2 Chronicles 12

Ilonggo (Ang Biblia (1982))

← Chapter 11 Jump to: Chapter 13 →

1Sang napalig-on na ang ginharian ni Rehoboam kag nagbahud sia, ginbayaan niya ang kasogoan sang Ginoo, kag ang bug-os nga Israel upud sa iya.

2Sa ikalimang tuig ni Hari Rehoboam, si Sisac nga hari sang Egipto nagtaklad batok sa Jerusalem, bangud nga naglapas sila batok sa Ginoo,

3nga may napulog duha ka gatus ka mga kangga kag may kan-uman ka libo ka manugkabayo. Kag indi maisip ang katawohan nga nag-abut upud sa iya gikan sa Egipto—ang mga Lubim, ang mga Suquim, kag mga Etiopiahanon.

4Kag gin-agaw niya ang mga banwa nga napamakuran nga naigo sa Juda kag nagkadto sa Jerusalem.

5Niyan si Semaya nga manalagna nagkadto kay Rehoboam kag sa mga principe sang Juda, nga nagtipon sing tingub sa Jerusalem bangud kay Sisac, kag nagsiling sa ila, “Amo ini ang ginasiling sang Ginoo, ‘Kamo nagbiya sa akon, busa ako man nagbiya sa inyo sa kamut ni Sisac,’”

6Niyan ang mga principe sang Israel kag ang hari nagpaubus sang ila kaugalingon kag nagsiling sila, “Matarung ang Ginoo.”

7Sang nakita sang Ginoo nga nagpaubus sila sang ila kaugalingon, ang polong sang Ginoo nag-abut kay Semaya: “Nagpaubus sila sang ila kaugalingon; indi ko sila paglaglagon, kondi hatagan ko sila sing malip-ot nga kahilwayan, kag ang akon kasingkal indi pag-iula sa Jerusalem paagi sa kamut ni Sisac.

8Walay sapayan sila mangin-iya alagad, agud nga makakilala sila sang akon pag-alagdan kag sang pag-alagdan sang mga ginharian sang mga duta.”

9Gani si Sisac nga hari sang Egipto nagtaklad batok sa Jerusalem; nagkuha sia sang mga bahandi sang balay sang Ginoo kag sang mga bahandi sang balay sang hari; ginkuha niya ang tanan. Ginkuha man niya ang mga taming nga bulawan nga ginhimo ni Salomon;

10kag si Hari Rehoboam naghimo sa tal-us nila sing mga taming nga saway, kag gintugyan sila sa mga kamut sang mga pangolo sang mga manugbantay nga nagbantay sang ganhaan sang balay sang hari.

11Kag sa masunsun nga ang hari magsulud sa balay sang Ginoo, ang manugbantay nag-abut kag nagdala sa ila, kag gin-uli sila sa hulut sang manugbantay.

12Kag sang nagpaubus sia ang kasingkal sang Ginoo nagpalayo sa iya, agud nga indi sia malaglag sing bug-os; labut pa may maayo pa, nga mga butang sa Juda.

13Gani si Hari Rehoboam nagpangalig-on sang iya kaugalingon sa Jerusalem kag naghari. Si Rehoboam kap-atan kag isa ka tuig sang nagsugud sia sa paghari, kag naghari sia sing napulog pito ka tuig sa Jerusalem, ang banwa nga napili sang Ginoo gikan sa tanan nga kabikahan sang Israel sa pagbutang didto sang iya ngalan. Ang ngalan sang iya iloy si Naama nga Amonhon.

14Kag ginhimo niya ang malaut, bangud nga wala sia magtuhoy sang iya tagiposoon sa pagpangita sa Ginoo.

15Karon ang mga binuhatan ni Rehoboam, ang nahauna kag ang katapusan, wala bala sila masulat sa maragtas ni Semaya nga manalagna kag ni Iddo nga manugpanan-aw, sono sa paagi sang lista sang mga kaliwatan? May dalayon nga mga inaway sa tunga ni Rehoboam kag ni Jeroboam.

16Kag si Rehoboam nagtolog upud sa iya mga ginikanan, kag ginlubung sa banwa ni David; kag naghari nga tal-us niya si Abias nga iya anak nga lalaki.

← Chapter 11 Jump to: Chapter 13 →