2 Chronicles 35

Ilonggo (Ang Biblia (1982))

← Chapter 34 Jump to: Chapter 36 →

1Si Josias naghiwat sing pascua sa Ginoo sa Jerusalem; kag gin-ihaw nila ang pascua sa ikanapulo kag apat nga adlaw sang nahauna nga bulan.

2Ginpahamtang niya ang mga sacerdote sa ila mga palangakoan kag ginpalig-on sila sa pag-alagadan sang balay sang Ginoo.

3Kag nagsiling sia sa mga Levinhon nga nagpanudlo sa bug-os nga Israel kag mga balaan sa Ginoo, “Ibutang ninyo ang kaban nga balaan sa balay nga ginpatindug ni Salomon nga anak ni David, nga hari sang Israel; manginwala na sing lulan sa inyo mga abaga. Karon alagda ang Ginoo nga inyo Dios kag ang iya katawohan nga Israel.

4Pangaman kamo sono sa inyo mga kabaranggayan sono sa inyo kinabon, sono sa sinulat ni David nga hari sang Israel kag sono sa sinulat ni Salomon nga iya anak.

5Kag tindug kamo sa balaan nga duug sono sa mga binahin sang mga kabaranggayan sang inyo mga utud nga mga anak sang katawohan, kag sa tagsatagsa may bahin gikan sa kabaranggayan sang mga Levinhon.

6Kag ihawon ang pascua, kag pakabalaana ang inyo kaugalingon, kag mag-aman tungud sa inyo mga utud, sa paghimo sono sa polong sang Ginoo paagi kay Moises.

7Niyan si Josias naghatag sa mga anak sang katawohan nga nagatambong sing mga cordero kag mga tinday nga kanding gikan sa panong, sila tanan tungud sa mga halad-sa-pascua, sa kadamuon nga katloan ka libo, kag tatlo ka libo ka baka; ini sila gikan sa pagkabutang sang hari.

8Kag ang iya mga principe naghatag nga sa halad-sa-kinabubut-on sa katawohan, sa mga sacerdote, kag sa mga Levinhon. Si Helcias, si Zacarias, kag si Jehiel, ang mga manugdumala sang balay sang Dios, naghatag sa mga sacerdote nga sa mga halad-sa-pascua sing duha ka libo kag anum ka gatus nga tinday sang kahayupan, kag tatlo ka gatus ka baka nga lalaki.

9Si Conanias man, kag si Semaya kag si Natanael nga iya mga utud, kag si Hasabias kag si Jehiel kag si Jozabad, ang mga puno sang mga Levinhon, naghatag sa mga Levinhon nga sa mga halad-sa-pascua sing lima ka libo ka tinday sang kahayupan kag lima ka gatus ka baka nga lalaki.

10Gani ang pag-alagdan gin-aman, kag ang mga sacerdote nagtindug sa ila duug, kag ang mga Levinhon sono sa ila mga kinabon sono sa sogo sang hari.

11Kag gin-ihaw nila ang pascua, kag ginwisik sang mga sacerdote ang dugo nga ginbaton nila gikan sa ila kamut kag ginpanitan sila sang mga Levinhon.

12Kag ginkuha nila ang mga halad-nga-sinonog agud nga mahatag nila sila sono sa mga binahin sang mga kabaranggayan sang mga anak sang katawohan, sa paghalad sa Ginoo, sono sa nasulat sa tolon-an ni Moises. Kag amo ini ang ginhimo nila sa mga baka nga lalaki.

13Kag gin-asal nila sa kalayo ang pascua sono sa pagsolondan; kag ang balaan nga mga halad ginlaga nila sila sa mga kaldero, sa mga dalwasi, kag sa mga sartin, kag gindala sila sing dalidali sa tanan nga anak sang katawohan.

