2 Chronicles 14

Ilonggo (Ang Biblia (1982))

← Chapter 13 Jump to: Chapter 15 →

1Gani si Abias nagtolog upud sa iya mga ginikanan, kag ginlubung nila sia sa banwa ni David; kag naghari nga tal-us niya si Asa nga iya lalaking anak. Sa iya mga adlaw ang duta malinong sing napulo ka tuig.

2Kag ginhimo ni Asa ang maayo kag matarung sa mga mata sang Ginoo nga iya Dios.

3Ginkuha niya ang mga halaran nga dumuloong kag ang mataas nga mga duug, kag ginwagwag ang mga obelisco kag ginpulud ang mga Asherim,

4kag ginsogo ang Juda sa pagpangita sa Ginoo, ang Dios sang ila mga ginikanan, kag sa pagtuman sang kasogoan kag sang sogo.

5Ginkuha man niya gikan sa tanan nga banwa sang Juda ang mataas nga mga duug kag ang mga larawan sang adlaw. Kag ang ginharian malinong sa atubangan niya.

6Nagpatindug sia sing mga kabanwaanan nga napamakuran sa Juda, kay malinong ang duta. Walay inaway sia sa sadtong mga tuig, bangud nga ginhatagan sia sang Ginoo sing kapahuwayan.

7Kag nagsiling sia sa Juda, “Patindugon naton ining mga banwa, kag palibutan sila sing mga kuta kag mga torre, mga gawang kag mga pintal; ang duta yara pa sa atubangan naton, bangud nga ginpangita naton ang Ginoo nga aton Dios; ginpangita naton sia, kag sia naghatag sa aton sing pahuway sa palibut.” Gani nagpatindug sila kag nag-uswag.

8Kag si Asa may hangaway gikan sa Juda, nga tatlo ka gatus ka libo, nga nagdala sing mga kalasag kag mga bangkaw kag gikan sa Benjamin duha ka gatus kag kawaloan ka libo nga nagdala sing mga taming kag nagbingat sing mga pana; ini tanan gamhanan nga lalaki nga isganan.

9Naggowa batok sa ila ni Zera nga Etiopiahanon nga may hangaway nga isa ka milyon kag tatlo ka gatus ka kangga, kag nag-abut sia sa Maresa.

10Niyan si Asa naggowa sa pagsugata sa iya, kag nagpahamtang sila sing paagisud sa inaway sa nalupyakan sang Sefata sa Maresa.

11Kag nagtuaw si Asa sa Ginoo nga iya Dios, “O Ginoo, wala na sing bisan sin-o luwas sa imo nga makatabang, sa tunga sang gamhanan kag sa walay kusug. Buligi kami, O Ginoo nga Dios namon, kay sa imo nagasalig kami, kag sa imo ngalan nagakari kami batok sining kadam-an. O Ginoo, ikaw ang amon Dios; dili pagpalandasa ang tawo batok sa imo.”

12Gani ginsakit sang Ginoo ang mga Etiopiahanon sa atubangan ni Asa kag sa atubangan sang Juda, kag nagpalagyo ang mga Etiopiahanon.

13Si Asa kag ang katawohan nga upud sa iya naglagas sa ila tubtub sa Gerar, kag napukan sa mga Etiopiahanon ang tama kadamu sa bagay nga wala sila makautwas; kay nalaglag sila sa atubangan sang Ginoo kag sa atubangan sang iya kasoldadosan. Nakakuha sila sing labi gid kadamu nga inagaw.

14Kag gingubat nila ang tanan nga banwa sa palibut sang Gerar, kay ang kahadluk sang Ginoo nag-abut sa ila. Gin-ati nila ang tanan nga banwa, kay may madamu gid nga alatihon sa ila.

15Gin-ati man nila ang mga layanglayang sang kahayupan, kag gindala nila ang bugana nga carnero kag mga camelyo. Niyan nagbalik sila sa Jerusalem.

← Chapter 13 Jump to: Chapter 15 →