2 Chronicles 3

Ilonggo (Ang Biblia (1982))

← Chapter 2 Jump to: Chapter 4 →

1Niyan ginsugdan ni Salomon sa pagpatindug sang balay sang Ginoo sa Jerusalem sa Bukid nga Moria, diin nagpahayag ang Ginoo kay David nga iya amay, nga gin-aman niya sa duug nga ginpat-ud ni David, sa linasan ni Ornan nga Jebusnon.

2Nagsugud sia sa pagpatindug sa ikaduhang adlaw sa ikaduhang bulan sa ikap-at nga tuig sang iya paghari.

3Amo ini ang mga sadsaran nga ginbutang ni Salomon nga palatindugan sang balay sang Dios: ang kalabaon, sa mga maniko sono sa unang takus, kan-uman ka maniko, kag ang kasangkaron duha ka pulo ka maniko.

4Ang portico sa atubangan sang balay may kalabaon sono sa kasangkaron sang balay duha ka pulo ka maniko, kag ang kataason isa ka gatus kag duha ka pulo. Gintaklapan niya ini sa sulud sang bulawan nga bus-og.

5Ang kadak-an sang balay ginkisamihan niya sing kahoy nga abeto, nga gintaklapan niya sing ulay nga bulawan, nga sa ibabaw sini ginhimoan niya sing mga palma kag mga talikala.

6Ginpunihan niya ang balay sing bilidhon nga mga bato nga sa katahuman. Ang bulawan bulawan gikan sa Parvaim.

7Gani gintaklapan man niya sing bulawan ang balay—ang mga balayan, ang mga atangan, ang mga dingding, kag ang mga ganhaan sini; kag gingutiban niya sing mga querubin sa mga dingding.

8Kag ginhimo niya ang labing balaan nga balay; ang iya kalabaon, sono sa kasangkaron sang balay, duha ka pulo ka maniko, kag ang iya kasangkaron duha ka pulo ka maniko; gintaklapan niya ini sing ulay nga bulawan sa kadamuon nga anum ka gatus ka talanton.

9Ang timbang sang mga lansang kalim-an ka siclo nga bulawan. Kag gintaklapan niya sing bulawan ang mga hulut nga naibabaw.

10Sa sulud sang balay nga labing balaan naghimo sia sing duha ka querubin nga larawan kag gintaklapan sila sing bulawan.

11Ang mga pakpak sang mga querubin duha ka pulo ka maniko ang kalabaon: ang pakpak sang isa ka querubin lima ka maniko, nga nagalambut sa dingding sang balay, kag ang isa ka pakpak lima ka maniko, nga nagalambut sa pakpak sang isa ka querubin;

12kag ang pakpak sang isa pa ka querubin lima ka maniko, nga nagalambut sa dingding sang balay, kag ang isa pa ka pakpak lima ka maniko, nga nagaduut sa pakpak sang isa ka querubin.

13Ang mga pakpak sining mga querubin nagahumlad sing duha ka pulo ka maniko; nagatindug sila sa ila mga tiil, nga ang ila mga nawung nagaatubang, nayon sa balay.

14Kag naghimo sia sang kumbung nga asul kag purpura kag carmesi kag lino nga manipis, kag ginpugtakan sa ibabaw sini sing mga querubin.

15Sa atubangan sang balay naghimo man sia sing duha ka haligi nga katloan kag lima ka maniko ang kataason, nga ang oloolo nga yara sa ukbung sang tagsa sa ila lima ka maniko.

16Naghimo sia sing mga talikala sa oraculo kag ginbutang sila sa ukbung sang mga haligi; kag naghimo sia sing isa ka gatus ka mga granada, kag ginbutang sila sa mga talikala.

17Ginpatindug niya ang mga haligi sa atubangan sang templo, ang isa sa too, ang isa sa wala; ang sa too ginhingalanan niya Jaquin, kag ang sa wala Boaz.

← Chapter 2 Jump to: Chapter 4 →