Numbers 6

Zande

← Chapter 5 Jump to: Chapter 7 →

1Yekova ki ya fu Mose,

2“Mo gúmba pai fu awiri aYisaraere, ki ya fu yo, Ho kumba watadu de ka kido he ni, gu kidohe nga ga boro Nazara, ka kpara tini fu Yekova,

3ni akpára tini ti imekakue na buda baripiro; ni ambíra nga kakaĩ imekakue te, watadu gu ngbingbi buda nga ga baripiro erẽ aerã te, ni ambíra nga buda wa sa te, ni arí nga zamba bakakue watadu uguhe a te.

4Agu arame dunduko nga ga gani kparatise, ni arí nga agu ahe i amanga ha na rindi bakakue te, ni arí nga ndika zuzu bakakue na sisihe a te.

5“Agu arame kidohe dunduko nga ga gani kparatise ni akpé nga mangerini te; ni adú ziazia daho gu rago ka diga ni ni akpara tini ti ni fu Yekova; ni ambú mburu mangerini si sono ni gbanga ha.

6“Agu arame dunduko ni akpara tini ti ni fu Yekova ni ambéda nga na kangba boro te.

7Ni abírikosi nga tini tipa bani watadu tipa nani, tipa wiribani, watadu tipa dawirini, ho i nikpi ni te; bambiko gani kparatise fu Mbori si du ku ri ni.

8Rogo gani arame kparatise dunduko ni du ziazia fu Yekova.

9“Ka boro kpi pati boro Nazara wa ikpiragumba, ni ki birikosi pa gu pai nga ga kpara tini, ni ki kpe rini ni gu rago ni akagírisa tini; ti saba rame ni ka nikpe he.

10Ono ti muambi rame ni ki ye na agbungu ue, watadu ambipo ue, fu boromotumo, ku ngbadimo bamburoko dungurati yo,

11boromotumo anitumo na gu ru sa tipa ingapai, na gu kurai tipa zozo motumo, ki mangi pa dada ingapai fu ni, bambiko si nga gu ingapai mangi ni du tipa kangba boro. Ni ki kpara rini fu Yekova ti kina gu uru re,

12ki kpara gani arame nga arame kpara tini fu Yekova, ki ye na gu wiri kandoro nga bara du garãru sa tipa motumo tindika; ono gu bambata arame anidu gbua, bambiko gani kpara tini fu Yekova ima gberã.

13“Gere nga gu ndika du tipa boro Nazara, ho gani arame kparatise ka nidigi ni: i aniye na ni ku ngbadimo bamburoko dungurati yo,

14ni ki ye na gani gamunihe mbedisatise fu Yekova, nga wiri kandoro nga bara du garãru sa zanga serõ tipa zozo motumo, na wiri kandoro nga nara du garãru sa zanga serõ tipa motumo ingapai, na bakandoro sa zanga serõ tipa motumo zereda,

15na baga na gu kpokuta adu nga na agbooro ti ni ya, na rukutu zozo kpokuta na fufurũ ngungo, kodi yo ho na nzeme, na wiri ayaaya kpokuta adu nga na agbooro ti ni ya uka yo nzeme ku auru he na gaha motumo nga ga riahe, na gaha mbirimbiri amotumo.

16Boromotumo ki nimoi he bara bangiri Yekova, ki fu gani motumo ingapai, na gani zozo motumo,

17ono ni ki fu gu bakandoro tipa motumo zereda fu Yekova, du na gu baga du gu kpokuta rogo adu nga agbooro ti ni ya; boromotumo ki tumo na motumo riahe a, na gu mbirimbiri motumo a.

18Fuo gure boro Nazara ki kpe rini nga ga gani kparatise pangbadimo bamburoko dungurati yo, ki di gu mangeri nga ga kparatise, ki uka ha ku ri gu we du tii gu he yo ni afu ni motumo zereda.

19Boromotumo ki di gu pasipasi be bakandoro re, na zozo kpokuta sa baga yo adu nga agbooro ti ni ya, ki moi he ku ri be boro Nazara, fuo kpe ni rini nga ga gani kparatise,

20boromotumo ki wo ti ni ni wowoti motumo bara bangiri Yekova. Gere du ni kparakpara he tipa boromotumo wa sa na wowoti ngbadu nya na tumbatumba mbosoru. Fuo gure boro Nazara ki rengbe ka mbira imekakue.

21“Gere nga gu ndika du tipa boro Nazara nga gu ni nakido he. Gani gamunihe mbedisatise fu Yekova tipa gani kparatise, ku ri gu nga gu rengbe ni ka fu he, si adu kuti pa gani kidohe wa ni akido pa ha, si du ni ki nimangi pa gani kidohe wa du ndika nga ga gani kparatise ni boro Nazara.”

22Yekova ki ya fu Mose,

23“Mo gúmba pai fu Arona na fu awiriko, ki ya fu yo, Were oni ka nifu maku fu awiri aYisaraere; oni aniya fu yo wẽ,

24Yekova fú maku foro, ki banda ro:

25Kpakpu Yekova hási rago ku riro, ki niini pai foro:

26Yekova túmba kpakpuko ku riro, ki fu zereda foro.

27“Wo i ka maa rimore ku ri awiri aYisaraere; mi ki fu maku fu yo tigimi a.”

← Chapter 5 Jump to: Chapter 7 →