Numbers 31

Zande

← Chapter 30 Jump to: Chapter 32 →

1Yekova ki ya fu Mose,

2“Mo íribapeawiri aYisaraere ti aMidiano; fuo gure mo ki ga koyo du atitaro ni.”

3Mose ki ya fu aboro, “Oni fú auvura fu akumba dagba roni tipa sovura, ya i ndu sa aMidiano, ka sara ngbanga ga Yekova irabape kuti aMidiano.

4Angbatunga aYisaraere ni ba sa sa afú aboro wa 1,000, oni ki kedi yo sa so vura.”

5Si du i ki kusi aboro 1,000 ni ga ngbatunga ni ba sa sa, dagba agu akutu nga ga awiri aYisaraere, wa aboro 12,000 na aũvura beyo tipa so vura.

6Mose ki kedi yo sa vura, aboro 1,000 ni ga ngbatungayo ni ba sa sa, i na Finasa wiri Erazara nga boromotumo, na aũsunge nga ga kparakpara ziazia ba ku beko na ambanya tipa fugapai.

7I ki so vura kuti aMidiano, wa Yekova arugu Mose na ni, ki imi akumba dunduko.

8I ki imi abakindo nga ga aMidiano yo na agu yo, na agu abakindo bisue nga ga aMidiano yo, nga Evi, na Rekeme, na Sura, na Uru na Reba. I ki imi Birama a nga wiri Beora ni basape.

9Awiri aYisaraere ki zi ade nga ga aMidiano yo na rukutu awiriyo a; na gayo zogozogo anya dunduko, gayo rimbasa akandoro dunduko, na gayo ahe dunduko, i arogo ho ni zizi ahe.

10I ki zokodi gayo abaakporo dunduko rogo agu aba i araka rogo ho, na gayo abataya vura dunduko,

11i ki rogo gbugbu ahe dunduko, na zizi ahe dunduko, aboro na anya a.

12I ki yega na zizi aboro, na zizi ahe, na gbugbu ahe, fu Mose na fu Erazara boromotumo, na fu rimbasa awiri aYisaraere, ku bataya yo nadu rogo kpasakpasa arago du ringara Moaba yo, nga gu nadu pangba Yaradene ku Yereo yo.

13Mose na Erazara boromotumo, na abazogo nga ga rimbasa yo dunduko, i ki ndu ka gbia yo gii bataya yo.

14Ono Mose adu na zinga fu siasia akumba du ku ri rimbasa aborosovura yo, na abairarivura nga ga akutu yo na abairarivura nga ga akama yo, nayega ti sunge sovura yo.

15Mose ki ya fu yo, “Oni batasi ade ni ungayo dunduko?

16Oni ngere, agi yo re mangi awiri aYisaraere, bambiko gu rugahe nga ga Birama, ka ti ga Yekova ndika rogo gu pai nga ga Peoro, si du kaza gberãngbi aye ti ni ku dagba ga Yekova rimbasa.

17Si du awere oni ími akumbagude ni ba sa sa dagba gu rukutu yo, ki imi agu ade ni ba sa sa ini pa akumba.

18Ono agu agude nga ade, nga agu yo aina nga pa akumba ya, oni bánda yo ni ungayo tipa roni.

19Oni ki zi bataya kina zegi gii bataya yo tipa rame saba; gu ni naimi boro, na gu ni zadi kangba, oni girisi tironi ti biata uru na ti saba uru, oni na gaoni zizi yo.

20Oni ki gírisi aroko ni ba sa sa, na gu ahe i amangi rogo kpoto nya, na agu ahe dunduko i amangi rogo mange meme, na agu ahe dunduko i amangi rogo ngua.”

21Erazara nga boromotumo ki ya fu abasovura nga agu yo nandu sa vura: “Gere nga gu rugapai nga ga rugute nga gu Yekova arugu Mose na ni:

22ono kina dahabu, na feda, na sirigi, na marã, na kpano, na dongo,

23nga agu ahe nanye be we, oni amánga ha si kuru rogo we, si nikadu gigiri. Ono i agírisa ha na ime kparatise a; ono agu ahe dunduko ka we arita nga ha ya, oni ki moi he ku rogo ime kparatise ki kusi he yo.

