2 Chronicles 28

Ilonggo (Ang Biblia (1982))

← Chapter 27 Jump to: Chapter 29 →

1Si Acaz duha ka pulo ka tuig sang nagsugud sia sa paghari, kag naghari sia sing napulog anum ka tuig sa Jerusalem. Kag wala sia maghimo sang matarung sa mga mata sang Ginoo, kaangay kay David nga iya amay,

2kondi naglakat sia sa mga dalanon sang mga hari sang Israel. Naghimo man sing mga larawan nga tinunaw sa mga Baal;

3kag nagsonog sia sing incienso sa nalupyakan sang lalaking anak ni Hinom, kag nagsonog sang iya mga lalaking anak sa kalayo, sono sa mga kangil-aran sang mga pungsud nga ginsobol sang Ginoo gikan sa atubangan sang katawohan sang Israel.

4Kag naghalad sia kag nagsonog sing incienso sa mataas nga mga duug, kag sa mga kabakoloran, kag sa idalum sang tagsa ka kahoy nga madabung.

5Busa gintugyan sia sang Ginoo nga iya Dios sa kamut sang hari sang Siria, nga nagsakit sa iya kag nagbihag sa iya sang isa ka dakung kadam-an nga gindala sa Damasco. Sia gintugyan man sa kamut sang hari sang Israel, nga naglaglag sa iya sa dakung kamatay.

6Kay si Peca nga lalaking anak ni Remalias nagpatay sa Juda sing isa ka gatus kag duha ka pulo ka libo sa isa ka adlaw, tanan sila tawo nga isganan, bangud nga ginbayaan nila ang Ginoo, ang Dios sang ila mga ginikanan.

7Kag si Zicri, gamhanan nga tawo sang Efraim, nagpatay kay Maasias nga lalaking anak sang hari kag kay Azricam nga pangolo sang balay kag kay Elcana nga ikaduha sa kagamhanan sa hari.

8Gindala nga mga bihag sang mga tawo sang Israel gikan sa ila mga himata ang duha ka gatus ka libo, mga babayi, mga anak nga lalaki, kag mga anak nga babayi; nagdala man sing labi kadamu nga inagaw gikan sa ila kag gindala ang inagaw sa Samaria.

9Apang didto ang manalagna sang Ginoo, nga ginahingalanan si Oded; kag naggowa sia sa pagsugata sang kasoldadosan nga nag-abut sa Samaria, kag nagsiling sa ila, “Yari karon, bangud nga ang Ginoo, ang Dios sang inyo mga ginikanan, nagsingkal sa Juda, gintugyan niya sila sa inyo kamut, apang inyo ginpatay sila sa kaakig nga naglambut sa langit.

10Kag karon ginatuyo ninyo nga uliponon ang mga babayi kag mga lalaki nga katawohan sang Juda kag Jerusalem. Wala bala bisan sa inyo sing mga paglapas nga inyo kaugalingon sa Ginoo nga inyo Dios?

11Karon pamatii ako, kag pabalika ang mga bihag nga inyo ginbihag gikan sa inyo mga himata, kay ang masingkal nga kaakig sang Ginoo yara sa inyo.”

12Ang iban sang mga pangolo sang mga tawo sang Efraim, si Azarias nga lalaking anak ni Johanan, si Berequias nga lalaking anak ni Mesillemot, si Esequias nga lalaking anak ni Sallum kag si Amasa nga lalaking anak ni Hadlai, nagtindug batok sa ila nga nag-abut gikan sa inaway,

13kag nagsiling sa ila, “Dili ninyo pagdalhon diri ang mga bihag, kay ginatuyo ninyo ang pagdala sa amon sing paglapas batok sa Ginoo, sa pagdugang sa amon mga sala kag sa amon paglapas. Kay daku ang amon paglapas, kag may masingkal nga kaakig batok sa Israel.”

14Gani ginbayaan sang lupit nga mga tawo ang mga bihag kag ang inagaw sa atubangan sang mga principe kag sang bug-os nga katilingban.

15Kag ang mga tawo nga nasambit sa ngalan nagtindug kag nagkuha sang mga bihag, kag ginpasaputan ang tanan nga hubo sa ila sang inagaw; ginpasaputan nila sila, ginpasapinan sila, ginpakaon kag ginpainum sila, kag ginhaplas sila; kag ang tanan nga maluya sa ila ginlulan sa mga asno, gindala sila sa Jerico, ang banwa sang mga palma, sa ila mga himata. Niyan nagpauli sila sa Samaria.

16Sa sadtong tion nagpadala si Hari Acaz sa mga hari sang Asiria sa pagbulig sa iya.

17Kay liwat ang mga Edomnon nag-abut kag naggubat sang Juda, kag nagpamihag.

18Ang mga Filistinhon man naggubat sang mga banwa sang kapatagan kag sang Bagatnan sang Juda, kag nag-agaw sang Bet-semes, Ayalon, Gederot, Soco pati ang ila mga minoro, Timna pati ang iya mga minoro, kag sang Gimzo pati ang iya mga minoro; kag nagpuyo sila didto.

19Kay ginpapaubus sang Ginoo ang Juda bangud kay Acaz nga hari sang Israel, kay nagpatuyang sia sa Juda kag naglapas sing tama batok sa Ginoo.

20Gani si Tiglat-pilneser nga hari sang Asiria nagkadto sa iya, kag nagsakit sa iya apang wala magpabakud sa iya.

21Kay si Acaz nagkuha sing bahin gikan sa balay sang Ginoo kag gikan sa balay sang hari kag sang mga principe, kag ginhatag ini sa hari sang Asiria; apang wala ini magbulig sa iya.

22Sa tion sang iya kasakit naglapas sia sing labi pa batok sa Ginoo —ini gid nga Hari Acaz.

23Kay naghalad sia sa mga dios sang Damasco nga nagsamad sa iya, kag nagsiling sia, “Bangud nga ang mga dios sang mga hari sang Siria nagbulig sa ila, busa magahalad ako sa ila agud nga buligan nila ako.” Apang sila kalaglagan niya, kag sang bug-os nga Israel.

24Kag gintipon sing tingub ni Acaz ang mga gamit sang balay sang Dios kag ginpamihakpihak ang mga gamit sang balay sang Dios, kag gintakpan ang mga ganhaan sang balay sang Ginoo; kag naghimo sia nga sa iya sing mga halaran sa tagsa ka pamusud sang Jerusalem.

25Sa tagsa ka banwa sang Juda naghimo sia sing mataas nga mga duug sa pagsonog sing incienso sa iban nga mga dios, nga nagapaakig sa Ginoo, ang Dios sang iya mga ginikanan.

26Karon ang nabilin sang iya mga binuhatan kag ang tanan niyang dalanon, nahauna kag katapusan, yari karon, nasulat sila sa Tolon-an sang mga Hari sang Juda kag Israel.

27Kag si Acaz nagtolog upud sa iya mga ginikanan, kag ginlubung nila sia sa banwa, sa Jerusalem, kay wala nila sia pagdalha sa mga lulubngan sang mga hari sang Israel. Kag naghari nga tal-us niya si Ezequias nga iya lalaking anak.

← Chapter 27 Jump to: Chapter 29 →