Numbers 8

Zande

← Chapter 7 Jump to: Chapter 9 →

1Yekova ki ya fu Mose,

2“Mo gúmba pai fu Arona, ki ya fu ko, Ho mo ka nitigi awe ni, agu awe saba re nikahasa rago ku barangba baduawe.”

3Arona ki mangi he wo; ko ki tigi awe si nihasi rago ku barangba baduawe, a wa Yekova arugu Mose na ni.

4Gere nangia gu mbakada sunge nga ga baduawe du ni tata dahabu; tona ti mburuhe ki da ku ti gu mbumbuda ha, si adu ni tata dahabu; kuti gu kpiaha Yekova ayugu he fu Mose, wo ko amangi baduawe.

5Yekova ki ya fu Mose,

6“Mo rogo aRevi dagba awiri aYisaraere yo, ki girisi yo.

7Were mo ka manga yo ka girisa yo: mo migidi yo na ime girisatise be gbegberẽpai, i ki kpe mange kpoto yo dunduko ni musa, i ki zundu gayo aroko, ki girisi tiyo.

8Fuo gure i ki di paranga babagara, na gau motumo riahe, nga fufurũ ngungo ni kodikodi he na nzeme, mo adía kura paranga babagara tipa motumo ingapai.

9Mo ki kusi aRevi ku barangba bamburoko dungurati, ki dungura gu gbuu nga ga awiri aYisaraere dunduko.

10Mo ki kusi aRevi ku bara bangiri Yekova, awiri aYisaraere ki moi beyo ku ri aRevi,

11Arona ki fu aRevi ni wowoti motumo ku bara bangiri Yekova tipa awiri aYisaraere, ya i du tipa manga pa Yekova.

12ARevi ki nimoi beyo ku ri agu abaabagara; mo ki fu gu ru sa tipa motumo ingapai, na gu kurai tipa zozo motumo fu Yekova, ka manga pa dada ingapai tipa aRevi.

13Mo ki moi aRevi ku barangba Arona, na ku barangba awiriko, ka fu yo ni wowoti motumo fu Yekova.

14“Were mo ka kpara aRevi dagba awiri aYisaraere yo, aRevi ki du ni gimi yo.

15Fuo gure aRevi nikanindu ka manga sunge nga ga bamburoko dungurati, ho mo anigirisi yo ni ki fu yo ni wowoti motumo.

16Bambiko i dunduko ni fufu yo fere dagba awiri aYisaraere yo; ku ba agu yo dunduko ninaza rukumbu, nga gu bambata vungu a nga ga awiri aYisaraere dunduko, i rogo mi yo ni gimi yo.

17Bambiko bambata avungu dunduko nga ga awiri aYisaraere nga gimi, nga ga aboro na ga anya a; ni gu rago mi aimi bambata avungu dunduko ringara Ezipeta yo mi akpara yo ziazia tipa re.

18Ono mi rogo aRevi ku ba bambata vungu dunduko dagba awiri aYisaraere yo.

19Mi fu aRevi fu Arona wa gamahe na fu awiriko dagba awiri aYisaraere yo, i nimangi sunge tipa awiri aYisaraere ku bamburoko dungurati yo, na ka manga pa dada ingapai tipa awiri aYisaraere, ka kaza gberãngbi ti nga ku dagba awiri aYisaraere ya, ni gu rago ka awiri aYisaraere ye ni mbembedi ku pati kparakpara ziazia ba.”

20Were Mose amangi, na Arona, na gu rimbasa dunduko nga ga awiri aYisaraere, fu aRevi; kuti gu pai Yekova arugu Mose na ni dunduko tipa aRevi, wo awiri aYisaraere amangi he fu yo.

21ARevi ki girisi tiyo ti ingapai, ki zundu gayo aroko; Arona ki fu yo ni wowoti motumo tipa yo bara bangiri Yekova, Arona ki mangi pa dada ingapai tipa yo ka girisa yo.

22Fuo gure aRevi ki rimi ku dimoyo tipa manga gayo sunge bamburoko dungurati yo fuo Arona, na fuo awiriko; wa Yekova arugu Mose tipa aRevi, wo i amangi he fu yo.

23Yekova ki ya fu Mose,

24“Gere nga gu pai dũ tipa aRevi: tona ti du garãyo 25 na ka ndu ku mbata yo i nikaamanga pa gu sunge du bamburoko dungurati yo;

25ho garãyo ka du ni 50 i ki mbu manga sunge, ka i amánga nga sunge berewe ya,

26ono i amánga kina pa unda awirinayo bamburoko dungurati yo, ki nirugu pa ha, ka i amánga nga sunge ya. Were mo ka manga fu aRevi tipa ruga pa gayo asunge.”

← Chapter 7 Jump to: Chapter 9 →