2 Chronicles 7

Ilonggo (Ang Biblia (1982))

← Chapter 6 Jump to: Chapter 8 →

1Sang nakatapus si Salomon sa pagpangamuyo, ang kalayo nagpanaug gikan sa langit kag nag-upus sang halad-nga-sinonog kag sang mga halad, kag ang himaya sang Ginoo nagpuno sang balay.

2Kag ang mga sacerdote indi makasulud sa balay sang Ginoo, bangud nga ang himaya sang Ginoo nagpuno sang balay sang Ginoo.

3Sang nagtolok ang bug-os nga mga anak sang Israel sang nagpanaug ang kalayo kag ang himaya sang Ginoo yara sa balay, nagyaub sila nga naghapa sa duta sa nabatohan, kag nagsimba kag nagpasalamat sa Ginoo, nga nagasiling, “Kay maayo sia, kay ang iya malig-on nga paghigugma nagapadayon sa gihapon.”

4Niyan ang hari kag ang bug-os nga katawohan nagdolot sing halad sa atubangan sang Ginoo.

5Si Hari Salomon nagdolot sing halad nga duha ka pulo kag duha ka libo ka baka nga lalaki kag isa ka gatus kag duha ka pulo ka carnero. Gani ang hari kag ang bug-os nga katawohan naghalad sang balay sang Dios.

6Ang mga sacerdote nagtindug sono sa ila mga palangakoan; ang mga Levinhon man, nga may mga tulunggon nga sa Ginoo nga nahimo ni Hari David sa pagpasalamat sa Ginoo —kay ang iya malig-on nga paghigugma nagapadayon sa gihapon—sang si David nagdayaw paagi sa ila pagpanghikot; ang mga sacerdote nagpatonog sing budyong sa atubangan nila; kag ang bug-os nga Israel nagtindug.

7Labut pa ginpakabalaan ni Salomon ang natunga sang luwang nga yara sa atubangan sang balay sang Ginoo; kay didto nagdolot sia sang mga halad-nga-sinonog kag sang sapay sang mga halad-sa-paghidait, bangud nga ang halaran nga saway nga nahimo ni Salomon indi makaigo sa pagbaton sang halad-nga-sinonog kag sang halad-nga-kalan-on kag sang sapay.

8Si Salomon naghiwat sing piesta sa sadto nga tion sing pito ka adlaw, kag ang bug-os nga Israel upud sa iya, tama kadaku gid nga katilingban, kutub sa salamputan sang Hamat tubtub sa Sapa sang Egipto.

9Kag sa ikawalo nga adlaw naghiwat sila sing maligdong nga pagtilipon; kay ginhiwat nila ang paghalad sang halaran sing pito ka adlaw kag ang piesta sing pito ka adlaw.

10Sa ikaduha ka pulo kag tatlo nga adlaw sang bulan nga ikapito ginpapauli niya ang katawohan sa ila mga layanglayang, nga masadyahon kag malipayon sa tagiposoon tungud sang pagkaayo nga napakita sang Ginoo kay David kag kay Salomon kag sa iya katawohan nga Israel.

11Sa amo natapus ni Salomon ang balay sang Ginoo kag ang balay sang hari; ang tanan nga nag-abut sa tagiposoon ni Salomon nga himoon sa balay sang Ginoo kag sa iya kaugalingon nga balay ginhimo niya sing mauswagon.

12Niyan ang Ginoo nagpahayag kay Salomon sa kagab-ihon kag nagsiling sa iya: “Ginpamatian ko ang imo pangamuyo, kag ginpili nga sa akon ini nga duug nga balay sa halad.

13Kon takpan ko ang mga langit sa bagay nga wala sing ulan, ukon sogoon ko ang apan sa paghalunhon sang duta, ukon magpadala ako sing kamatay sa akon katawohan,

14kon ang akon katawohan nga ginatawag sa akon ngalan magpaubus sang ila kaugalingon, kag magpangamuyo kag magpangita sang akon nawung, kag magtalikod gikan sa ila malaut nga mga dalanon, niyan magapamati ako kutub sa langit, kag magapatawad sang ila sala kag magaayo sang ila duta.

15Karon ang akon mga mata magamuklat kag ang akon mga idulungug magalingig sa pangamuyo nga ginahimo sa sini nga duug.

16Kay karon ginpili ko kag ginpakabalaan ini nga balay agud nga ang akon ngalan mangindira sa gihapon; kag ang akon mga mata kag ang akon tagiposoon mangindira sing dalayon.

17Kag nahanungud sa imo, kon maglakat ka sa atubangan ko subong sang paglakat ni David nga imo amay, nga maghimo sono sa tanan nga ginsogo ko sa imo kag magbantay sang akon mga palatukuran kag sang akon mga pagsolondan,

18niyan palig-onon ko ang trono sang imo ginharian, sono sang ginpakigkatipan ko kay David nga imo amay, nga nagasiling, ‘Dili ka mawad-an sing lalaki nga manuggahum sa Israel.’

19Apang kon kamo magtalikod kag magbiya sang akon nga palatukuran kag sang akon mga sogo nga ginbutang ko sa atubangan ninyo, kag maglakat kag mag-alagad sa iban nga mga dios kag magsimba sa ila,

20niyan gabuton ko sila sa gamut gikan sa akon duta nga nahatag ko sa ila; kag ini nga balay, nga ginpakabalaan ko tungud sa akon ngalan, sikwayon ko gikan sa itololok nakon, kag himoon ko ini nga hulubaton kag ululigyaton sa tanan nga mga katawohan.

21Kag ini nga balay, nga tama kataas, ang tagsatagsa nga magalabay sa sini matingala, kag magasiling, ‘Ngaa bala nga ginhimo sang Ginoo ang subong sa sini nga duta kag sa sini nga balay?’

22Niyan sila magasabat, ‘Bangud nga ginbayaan nila ang Ginoo nga Dios sang ila mga ginikanan nga nagpagowa sa ila gikan sa duta sang Egipto, kag nagdangup sa iban nga mga dios, kag nagsimba sa ila kag nag-alagad sa ila; busa gindala niya sa ila ini tanan nga malaut.’”

← Chapter 6 Jump to: Chapter 8 →