2 Chronicles 26

Ilonggo (Ang Biblia (1982))

← Chapter 25 Jump to: Chapter 27 →

1Kag ang bug-os nga katawohan sang Juda nagkuha kay Uzias, nga napulog anum ka tuig, kag ginhimo sia nga hari sa tal-us ni Amasias nga iya amay.

2Ginpatindug niya ang Elot kag gin-uli ini sa Juda, sa tapus nga ang hari nagtolog upud sa iya mga ginikanan.

3Si Uzias napulog anum ka tuig sang nagsugud sia sa paghari, kag naghari sia sing kalim-an kag duha ka tuig sa Jerusalem. Ang ngalan sang iya iloy si Jecolia sang Jerusalem.

4Kag ginhimo niya ang matarung sa mga mata sang Ginoo, sono sa tanan nga nahimo ni Amasias nga iya amay.

5Nagtuhoy sia sang iya kaugalingon sa pagpangita sa Dios sa mga adlaw ni Zacarias, nga may pagkamahantupon sa palanan-awon sang Dios; kag samtang nga ginpangita niya ang Ginoo, ginpauswag sia sang Dios.

6Naggowa sia kag nag-away batok sa mga Filistinhon, kag ginguba ang kuta sang Gat kag ang kuta sang Jabnia kag ang kuta sang Asdod; kag nagpatindug sia sing mga banwa sa Asdod kag sa mga Filistinhon.

7Gintabangan sia sang Dios batok sa mga Filistinhon, kag batok sa mga Arabiahanon nga nagpuyo sa Gurbaal, kag sa mga Meunim.

8Naghatag ang mga Amonhon sing buhis kay Uzias, kag nabantugan ang iya ngalan tubtub sa salamputan sang Egipto, kay nagbakud sia sing lakas.

9Labut pa nagpatindug si Uzias sing mga torre sa Jerusalem sa Gawang sa Pamusud kag sa Gawang sa Nalupyakan kag sa Likoan sang kuta, kag ginpamakuran sila.

10Kag nagpatindug sia sing mga torre sa kamingawan, kag nagkutkut sing madamung tanki, kay may madamu sia nga kahayupan, sa manubo nga duta man kag sa kapatagan, kag sia may mga mangunguma kag mga manugtatap sang uvas sa kabukiran kag sa mabungahon nga mga ulumhan, kay maluyagon sia sang panguma.

11Labut pa si Uzias may hangaway sang mangangaway nga mga tawo, nga naggowa sa pag-away sa mga ginuban, sono sa kadamuon sang pag-isip sa ila nga ginhimo ni Jeiel nga escriba kag ni Maasias nga manugdumala, sa idalum sang kamut ni Hananias, isa sang mga pangolo sang hari.

12Ang bug-os nga kadamuon sang mga pangolo sang mga kabaranggayan sang gamhanan nga mga tawo nga isganan duha ka libo kag anum ka gatus.

13Sa idalum sang kamut nila may hangaway nga tatlo ka gatus kag pito ka libo kag lima ka gatus, nga nagapakig-away nga may gamhanan nga kusug, sa pagtabang sa hari batok sa kaaway.

14Kag naghanda si Uzias sa bug-os nga kasoldadosan sing mga taming, mga bangkaw, mga pandung, mga limbutong, mga pana, kag mga bato nga inuglabyog.

15Naghimo sia sa Jerusalem sing mga makina, nga ginpatok sang sampaton nga mga tawo, nga ipahamtang sa ibabaw sang mga torre kag sa ibabaw sang mga balwarte, nga ipana sing mga baslay kag dalagku nga mga bato. Kag ang iya kabantugan naglapnag sa malayo, kay ginbuligan sia sing makatingala, tubtub nga nagbakud sia.

16Apang sang nagbakud sia nagmatinaastaason ang iya tagiposoon, nga naghimo sia sing kaduluntan. Kay naglapas sia sa Ginoo nga iya Dios, kag nagsulud sia sa templo sang Ginoo sa pagsonog sing incienso sa halaran sang incienso.

17Apang ginsonod sia ni Azarias nga sacerdote, upud sa iya ang kawaloan ka sacerdote sang Ginoo nga mga tawo nga isganan;

18kag ginbatoan nila si Hari Uzias, kag nagsiling sa iya, “Indi naigo sa imo, Uzias, ang pagsonog sing incienso sa Ginoo, kondi sa mga sacerdote nga mga lalaking anak ni Aaron, nga ginpakabalaan sa pagsonog sing incienso. Gowa ka sa santuario; kay nakalapas ka, kag ini indi manginsa imo kadungganan gikan sa Ginoong Dios.”

19Niyan nagsingkal si Uzias. Karon may incensario sia sa iya kamut sa pagsonog sing incienso, kag sang nagsingkal sia sa mga sacerdote ang aro naglutaw sa iya agtang, sa atubangan sang mga sacerdote sa balay sang Ginoo, sa luyo sang halaran sang incienso.

20Kag gintolok sia ni Azarias nga puno nga sacerdote, kag sang tanan nga sacerdote, kag yari karon, may aro sia sa iya agtang! Kag gintulud nila sia sing dalidali pagowa gikan didto, kag sia gid nagdalidali man sa paggowa, bangud nga ginsakit sia sang Ginoo.

21Kag si Hari Uzias aroon tubtub sa adlaw sang iya kamatayon, kag nagpuyo sa balay nga pinain kay sia aroon, kag ginpabulag sia sa balay sang Ginoo. Kag si Joatam nga iya lalaking anak naggahum sa balay sang hari, nga nagahukom sa katawohan sang duta.

22Karon ang nabilin sang mga binuhatan ni Uzias, nahauna kag katapusan, ginsulat ni Isaias nga manalagna nga lalaking anak ni Amoz.

23Gani si Uzias nagtolog upud sa iya mga ginikanan, kag ginlubung nila sia upud sa iya mga ginikanan sa latagon nga lulubngan nga iya sang mga hari, kag nagsiling sila, “Aroon sia.” Kag naghari sa tal-us niya si Joatam nga iya anak.

← Chapter 25 Jump to: Chapter 27 →