2 Chronicles 8

Ilonggo (Ang Biblia (1982))

← Chapter 7 Jump to: Chapter 9 →

1Sa katapusan sang duha ka pulo ka tuig, nga si Salomon nagpatindug sang balay sang Ginoo kag sang iya kaugalingon nga balay,

2ang kabanwaanan nga ginhatag ni Huram kay Salomon ginpatindug sila ni Salomon, kag ginpapuyo didto ang katawohan sang Israel.

3Kag si Salomon nagkadto sa Hamat-Zoba, kag gindaug ini.

4Ginpatindug niya ang Tadmor sa kamingawan kag ang tanan nga kabanwaanan nga suluptan nga ginpatindug niya sa Hamat.

5Ginpatindug man niya ang Bet-horon nga Naibabaw kag ang Bet-horon nga Naubus, mga banwa nga napamakuran nga may mga kuta, mga gawang, kag mga pintal,

6kag ang Baalat, kag ang tanan nga kabanwaanan nga suluptan nga iya ni Salomon, kag ang tanan nga kabanwaanan nga sa iya mga kangga, kag ang kabanwaanan nga sa iya mga manugkabayo, kag ang tanan nga ginhandum ni Salomon sa pagpatindug nga sa iya kalipayan sa Jerusalem, sa Libano, kag sa bug-os nga duta sang iya ginharian.

7Ang tanan nga katawohan nga nabilin sang mga Hethanon, sang mga Amornon, sang mga Pereznon, sang mga Hevhanon, kag sang mga Jebusnon, nga indi gikan sa Israel,

8gikan sa ila mga anak nga nabilin sa duta, nga wala pagpapasa sang katawohan sang Israel—gikan sa ila si Salomon naghimo sing mga ulipon sa takay tubtub sining adlaw.

9Apang gikan sa katawohan sang Israel si Salomon wala maghimo sing mga alagad nga sa iya buluhaton; kondi sila mga hangaway, kag puno sang iya mga pangolo, mga manugdumala sang iya mga kangga, kag sang iya mga manugkabayo.

10Kag ini sila amo ang puno nga mga manugdumala ni Hari Salomon, duha ka gatus kag kalim-an, nga naggahum sa katawohan.

11Ginpataklad ni Salomon ang babayi nga anak ni Faraon gikan sa banwa ni David pakadto sa balay nga ginpatindug niya nga sa iya, kay nagsiling sia, “Ang akon asawa indi magpuyo sa balay ni David nga hari sa Israel, bangud nga ang mga duug balaan sa diin nag-abut ang kaban sang Ginoo.”

12Niyan si Salomon nagdolot sing mga halad-nga-sinonog sa Ginoo sa ibabaw sang halaran sang Ginoo nga napatindug niya sa atubangan sang portico,

13sono sa katungdanan nga kinahanglan sa tagsa ka adlaw, nga nagadolot sono sa sogo ni Moises sa mga inugpahuway kag sa mga lati, kag sa mga piesta nga pinat-ud nga makatlo sa isa ka tuig —sa piesta sang tinapay nga wala sing tapay, sa piesta sang mga sinimana, kag sa piesta sang mga kayangkayang.

14Gintangdo niya sono sa pagsolondan ni David nga iya amay, ang mga kinabon sang mga sacerdote sa ila pag-alagdan, kag ang mga Levinhon sa ila mga palangakoan sa pagdayaw kag sa pagpanghikot sa atubangan sang mga sacerdote sono sa katungdanan nga kinahanglan sa tagsa ka adlaw, kag ang mga manugbantay sang gawang man sono sa ila mga kinabon sa tagsa ka gawang; kay amo ini ang nasogo ni David nga tawo sang Dios.

15Kag wala sila magbiya sa sogo sang hari sa mga sacerdote kag sa mga Levinhon nahanungud sa bisan ano nga butang ukon nahanungud sa mga bahandi.

16Karon ang tanan nga buluhaton ni Salomon naaman sa adlaw sang pagpasad sang balay sang Ginoo tubtub nga natapus ini. Gani ang balay sang Ginoo nahuman.

17Niyan si Salomon nagkadto sa Ezion-geber kag sa Elot sa baybayon, sa duta sang Edom.

18Kag si Huram nagpadala sa iya sing mga sakayan paagi sa mga kamut sang iya mga alagad kag mga alagad nga sampaton sa dagat, kag nagkadto sila upud sa mga alagad ni Salomon sa Ofir, kag nagkuha didto sing apat ka gatus kag kalim-an ka talanton nga bulawan kag gindala sila kay Hari Salomon.

← Chapter 7 Jump to: Chapter 9 →