekova ti ringbisiringbisi ragoho te; gu boro re animbu mbusa gani ingapai,

14Ono ka kungba boro asunga dagba roni, ki idi ka manga pumbo susiri fu Yekova, kuti gu rugute nga ga pumbo susiri, na kuti gu rugapai nga gaha, wo ni ka manga; rugute adu be roni kina sa, tipa kungba aboro na tipa awiri ringara.”

15Ti gu uru i adua banye dubo adadi banye adada, nga bamburoko nga ga dezirepai; nyemu si ki du ku ri banye wa kina we ki da ku wiso.

16Wo si adu dedede; dubo anidadi he uru, si ki nidu wa we yuru.

17Ho i anidi dubo ni ku ari yo ri bamburoko, fuo gure awiri aYisaraere ki nitona nunguro; ono rogo gu ba ho dubo aninye ni, yo awiri aYisaraere anizi bataya ni.

18Awiri aYisaraere anindu nunguro kina kuti sangba Yekova, i ki nizi bataya kina kuti sangba Yekova a; wa dubo aninye ri banye i ki nizi bataya ki ninye kina ho.

19Ho dubo aninye ni ku ri banye tipa dungu arame, awiri aYisaraere ki nika kuti sangba Yekova, ka i andu nga nunguro berewe ya.

20Ti kura rago dubo anidu ku ri banye tipa kina rame ngbutuko i ki ninye kina bataya yo kuti sangba Yekova, kuti sangba Yekova i ki nimo ka ndu gayo nunguro.

21Ono ti kura rago dubo aninye nyemu ki da ku wiso; ho i anidi dubo ni ku ari yo wiso, i ki nitona nunguro, watadu ka si nye kindi tipa uru sa na yuru sa, ho i anidi dubo ni ku ari yo, i ki nitona nunguro,

22Watadu si adu wa rame ue, watadu wa diwi sa, watadu wa garã sa, nga gu nye dubo na ni ku ri banye, ki nye anye ku ri he, awiri aYisaraere ki ninye kina bataya ho ka i andu nga nunguro berewe ya; ono ho i anidi he ni ku ari yo, i ki nitona nunguro.

23I anizi batava kina kuti sangba Yekova, i anandu nunguro a kina kuti sangba Yekova; i aka kuti sangba Yekova, ki nigi sangba ko a wa Yekova arugu Mose na ni.

← Chapter 8 Jump to: Chapter 10 →