Numbers 23

Zande

← Chapter 22 Jump to: Chapter 24 →

1Birama ki ya fu Baraka. “Mo dúa abamotumo fere erẽ saba, ki mbakadi abaabagara saba na abaakandoro fere saba.”

2Baraka ki mangi wa Birama agumba ha; aBaraka na Birama ki tumo na babagara sa na bakandoro sa ri agu abamotumo dunduko re ni ba sa sa.

3Birama ki ya fu Baraka, “Mo rú pati ga zozo motumo, mi naga; isoke Yekova ka ye ka gbia re; gu pai ko ka yugo ho fere mi agúmba ha foro.” Ko ki dakpa ku ri tumbatumba rago yo, yo adu nga he ni ya.

4Mbori ki gbia Birama; Birama ki ya fu ko. “Mi mbakadi abamotumo saba, mi ki tumo na babagara sa na bakandoro sa ri abamotumo ni ba sa sa dunduko.”

5Yekova ki moi pai ku ngba Birama, ki ya, “Mo káraga tiro koyo du Baraka ni, mo ayá fu ko were.”

6Birama ki karaga tiko koyo du Baraka ni, mo ngére, ko ki ru pati gako zozo motumo, ko, na abazogo Moaba dunduko.

7Birama ki gumba gako sanza, niya, “Arama yo Baraka aye na mi ni, bakindo Moaba ri abaagangara uroyo: ‘Mo yé, ka tiwa Yakoba fere, Mo yé ka zinga kuti Yisaraere!’

8Waĩ ka mi tiwa agu yo Yekova atiwa nga yo ya? Na waĩ ka mi zingi kuti agu yo Yekova azinga nga kuti yo ya?

9Bambiko ri mbia yo mi bi aYisa raere, ri abaagangara yo bi mi yo ni; mo ngére, i nga aboro naraka ni sa yo, i agéda nga yo ku dagba arikaaboro yo te!

10Da ka gedi gu nvutu nga ga Yakoba, watadu geda gu biama papara aboro nga ga aYisaraere? Mo mbú re mi kpi gu kpio nga ga ruru boro, digida gi pai dú wa kina gako!”

11Ono Baraka ki ya fu Birama, “Gini pai mangi mo fere? Mi ayambu ro mo tiwa avurare, mo ngére, ono mo fu kina maku fu yo dũ.”

12Ko ki karaga ha ki ya, “Ka mi ka nga kuti gumba gu pai Yekova amaa ku ngbare, te?”

13Baraka ki ya fu ko, “Mi nakpara foro, mo yé, ani ndu na mo ku rogo kura ba, yo mo ka bi yo ni; mo abí yo ono kina bete papara yo tuturũ; ka mo abí nga yo dunduko ya; mo ki tiwa yo fere kina yo.”

14Ko ki ndu na ko ku rogo ga Sofima ati yo, ku ri Pisega yo, ki dua abamotumo yo saba, ki tumo na babagara sa na bakandoro a sa ku ri abamotumo ni ba sa sa dunduko.

15Birama ki ya fu Baraka, “Mo rú erẽ pati ga zozo motumo, ho mi ka gbia Yekova ni yore.”

16Yekova ki gbia Birama, ki moi pai ngbako, ki ya, “Mo káraga tiro koyo du Baraka ni, mo ayá fu ko were.”

17Birama ki ye koyo du Baraka ni, mo ngére, ko ki ru kina pati gako zozo motumo, na abazogo Moaba na ko. Baraka ki ya fu ko, “Gini pai gumba Yekova?”

18Birama ki gumba gako sanza, niya, “Baraka, mo gúari ku ari Ka gia pai; mo wiri Sipora, mo dége turo kono du mi ni:

19Mbori wa boro te, ka gumba zire, watadu wa wiri boro a te, ka sa gako berã. Gu pai gumba ko, ko amánga nga ha te? Watadu ko agumba pai, ko adígisa nga ha te?

20Mo ngére, i arugu re mi fu maku: ko fu maku, mi arengba nga ka sa ha te.

21Ko abi nga irairapai ti Yakoba te; ko abi nga fudifudipai ti aYisaraere a te. Yekova nga gayo Mbori du na yo, fugo bakindo du dagba yo.

22Mbori kusi yo ringara Ezipeta yo; ome ti ko du wa kina ome gbẽe.

23I aondoga nga Yakoba te, i asoroka nga kuti awiri aYisaraere a te, i ka ya ti Yakoba na ti aYisaraere awere, ‘Mbori mangi pai ni rengo!’

24Mo ngére, aboro guari ku ari wa kina nabahu! wa babahu wo i natumba tiyo ku ari; u api nga te daho u akari gau zizihe ni; ki mbiri kure gu he u niimi.”

25Baraka ki ya fu Birama, “Ka mo tíwa nga yo wa sa ya, ka mo fú nga maku fu yo a ya.”

26Ono Birama ki karaga ha ki ya fu Baraka. “Mi nagumba nga ha foro te, niya. ‘Agu apai dunduko Yekova nagumba, kina ha mi ka manga ha,’ te?”

27Baraka ki ya fu Birama. “Mo yé awere, mi ndú na mo ku rogo kura ba; isoke yo si ka ngba ti Mbori ni mo tiwa yo fere.”

28Baraka ki ndu na Birama ku ri Peoro yo, nga gu nangera ku ngbi ngume yo.

29Birama ki ya fu Baraka wẽ, “Mo dua abamotumo saba fere erẽ, ki mbakadi abaabagara saba na abaakandoro saba fere.”

30Baraka ki mangi wa Birama agumba ha, ki tumo na babagara sa na bakandoro a sa ri abamotumo ni ba sa sa dunduko.

← Chapter 22 Jump to: Chapter 24 →