Numbers 22

Zande

← Chapter 21 Jump to: Chapter 23 →

1Awiri AYisaraere ki nindu gayo nunguro kindi, ki zi bataya rogo gu kpasakpasa arago du ringara Moaba yo mbiti Yaradene ku Yereo yo.

2Baraka wiri Sipora ki bi agu apai dunduko nga gu aYisaraere amangi fu aAmoro.

3Moaba ki nigunde be agu aboro re ki susi, bambiko i adu ni badungu aboro gbe; gunde awiri aYisaraere ki di be Moaba.

4Moaba ki ya fu abaakumba nga ga Midiana yo, “Awere agi aboro re nikarita agu ahe dunduko du pati rani, wa babagara narita nvuo banambu.” Baraka wiri Sipora nadu ni bakindo Moaba ti gu rago re,

5ko ki kedi asunge koyo du Birama ni wiri Beora ku Petora yo nadu pavuru Di, rogo gu ringara nangia ga wiri gako aboro, ka yamba ko, ki ya, “Mo ngére, aboro gu du no naye Ezipeta yo; i dadi kpakpu kpotosende adada du, i naraka pati re ku bani.

6Si du mi nakpara foro mo yé awere ka tiwa agi aboro re fere, mbiko i nyaki ki susi re; ka si du wa mi adía be yo, ani ki mangi yo, ki do yo ku sa yo rogo gi ringara re; bambiko mi ini he ya gu ni ka mo fu maku fu ni ni ima du na maku, na gu ni tiwa mo ni ni ima du ni tiwatiwa boro.”

7Ga Moaba abaakumba na ga Midiana abaakumba ki guari na mosoro tipa soroka be yo; i ki ye koyo du Birama ni, ki gumba sangba Baraka fu ko.

8Ko ki ya fu yo, “Oni rá erẽ ni gi yuru re, mi ayé na pai fu roni berewe, wa Yekova akagumba ha fere;” si du abazogo nga ga Moaba yo ki sungu na Birama.

9Mbori ki ye koyo du Birama ni, ki ya, “Agini aboro nga agi yo du na mo re?”

10Birama ki ya fu Mbori wẽ. “Baraka wiri Sipora, bakindo Moaba kedi asunge kono du mi ni, niya,

11‘Mo ngére, agu aboro naye Ezipeta yo, i dadi kpakpu kpotosende adada dũ; mo yé awere ka tiwa yo tere; ka si du wa ka mi rengbe ka so vura kuti yo, ki do yo ku sa yo’ ”

12Mbori ki ya fu Birama, “Ka mo ndú nga na yo ya; ka mo tiwa nga agu aboro re a ya, bambiko aboro maku nga yo.”

13Birama ki guari wiso, ki ya fu abazogo nga ga Baraka yo. “Oni gá ku rogo gaoni ringara; bambiko Yekova ka na gene be re ka mi ndú nga na oni ya.”

14Abazogo nga ga Moaba yo ki guari, i ki ndu koyo du Baraka ni, ki ya, “Birama ka aka ya ko ayé nga na ani te.”

15Baraka ki kedi kura abazogo berewe, nange ti agu yo nadu mbata du na irisa ki susi yo a.

16I ki ye koyo du Birama ni, ki ya fu ko, “Were Baraka nipoi nga wiri Sipora: ‘Mi nakpara foro, ka pai díngisa nga ro ti ye kono du mi ni wa sa ya;

17bambiko mi akíisa pa ro na bakere irisa, gu pai mo ka nigumba ha fere mi animangi he amanga; si du mi nakpara foro mo yé, ka tiwa agi aboro re fere.’ ”

18Ono Birama ki karaga ha ki ya fu ga Baraka amoyambu wẽ, “Ka Baraka vura kpi nyemu ka fu gako bambu fere hi ahi be feda na dahabu vurũ, mi arengba nga ka gu auru sangba Yekova gi Mbori te, ka manga pai toni watadu ki susi he te.

19Si du awere, mi nakpara fu roni, oni rá erẽ ni gi yuru re a, ya mi ini gu pai Yekova ka gumba ha fere ku ri gi pai re.”

20Mbori ki ye koyo du Birama ni yuru, ki ya fu ko. “Ka ngia agu akumba re niye ka yamba ro, mo gúari, ki ndu na yo; ono kina gu pai gumba mi he foro, kina ha mo ka manga.”

