2 Chronicles 13

Ilonggo (Ang Biblia (1982))

← Chapter 12 Jump to: Chapter 14 →

1Sa ikanapulog walo nga tuig ni Hari Jeroboam nagsugud si Abias sa paghari sa Juda.

2Naghari sia sing tatlo ka tuig sa Jerusalem. Ang ngalan sang iya iloy amo si Micaya nga babaying anak ni Uriel sang Gabaa. Karon may inaway sa tunga ni Abias kag ni Jeroboam.

3Si Abias naghanda sang inaway nga may hangaway nga mga tawo nga isganan, nga apat ka gatus ka libo ka mga tawo nga pinili; kag si Jeroboam nagpahamtang sing paagisud sa inaway batok sa iya nga may walo ka gatus ka libo ka mga tawo nga pinili nga gamhanan nga mga lalaki nga isganan.

4Niyan si Abias nagtindug sa ibabaw sang Bukid nga Zemaraim nga yara sa kabakoloran sang Efraim, nga nagsiling, “Pamatii ninyo ako, O Jeroboam kag bug-os nga Israel!

5Dili bala kamo dapat magkilala nga ang Ginoong Dios sang Israel naghatag sang ginharian sang Israel sing dayon kay David kag sa iya mga anak paagi sa katipan sang asin?

6Apang si Jeroboam nga anak ni Nabat, ang alagad ni Salomon nga anak ni David, nagbato kag nagribuk batok sa iya ginoo;

7kag nagdampig sa iya ang mga tawo nga kulangkulang kag huroshuros nga nagpangalig-on batok kay Rehoboam nga anak ni Salomon, sang si Rehoboam bataon kag linghud pa sing tagiposoon kag indi makasumpung sa ila.

8“Kag karon nagahunahuna kamo sa pagsumpung sa ginharian sang Ginoo sa kamut sang mga anak ni David, kay kamo isa ka daku nga kadam-an kag yara upud sa inyo ang bulawan nga mga tinday nga baka nga ginhimo nga mga dios sa inyo ni Jeroboam.

9Wala bala kamo nagsobol sang mga sacerdote sang Ginoo, ang mga anak ni Aaron, kag ang mga Levinhon, kag naghimo nga sa inyo sing mga sacerdote subong sa mga katawohan sa iban nga mga duta? Ang bisan sin-o nga nagakari sa paghalad sang iya kaugalingon nga may tinday nga baka kag pito ka carnero nga lalaki ang amo makasacerdote sa indi mga dios.

10Apang nahanungud sa amon, ang Ginoo amo ang amon Dios, kag wala kami magbiya sa iya. Kami may mga sacerdote nga nagaalagad sa Ginoo nga mga anak ni Aaron, kag mga Levinhon sa ila mga buluhaton.

11Sila nagasonog sa Ginoo sa tagsa ka kaagahon kag sa tagsa ka kahaponon sing mga halad-nga-sinonog kag maamyon nga incienso, ang tinapay nga pahayag man ginpahamtang nila sing nagakaigo sa putli nga latok, kag ang candelero nga bulawan pati ang iya mga suga sa pagpadabdab sa tagsa ka kahaponon; kay ginabantayan namon ang tinulin sang Ginoo nga amon Dios, apang kamo nagbiya sa iya.

12Yari karon, ang Dios upud sa amon sa una namon, kag ang iya mga sacerdote nga may mga budyong sang paandam sa pagpatonog sing paandam batok sa inyo. O mga anak sang Israel, dili kamo mag-away batok sa Ginoo, ang Dios sang inyo mga ginikanan; kay indi kamo mag-uswag.”

13Ginpaput-an sila ni Jeroboam sa likod nila; sa bagay nga yara sila sa atubangan sang Juda, kag ang puut yadto sa likod nila.

14Kag sang nagbalikid ang Juda, yari karon, ang inaway yara sa atubangan kag sa likod nila; kag nagtuaw sila sa Ginoo, kag ang mga sacerdote nagpatonog sang mga budyong.

15Niyan ang mga tawo sang Juda nagsinggit. Kag sang pagsinggit sang mga tawo sang Juda, ang Dios nagsakit kay Jeroboam kag sang bug-os nga Israel sa atubangan ni Abias kag sang Juda.

16Ang mga anak sang Israel nagpalagyo gikan sa atubangan sang Juda, kag gintugyan sila sang Dios sa ila kamut.

17Si Abias kag ang iya katawohan nagpatay sa ila sa daku nga kamatay; gani may napukan sa Israel nga lima ka gatus ka libo ka tawong pinili.

18Sa amo ang mga anak sang Israel nalutus sa sadtong tion, kag ang mga anak sang Juda nagdaug, bangud nga nagsalig sila sa Ginoo, ang Dios sang ila mga ginikanan.

19Kag ginlagas ni Abias si Jeroboam, kag gin-agaw sa iya ang mga banwa, ang Bet-el pati ang iya mga minoro, kag ang Jesana pati ang iya mga minoro, kag ang Efron pati ang iya mga minoro.

20Wala na maumpawi sa kusug si Jeroboam sa mga adlaw ni Abias; kag ginsakit sia sang Ginoo, kag napatay sia.

21Apang si Abias naggamhanan. Kag nagpangasawa sia sing napulog apat, kag nangin-amay sa duha ka pulo kag duha ka anak nga lalaki kag napulo kag anum ka anak nga mga babayi.

22Ang nabilin sang mga binuhatan ni Abias, ang iya mga dalanon kag ang iya mga polong, nasulat sa kasaysayan ni Iddo nga manalagna.

← Chapter 12 Jump to: Chapter 14 →