2 Samuel 24

Chuvash (CHB) (БИБЛИ) 2009

← Chapter 23 Jump to:

1Ҫӳлхуҫа Израиле каллех ҫилленсе ҫитнӗ, ҫавӑнпа Вӑл Давида халӑх йышне шута илме чарман, Давид ӗнтӗ: кайӑр та Израильпе Иудӑна шутласа тухӑр, тенӗ.

2Патша вара хӑй ҫумӗнчи ҫарпуҫа Иоава каланӑ: Израилӗн [тата Иудӑн] пӗтӗм йӑхӗ патне Данран пуҫласа Вирсавия таран ҫитсе кил, халӑх йышне шутласа тухӑр, эпӗ мӗн чухлӗ ҫын пулнине пӗлем, тенӗ.

3Иоав патшана каланӑ: Ҫӳлхуҫа Турру халӑх йышне хальхи чухлӗ тепре хуштӑр, тата ҫӗр хут ытларах хуштӑр, патша хуҫамӑн куҫӗ ҫакна куртӑр; анчах патша хуҫамӑм мӗншӗн ҫак ӗҫе тӑвасшӑн-ха? тенӗ.

4Анчах патша Иоавпа ҫарпуҫсене каланӑ сӑмах ҫӗнтернӗ. Иоав ҫарпуҫсемпе пӗрле Израиль халӑхне шутлама тухса кайнӑ.

5Вӗсем Иордан урлӑ каҫнӑ та Гад айлӑмӗн варринче, Иазер енче вырӑнаҫнӑ Ароер хулинче, унӑн сылтӑм хутлӑхӗнче, чарӑнса тӑнӑ;

6унтан Галаада тата Тахтим-Ходши ҫӗрне ҫитнӗ; Дан-Яан хулинче пулнӑ, Сидон тавра ҫаврӑннӑ;

7Тир керемӗ патне ҫитнӗ, хивейсемпе ханаансен мӗнпур хулинче пулнӑ, Иудейӑн кӑнтӑр енне Вирсавияна тухнӑ;

8пӗтӗм ҫӗре ҫаврӑнса тухнӑ та тӑхӑр уйӑх та ҫирӗм кунран Иерусалима таврӑннӑ.

9Вара Иоав халӑх йышне шута илнӗ ҫырӑва патшана панӑ; ун тӑрӑх, вӑрҫа юрӑхлӑ, вӑйпитти израильсем сакӑрҫӗр пин ар, иудейсем пилӗкҫӗр пин пулнӑ.

10Халӑх йышне шута илсе тухсассӑн, Давид чӗри картах сикнӗ. Давид ӗнтӗ Ҫӳлхуҫана каланӑ: ҫапла туса йывӑр ҫылӑха кӗтӗм эпӗ; Ҫӳлхуҫамӑм, халӗ Сана йӑлӑнатӑп, Хӑвӑн чурун ҫылӑхне каҫарсам: эпӗ ытла та ӑссӑрла хӑтлантӑм, тенӗ.

11Тепӗр кун ирхине, Давид вӑрансассӑн, Гад пророка — Давид витӗркуранне — Ҫӳлхуҫаран сӑмах пулнӑ:

12пыр, Давида кайса пӗлтер: Турӑ ҫапла калать те: Эпӗ сана виҫӗ тӗрлӗ хаса сӗнетӗп; хӑв валли вӗсенчен пӗрне суйласа ил — сана ҫавӑ ҫитӗ.

13Гад вара Давид патне пынӑ та ӑна ҫапла пӗлтерсе каланӑ: суйласа ил — санӑн ҫӗршывунта ҫичӗ ҫул хушши выҫлӑх пулмалла-и, санӑн хӑвӑн тӑшманусенчен виҫӗ уйӑх тарса ҫӳремелле-и, вӗсем сана йӗрлеччӗр-и е санӑн ҫӗршывунта виҫӗ кун хушши мур чирӗ ҫӳретӗр-и? халӗ шутла та хама Янӑскерне манӑн мӗнле хуравламаллине татса пар, тенӗ.