21Birama ki guari wiso, ki moi basunga ku ri gako nadongi, ki ndu na agu abazogo Moaba re.

22Ga Mbori zinga ki rungudi bambiko wa ko andu; ga Yekova maraika ki ru ni vura kuti ko ngba gu gene ko andu ngba ha. Ko ki nioro ri gako nadongi, na gako amoyambu ue nadu na ko.

23Nadongi ki bi ga Yekova maraika ko ru bangiri gene, na gako basape ko agbe beko na ni; nadongi ki kpara ku bani ti gene, ki merẽ ku rogo ati; Birama ki nari nadongi, ka sa ru kuti gene.

24Si du ga Yekova maraika ki da ru ngba umba gene dagba aati bakakue, kina ngapa ki du ku bani na ku bani a.

25Ho nadongi abi ga Yekova maraika ni, u ki gbia tiru kuti vuro ngapa, ki gbingbida ndu Birama kuti vuroho; ko ki nari ru berewe.

26Ga Yekova maraika ki ndu ku mbata yo, ki ru rogo fitikiri rago, yo gene adu nga ni ba satise ku kumbabe na ku gare a ya.

27Ho nadongi abi ga Yekova maraika ni berewe, u ki nipi api ku sande tii Birama; ga Birama zinga ki rungudi arunguda, ko ki nari nadongi na gako ngau.

28Yekova ki za ngba nadongi, u ki ya fu Birama wẽ. “Gini pai mangi mi kuti ro, mo nanaki re ti ni, bara biata ha du re?”

29Birama ki ya fu nadongi, “Bambiko mo nawia re awia. Ako ka basape nidu bere, ka mi imi ro awere.”

30Nadongi ki ya fu Birama, “A nga ga nadongi nga mi te, mo naora auru re wa du mo ni ungaro dati gi uru te re? Mi amangi pai mbata wo foro?” Ko ki ya, “Oó.”

31Si du Yekova ki za bangiri Birama, ko ki bi ga Yekova maraika ko ru bangiri gene, ko na gako basape ko nagbe beko na ni; ko ki zogo riko, ki ti ni kpakpuko.

32Ga Yekova maraika ki ya fu ko, “Tipagine naki mo ga nadongi ti ni bara biata? Mo ngére, ye mi sa ro ni vura, bambiko ga pai sa tihe wa kango bangire;

33ono nadongi nibi re, ki aria tiru bara bangire wa bara biata. Ka u nasa nga tiru ku bani ti re ya, ni rengo ka mi imi ro kina awere, ki mbu ru tigau ni ungaru.”

34Birama ki ya fu ga Yekova maraika, “Mi mangi ingapai, bambiko mi naina nga ha nga mo gu ru gene ni zinga kuti re te. Si du awere tie, ka si gberẽ ti ro, mi nikakaraga tire kina ku sa yo berewe.”

35Ga Yekova maraika ki ya fu Birama, “Mo ndú andu na agu akumba re; ono kina gu pai mi ka gumba foro, mo ki gumba kina ha.” Si du Birama ki nindu kindi na ga Baraka abazogo.

36Ho Baraka agi he ni ya Birama ye, ko ki ndu ka ngbisa ko rogo gu bakporo nga ga Moaba, nadu ti gu bangbanda rago du ti Arunona, du pavuru rago naturũ aturã gbe ti bangbanda kporo.

37Baraka ki ya fu Birama, “Mi akeda nga asunge kakaka ka yamba ro te? Tipagine mo aye nga ti ni kono du mi ni ya? Mi arengba nga ni rengo ka kiisa pa ro sa irisa te?”

38Birama ki ya fu Baraka, “Mo ngére, mi naye kono du mo ni! Tandu ti re awere ka gumba wiri pai? Gu pai nga gu Mbori namaa ku ngbare, kina ha mi agúmba.”

39Birama ki niga na Baraka, i ki ye ku Kiriata-uzota yo.

40Baraka ki tumo ni abaabagara na akandoro, ki kedi bete ra fu Birama, na fu agu abazogo nadu na ko.

41Si ki ta du wa gere fuo girarago, Baraka adi Birama, ki ndu na ko ku ri Bamota-bara yo, yo ko abi digida tuturũ angbi ni nga ga agu aboro.

← Chapter 21 Jump to: Chapter 23 →