2 Chronicles 1

Ilonggo (Ang Biblia (1982))

Jump to: Chapter 2 →

1Si Salomon nga anak ni David ginpalig-on sa iya ginharian, kag ang Ginoo nga iya Dios nag-upud sa iya kag nagpadaku sa iya sing lakas.

2Si Salomon nagpamolong sa bug-os nga Israel, sa mga pangolo sang linibo kag sang ginatus, sa mga hukom, kag sa tagsa ka principe sa bug-os nga Israel, sa mga pangolo sang mga kabaranggayan.

3Kag si Salomon, kag ang bug-os nga katilingban upud sa iya, nagtaklad sa mataas nga duug nga yadto sa Gabaon; kay didto ang layanglayang nga tiliponan sang Dios, nga ginhimo sa kamingawan ni Moises nga alagad sang Ginoo.

4(Apang ang kaban sang Dios ginpataklad ni David gikan sa Kiryat-jearim sa duug nga gin-aman ni David tungud sini, kay nakapatindug sia sing layanglayang tungud sini sa Jerusalem.)

5Labut pa ang halaran nga saway nga nahimo ni Bezalel nga lalaking anak ni Uri, lalaking anak ni Hur, didto sa atubangan sang kayangkayang sang Ginoo. Kag si Salomon kag ang katilingban nagdangup sa Ginoo.

6Kag si Salomon nagsaka didto sa halaran nga saway sa atubangan sang Ginoo, sa layanglayang nga tiliponan, kag nagdolot sing isa ka libo ka halad-nga-sinonog sa ibabaw sini.

7Sa sadtong gab-i ang Dios nagpahayag kay Salomon, kag nagsiling sa iya, “Pangayo ka kon ano ang ihatag ko sa imo.”

8Kag si Salomon nagsiling sa Dios, “Nagpakita ka sing daku kag malig-on nga paghigugma sa kay David nga akon amay, kag naghimo sa akon nga hari nga tal-us niya.

9Karon, O Ginoong Dios, palig-ona ang imo saad kay David nga akon amay, kay ginhimo mo ako nga hari sa isa ka katawohan nga kaangay sa yab-ok sang duta sa kadamuon.

10Hatagi ako karon sing kaalam kag ihibalo agud nga makagowa ako kag makasulud sa atubangan sining katawohan, kay sin-o bala ang makahukom sining imo katawohan, nga tama kadaku?”

11Ang Dios nagsiling kay Salomon, “Bangud yari ini sa imo tagiposoon, kag wala ka magpangayo sing kamanggaran, pagkabutang, kadungganan, ukon sang kabuhi sang mga nagadumut sa imo, kag wala man magpangayo sing malawig nga kabuhi, kondi nagpangayo sing kaalam kag ihibalo nga sa imo kaugalingon agud nga ikaw makahukom sa akon katawohan nga sa ibabaw nila ginhimo ko ikaw nga hari,

12ang kaalam kag ihibalo ginahatag sa imo. Hatagan ko man ikaw sing kamanggaran, pagkabutang, kag kadungganan, kasubong sang wala pa maagum sang mga hari nga una sa imo, kag walay na makaangay nga bisan sin-o sa olihi nimo.”

13Gani si Salomon nagbalik gikan sa mataas nga duug nga didto sa Gabaon, gikan sa atubangan sang layanglayang nga tiliponan, pakadto sa Jerusalem. Kag naghari sia sa Israel.

14Si Salomon nagtipon sing mga kangga kag mga manugkabayo; sia may isa ka libo kag apat ka gatus ka kangga, kag napulog duha ka libo ka manugkabayo, nga ginbutang niya sa mga banwa sang mga kangga kag upud sa hari sa Jerusalem.

15Kag ginhimo sang hari nga ang pilak kag ang bulawan sa Jerusalem daw mga bato, kag ang mga cedro ginhimo niya nga daw mga kahoy nga sicomoro nga yara sa kapatagan, tungud sa kabugana.

16Kag ang mga kabayo nga iya ni Salomon gindala gikan sa Egipto, ang mga manugpatikang sang hari nagbaton sa ila sa mga pinanong, ang tagsa ka panong sa isa ka bili.

17Nagkuha sila kag nagdala gikan sa Egipto sing isa ka kangga sa anum ka gatus ka siclo nga pilak, kag isa ka kabayo sa isa ka gatus kag kalim-an; subong man paagi sa ila ginpadala ini sa tanan nga hari sang mga Hethanon kag sa mga hari sang Siria.

Jump to: Chapter 2 →