2 Chronicles 19

Ilonggo (Ang Biblia (1982))

← Chapter 18 Jump to: Chapter 20 →

1Si Josafat nga hari sang Juda nagpauli sa iya balay sa paghidait sa Jerusalem.

2Apang si Jehu nga anak nga lalaki ni Hanani nga manugpanan-aw naggowa sa pagsugata sa iya, kag nagsiling kay Hari Josafat, “Buligan mo bala ang malauton kag higugmaon ang mga nagadumot sa Ginoo? Bangud sini nga butang, ang kasingkal yara sa imo gikan sa atubangan sang Ginoo.

3Wala sing sapayan may maayo nga mga butang nga nakita sa imo, sa bagay nga ginsikway mo sa duta ang mga Ashera, kag gintuhoy ang imo tagiposoon sa pagpangita sa Dios.”

4Si Josafat nagpuyo sa Jerusalem; kag naggowa sia liwat sa tunga sang katawohan, kutub sa Beer-seba tubtub sa kabakoloran sang Efraim, kag ginpabalik sila sa Ginoo, ang Dios sang ila mga ginikanan.

5Nagbutang sia sing mga hukom sa duta sa tanan gid nga kabanwaanan nga napamakuran sa Juda, sa banwabanwa,

6kag nagsiling sa mga hukom, “Talupangda ang inyo ginahimo, kay wala kamo nagahukom tungud sa tawo kondi tungud sa Ginoo; nagaupud sia sa inyo sa paghukom.

7Busa karon, manginsa inyo ang kahadluk sa Ginoo; mag-andam kag maghimo sini, kay wala sing kalautan sa Ginoo nga aton Dios, ukon pagpasulabi sang mga tawo, ukon pagbaton sang mga hamham.”

8Labut pa sa Jerusalem si Josafat nagbutang gikan sa mga Levinhon kag sa mga sacerdote kag sa mga pangolo sang mga kabaranggayan sang Israel, sa paghukom nga sa Ginoo kag nga sa mga kasaba. Nagbalik sila sa Jerusalem.

9Kag gintulinan niya sila: “Amo ini ang himoon ninyo sa kahadluk sa Ginoo, sa katutum, kag may himpit nga tagiposoon:

10kon mag-abut sa inyo ang bisan ano nga kasaba gikan sa inyo mga utud nga nagapuyo sa ila mga banwa, sa tunga sang dugo kag dugo, sa tunga sang kasogoan kag sogo, mga palatukuran kag mga pagsolondan, paandaman ninyo sila, agud nga indi sila magmalinapason sa Ginoo kag sa amo ang kasingkal nagaabut sa inyo kag sa inyo mga utud. Himoa ini, kag indi kamo magmalinapason.

11Kag yari karon, si Amarias nga puno nga sacerdote nagagahum sa inyo sa tanan nga bagay sang Ginoo; kag si Zebadias nga anak ni Ismael, ang manugdumala sang balay sang Juda, sa tanan nga bagay sang hari; ang mga Levinhon man mga punoan sa atubangan ninyo. Magpakabakud kag maghimo, kag ang Ginoo mag-upud sa mga maayo!”

← Chapter 18 Jump to: Chapter 20 →