24Oni azúnda gaoni aroko ti saba uru, oni ki du gigiri; fuo gure oni nikarima ku bataya yo.”

25Yekova ki ya fu Mose,

26“Mo gédi bange zizi ahe nga gu i arogo, aboro na zogozogo anya, mo na Erazara nga boromotumo, na agu yo du ku ri ga abayo kporo nga ga rimbasa yo;

27ki kparaka zizi ahe ku rogo ho ue, dagba abaini pa sovura, nga agu yo nandu ka so vura, na rimbasa dunduko.

28Mo ki dungura rũhe fu Yekova be abasovura nandu ka so vura, sa dagba 500, nga ga aboro, ga zogozogo anya, ga adongi, na dagba ga rimbasa anya a;

29mo rógo ho bebere gu ki fu he fu Erazara nga boro motumo tipa ga Yekova tumbatumba gamahe.

30Ga awiri aYisaraere ki ngia gu kura bebere he, mo ki rogo sa dagba bisue rogo ho, nga aboro na abaabagara, na adongi, na rimbasa akandoro, na zogozogo anya, ki fu ra fu aRevi, nga agu yo naruga pa ga Yekova banye.”

31AMose na Erazara nga boromotumo ki mangi wa Yekova arugu Mose na ni.

32Were gu zizi ahe nanye ku ri agu ahe abasovura azi he adu wa akandoro 675,000,

33zogozogo anya wa 72,000,

34adongi wa 61,000

35na aboro wa 32,000 dunduko, nga agu ade naina nga pa akumba ya.

36Na gu bebere he, nga ga bete ga agu yo nandu ka so vura, gedigedihe adu wa akandoro 337,500,

37ono ga Yekova ruhe adu wa akandoro 675.

38Zogozogo anya ki du wa 36,000; ga Yekova ruhe adu dagba ra yo wa 72.

39Adongi ki du wa 30,500; ga ga Yekova rũhe adu dagba ra yo wa 61.

40Aboro ki du wa 16,000; ga Yekova rũhe adu dagba yo yo wa aboro 32.

41Mose ki fu gu rũrũhe nga ga Yekova fu Erazara nga boromotumo tipa tumbatumba gamahe, wa Yekova arugu Mose na ni.

42Na gu bebere he nga ga awiri aYisaraere, nga gu Mose akpara ha ti gu nga ga agu aboro nandu ka so vura―

43gu bebere he nangia ga rimbasa adu wa akandoro 337,500,

44na zogozogo anya wa 36,000,

45adongi wa 30,500,

46aboro ki du wa 16,000―

47Mose ki di sa dagba 50 a, dagba ga awiri aYisaraere bebere he, aboro na zogozogo anya a, ki fu he fu aRevi, nga agu yo naruga pa banda pa ga Yekova banye; a wa Yekova arugu Mose na ni.

48Gu siasia akumba nga agu yo nadu ku ri rimbasa aborosovura wa akutu, na abairarivura nga ga akutu yo, na abairarivura nga ga akama yo, i ki ye ki mbedi na Mose,

49ki ya fu Mose, “Gamo amoyambu gedi bange abasovura nga agu yo du tii be rani, a nga boro sa kpa te.

50Ani ki ye na ga Yekova gamunihe mbedisatise a, nga gu aboro ni ba sa sa abi he, nga afongo dahabu, azogbo ku ndue yo, na abenge, atongo wirinzaga, na afongo tue, na kura afongo, ka manga pa dada ingapai tipa rani ku bara bangiri Yekova a.”

51AMose na Erazara nga boromotumo ki rogo daha bu beyo, na mangimangi afongo a dunduko.

52Agu adahabu dunduko nga ga tumbatumba gamahe nga gu i afu he fu Yekova, nga ga abairarivura nga ga akutu, na ga abairarivura nga ga akama, barõa asekerehe adu wa akiro 275.

53Bambiko abasovura arogo zizi ahe, aboro ni ba sa sa ki nirogo kina gayo.

54AMose na Erazara nga boromotumo ki rogo dahabu nga ga abairarivura nga ga akutu yo na ga akama yo, ki ye na ni ku bamburoko dungurati yo, tipa tingidapai tipa awiri aYisaraere ku bara bangiri Yekova.

← Chapter 30 Jump to: Chapter 32 →