14Давид ӗнтӗ Гада каланӑ: мана питӗ йывӑр; Турӑ аллинех лекем, мӗншӗн тесессӗн Унӑн ырӑлӑхӗ пысӑк; ҫын аллине ҫеҫ лекес марччӗ, тенӗ. [Давид тулӑ вырнӑ вӑхӑтра мур чирне суйласа илнӗ.]

15Ҫӳлхуҫа вара ҫав ирех израильсем ҫине мур чирӗ янӑ, вӑл палӑртнӑ вӑхӑт вӗҫне ҫитиччен тӑсӑлнӑ, [халӑх хушшинче мур чирӗ пуҫланнӑ,] Данпа Вирсавия хутлӑхӗнче ҫитмӗл пин ҫын вилнӗ.

16Иерусалима пӗтермешкӗн [Турӑ] Ангелӗ ун ҫине аллине тӑснӑ; анчах Ҫӳлхуҫа хулана хӗрхеннӗ те халӑха пӗтерекен Ангела каланӑ: ҫитӗ, халӗ аллуна ус, тенӗ. Турӑ Ангелӗ ҫав вӑхӑтра иевусей ҫынни Орна йӗтемӗ патӗнче пулнӑ.

17Халӑха пӗтерекен Ангела курсассӑн, Давид Ҫӳлхуҫана ҫапла каланӑ: ӗнтӗ эпӗ ҫылӑха кӗтӗм, эпӗ [кӗтӳҫӗ] йӗркесӗр хӑтлантӑм; кусем — сурӑхсем, вӗсем мӗн тунӑ? Санӑн аллу манӑн тата ман аттемӗн килӗ еннелле ҫаврӑнтӑр, тенӗ.

18Гад ҫав кун Давид патне пынӑ та каланӑ: пыр, иевусей ҫынни Орна йӗтемӗ ҫинче Ҫӳлхуҫа валли парне вырӑнӗ ларт, тенӗ.

19Давид, Гад [пророк] сӑмахне итлесе, Ҫӳлхуҫа хушнӑ пек тунӑ.

20Орна пӑхнӑ та хӑй патнелле килекен патшапа ун тарҫисене курах кайнӑ, вӑл хирӗҫ тухнӑ, ӳпне ӳксе, патшана пуҫҫапнӑ.

21Орна каланӑ: патша хуҫамӑм хӑйӗн чури патне мӗн тума килчӗ-ши? тенӗ. Давид каланӑ: йӗтемне сутӑн илме, халӑх вилме чарӑнтӑр тесе унта Ҫӳлхуҫа валли парне вырӑнӗ тумалла, тенӗ.

22Орна Давида каланӑ: патша хуҫамӑма мӗн кирлӗ, ҫавна пурне те илтӗр, парнине те кӳтӗр. Акӑ пӗтӗмӗшпе ҫунтармашкӑн вӑкӑрсем пур, вутӑ турттарса килме урапа та, ут хатӗрӗ те пур.

23Патшамӑм, Орна ҫакна йӑлтах патшана парать, тенӗ. Орна патшана тата та каланӑ: Ҫӳлхуҫа Турру сана ырӑлӑх кӳтӗр! тенӗ.

24Патша Орнана ҫапла каланӑ: ҫук, эпӗ хакне тӳлетӗп, Ҫӳлхуҫа Туррӑма тӳлевсӗр илнӗ парне кӳместӗп, тенӗ. Вара Давид йӗтемпе вӑкӑрсене аллӑ сикль кӗмӗл тӳлесе туяннӑ.

25Ун хыҫҫӑн Давид унта Ҫӳлхуҫа валли парне вырӑнӗ тунӑ та пӗтӗмӗшпе ҫунтарса памалли парнесемпе канӑҫлӑх парнисем кӳнӗ. [Каярахпа Соломон парне вырӑнне аслӑлатнӑ, мӗншӗн тесессӗн вӑл пӗчӗк пулнӑ.] Вара Ҫӳлхуҫа ҫырлахнӑ, израильсем вилме чарӑннӑ.

← Chapter 23 Jump to: