Numbers 5

Zande

← Chapter 4 Jump to: Chapter 6 →

1Yekova ki ya fu Mose,

2“Mo rúgu awiri aYisaraere, ya i kusi aboro ngbataka bataya yo dunduko, na agu yo kaza kpanda naaga ti yo, na agu yo biriko be zada kangba aboro;

3akumba na ade, oni ka kusa yo ku gii bataya yo, ya ka i birikosi nga gayo bataya ya, nga gu mi araka rogo ho.”

4Awiri aYisaraere ki mangi he wo, ki kusi yo ku gii bataya yo; wa Yekova agumba ha fu Mose, wo awiri aYisaraere amangi he.

5Yekova ki ya fu Mose,

6“Mo gúmba pai fu awiri aYisaraere, Ho kumba watadu de ka manga ingapai ni nga gu aboro namanga, ka ti ndika nga ga Yekova, ki du na pai ku ri ni,

7si du ni ki kusi gani ingapai nga gu mangi ni; ni anifu motumo na baha wa i ka niringbisi he, ki fu sa dagba bisue ku ri he, ki fu he fu gu ni ni niingi pai kuti ni.

8Ono ka gume boro adu nga ti ni ka i tumo bape fu ni, tipa gu pai re ya, gu marã motumo ni ka nifu fu Yekova, nikaningia ga boromotumo; ku ri bakandoro dada ingapai, nga gu ru du tipa manga pa dada gani ingapai.

9Gu tumbatumba gamahe dunduko du dagba gu kparakpara ahe yo nga ga awiri aYisaraere, nga gu i nafu fu boromotumo, si nikaningia ga boromotumo;

10ga aboro kparakpara ahe anidu tipa kina ko; gu he boro ka nifu fu boromotumo, kina ha nikaningia gako.”

11Yekova ki ya fu Mose,

12“Mo gúmba pai fu awiri aYisaraere, ki ya fu yo, Ka dia kumba aria tiri ku bani, ki ingi pai kuti kumbari,

13boro ki ra na ri wa du pa borose, si ki du ni okooko ho ti kumbari, ki du ni gbugbu he, ri ki du ni birikobiriko ri, ka dezire adu nga kuti ri ya, ka i abi nga ri tigari ri nimangi gu pai re a ya;

14ngbadu kumbari ki kiti toroko yo kuti diako, ko ki kpi pai kuti diani, ri ki du ni birikobiriko ri; watadu ngbaduko ki kiti toroko yo kuti diako, ko ki kpi pai kuti diako, ka ri ata manga nga pai ka birikosi tiri ya;

15si du gu kumba re ki ye na diako koyo du boromotumo ni, ko aniye na gamunihe mbedisatise tipa ri, nga ngungo zendehe du wa mapunga wa aritere biata na bebere he; ko aniuka nga nzeme ku auru he te, na fuõngua ku auru he a te; bambiko si nga gu motumo nga ga riahe du tipa kpipai, motumo nga ga riahe nga ga tingidapai, naye na pa irairapai sa tingida pa ha.

16“Boromotumo ki mbedisi ri, ki moi ri bara bangiri Yekova;

17boromotumo ki tu ziazia ime ku rogo pere, ki di bete gu nvutu du sande vuru banye yo, ki uka ha ku rogo gu ime re.

18Boromotumo ki moi gu de re bara bangiri Yekova, ki zaki mangiriri ngbaa, ki moi motumo nga ga riahe nga ga tingidapai ku beri yo, nga gu motumo riahe du tipa kpipai. Boromotumo ki du na ime nirãnirãpai beko nga gu nafu motiwa.

19Boromotumo ki ya fu ri ri zunga he, ki ya fu ri wẽ, ‘Ka boro ara nga na mo ya, ka mo andu nga ku bani sa birikobiriko pai ya, wa du mo tii ga kumbamo ndika, mo dú zezeredi be gi ime nga ga nirãnirãpai re nafu motiwa.

20Ono ka mo ndu ku bani, wa du mo tii ga kumbamo ndika, ka ngia mo biriko, kura boro ra na mo angia nga kumbamo ya,’

21si du boromotumo ki ya fu de berewe ri zunga he na gu zungahe nga ga motiwa, boromotumo ki ya fu de, ‘Yekova mángi ro ni boro motiwa ni ngbaanga dagba gamo aboro, ni gu rago Yekova ka manga mbosoro si sonzora, vuro ki hi;

22ono gi ime nafu motiwa re nikandu ku rero yo, ka hisa vuro a, mbosoro ki sonzora ku sa yo.’ De ki niya, ‘Amina, Amina.’

23“Ono boromotumo ake agi amotiwa ake re ku rogo kitabu, ki zundu he ku sa yo ku rogo ime nirãnirãpai yo;

24ko ki ya de mbiri gu ime nga ga nirãnirãpai nafu motiwa, gu ime nafu motiwa nikanirimi ku vuri yo ki sa tihe yo ni hĩhĩhe.

25Boromotumo ki di motumo nga ga riahe du tipa kpipai be de, ki wo ti ni bara bangiri Yekova, ki ye na ni ku pati bamotumo;

26boromotumo ki nduku motumo nga ga riahe ni beko sa, ni tingidapai, ki zo ho ku ri bamotumo, fuo gure ko ki ya de moiri gu ime re.

27Ho ko nafu ime ni fu ri ri mbiri he, si ki ta du wa gere, ka ngia ri biriko, ki ingi pai kuti kumbari, gu ime nafu motiwa arima ku vuri yo ki sa tihe ni hĩhĩhe ri ki nihi ahi, mbosori ki sonzora ku sa yo, gu de re ki du ni tiwatiwa ri dagba gari aboro.

28Ono ka gu de re abirikosi nga tiri ya, ki du gigiri, fuo gure ri ki du zezeredi, ki nibatika.

29“Gere nga gu ndika nga ga kpipai, ho de nidu ni be kumbari, ki ndu ku bani, ki birikosi tiri,

30watadu ho toro kpipai niye ni sa kumbari, ko ki du na kpipai kuti diako; si du ko ka nimoi diako ti ni bara bangiri Yekova, boromotumo ki nisari ngbanga ri dunduko kuti gi ndika re.

31Ono kumbari anidu zanga irairapai, ono kina gu de re ki mbu mbusa gari irairapai.”

← Chapter 4 Jump to: Chapter 6 →