Numbers 20

Zande

← Chapter 19 Jump to: Chapter 21 →

1Awiri aYisaraere ki ye ku ngbakungba Zina yo rogo bambata diwi, wa gayo rimbasa adu dunduko, aboro ki nye Kadesa yo; Miriama ki kpi yo, i ki kpisidi ri kina yo.

2Ime adu nga yo tipa rimbasa te; i ki vo gbuu yo wa sa kuti Mose na kuti Arona.

3Aboro ki nidari kangu na Mose, ki ya, “Ako, ka Mbori aidi he ani kpiki ho awirinarani akpiki ni bara bangiri Yekova!

4Tipagine oni aye na gi gbuu nga ga Yekova ti ni re ku ngbakungba no, ya ani kpiki no, ani na gaani rimbasa anya?

5Tipagine oni akusi rani ti ni ba rani Ezipeta yo, ka ye na ani ku rogo gi gbegberẽ ba re? Ba tunga ahe nga ha te, watadu sende rũ vurumo a te, watadu bakakue, watadu zuzu ngua wa ndavu a te; ime ho tipa mbira ha a te.”

6AMose na Arona ki ndu ku bangiri gbuu ku ngbadimo bamburoko dungurati yo, ki ti ku sande ni kpakpuyo. Ga Yekova taarimo ki kuru fu yo,

7Yekova ki ya fu Mose,

8“Mo dí gu ngbondo re, mo ki dungura rimbasa, mo na Arona nga unvuruamo, ki gumba pai fu mbia ku bangiriyo dũ, si fu ime; mo ki kusi ime fu yo nga gu nakura ti mbia; si du mo ka fu ime ti ni fu rimbasa i mbiri he na fu gayo anya a.”

9Mose ki di gu ngbondo re nidu bara bangiri Yekova, a wa ko arugu ko na ni.

10AMose na Arona ki dungura gbuu wa sa ku barangba mbia, ko ki ya fu yo, “Oni gí he awere, oni airasamungu; ani kusi ime fu roni ti gi mbia re?”

11Mose ki tumba beko ku ari, ki nari mbia na ngbondo bara ue; ime ki gbadi kpaima, rimbasa ki mbiri he, na gayo rimbasa anya a.

12Yekova ki ya fu Mose na Arona, “Bambiko wa oni aida nga pa re ya, ka kpara re ziazia ku bangiri awiri aYisaraere ya, si du oni ayé nga na gi gbuu re ku rogo gu ringara nga gu mi afu fu yo te.”

13Gere nga agu aime nga ime Meriba; bambiko awiri aYisaraere adari kangu na Yekova yo, ko ki yugu tiko ni kparakpara ko fu yo.

14Mose ki kedi asunge Kadesa yo koyo du gu bakindo ni nangia ga Edome ko, “Were poi wirinamo nga Yisaraere: Mo aima ina gu mbusa mangi rani dunduko:

15pa ndu abarani ku Ezipeta yo, ani ki raki ku ringara Ezipeta yo tipa gbanga rago; aEzipeto ki nimangi rani gbegberẽ, na abarani;

16ho ani akpari ni fu Yekova, ko ki gi fugorani, ki kedi maraika, ki kusi rani ringara Ezipeta yo; ani du kina Kadesa no, nga gu bakporo du kina ti bangbanda ga ringara.

17Mi nakpara foro, mo mbú rani ani susi rogo ga ringara. Ani asusa nga rogo ati watadu rogo ati bakakue te, ani ambíra nga gamo aguga a te; ani andú kina ngba ga Bakindo Bagene, ani asá nga tirani ku kumbabe na ku garebe yo a te, daho ani ka susa ga bangbanda ringara ni.”

18Ono Edome ki ya fu ko, “Oni asúsa nga rogo gi rago te, mi ka ye sa roni na basape.”

19Awiri aYisaraere ki ya fu ko. “Ani andú ngba kina bagene; ka ani mbíri ga ime, ani na gaani rimbasa anya, ani afú marã tipa ha; mo mbú kina rani ani susi ho ni ndurani, zanga manga wiri pai berewe.”

20Ono ko ki ya. “Oni asúsa nga ho te.” Edome ki ye kuti yo na kina badungu aboro, na nyanyaki beko.

21Were Edome aka ya ko afu nga gene fu awiri aYisaraere rogo gako bangbanda ringara te; si du awiri aYisaraere ki aria tiyo ku bani.

22I ki ndu gayo nunguro ngba gene Kadesa yo, awiri aYisaraere, nga kina rimbasa dungurati dunduko a, ki ye ku Bagangara Oro yo.

23Yekova ki poi fu Mose na fu Arona Bagangara Oro yo, ti bangbanda ringara Edome, ki ya,

24“Arona nikaga koyo du atitako ni; bambiko ko aríma nga ku rogo gu ringara nga gu mi afu fu awiri aYisaraere te, bambiko oni asa mungu kuti gi pat pati aime Meriba yo.

25Mo rogo Arona na Erazara nga wiriko, ki ye na yo ku ri Bagangara Oro no;

26mo ki uru ga Arona aroko ti ko, ki ukadi Erazara na ni nga wiriko; Arona ki ga koyo du atitako ni, yo ko ka kpi ni.”

27Mose ki mangi wa Yekova arugu ko na ni; i ki ndu ku ri Bagangara Oro yo ku bangiri rimbasa du.

28Mose ki uru ga Arona aroko ti ko, ki ukadi Erazara na ni nga wiriko; Arona ki kpi ri oagangara yo. AMose na Erazara ki zorõ ri bagangara yo.

29Ho rimbasa dunduko abi he ni ya Arona kpi, i ki kpari Arona tipa rame 30, nga ngbatunga awiri aYisaraere dunduko.

← Chapter 19 Jump to: Chapter 21 →