14Kag ugaling naghiwat nga sa ila kaugalingon kag sa mga sacerdote, bangud nga ang mga sacerdote nga mga anak ni Aaron masaku tubtub sa gab-i sa pagdolot sang mga halad-nga-sinonog kag sang sapay; busa ang mga Levinhon naghiwat nga sa ila kaugalingon kag sa mga sacerdote nga mga anak ni Aaron.

15Ang mga manug-amba, nga lalaking mga anak ni Asaf, yara sa ila duug sono sa sogo ni David, kag ni Asaf, kag ni Heman, kag ni Jedutun nga manugpanan-aw sang hari; kag ang mga manugbantay yara sa tagsa ka gawang; wala na sila kinahanglan magbiya sa ila pag-alagdan, kay ang ila mga utud nga mga Levinhon nag-aman tungud sa ila.

16Gani ang bug-os nga pag-alagdan sang Ginoo naaman sa amo nga adlaw, sa paghiwat sang pascua kag sa pagdolot sang mga halad-nga-sinonog sa halaran sang Ginoo, sono sa sogo ni Hari Josias.

17Kag ang katawohan sang Israel nga nagtambong naghiwat sang pascua sa sadto nga tion, kag sang piesta sang tinapay nga wala sing tapay sing pito ka adlaw.

18Wala sing pascua kaangay sadto nga nahiwat sa Israel kutub sang mga adlaw ni Samuel nga manalagna; wala sing bisan sin-o sang mga hari ang Israel nga naghiwat sing subong nga pascua sang ginhiwat ni Josias, kag sang mga sacerdote kag sang mga Levinhon, kag sang bug-os nga Juda kag Israel nga nagtambong, kag sang mga pumuluyo sang Jerusalem.

19Ini nga pascua ginhiwat sa ikanapulo kag walo nga tuig sang paghari ni Josias.

20Sa tapus sini tanan, sang nakaaman si Josias sang templo, si Necao nga hari sang Egipto nagtaklad sa pagpakig-away batok sa Carquemis sa ubay sang Eufrates kag si Josias naggowa batok sa iya.

21Apang nagpadala sia sing mga embajador sa iya, nga nagasiling, “Ano bala ang akon labut sa imo, ikaw nga hari sang Juda? Ako wala magkari batok sa imo sini nga adlaw, kondi batok sa panimalay nga may pagpakig-away ako; kag ang Dios nagsogo sa akon sa pagdalidali. Paiway ka sa paghilabot sa Dios, nga yari upud sa akon, agud nga indi ka niya paglaglagon.”

22Wala sing sapayan si Josias indi magtalikud gikan sa iya, kondi wala magpakilala sang iya kaugalingon sa pagpakig-away sa iya. Wala magpamati sang mga polong ni Necao gikan sa baba sang Dios, apang nagkadto sa pagpakig-away sa nalupyakan sang Meguido.

23Kag ang mga manugpana nagpana kay Hari Josias; kag nagsiling ang hari sa iya mga alagad, “Ipahilayo ako, kay napilasan ako sing tama.”

24Gani ang iya mga alagad nagkuha sa iya sa kangga kag ginbutang sia sa ikaduha nga kangga kag gindala sia sa Jerusalem. Kag napatay sia, kag ginlubung sa mga lulubngan sang iya mga ginikanan. Ang bug-os nga Juda kag Jerusalem naglalaw tungud kay Josias.

25Si Jeremias nagpanalabiton tungud kay Josias; kag ang tanan nga manug-amba nga mga lalaki kag ang mga manug-amba nga mga babayi nagpamolong nahanungud kay Josias sa ila mga panalabiton tubtub sini nga adlaw. Ginhimo nila ini nga pagsolondan sa Israel; yari karon, nasulat sila sa mga Panalabiton.

26Karon ang nabilin sang mga binuhatan ni Josias, kag ang iya mga buhat nga maayo sono sa nasulat sa kasogoan sang Ginoo,

27kag ang iya mga binuhatan, nahauna kag katapusan, yari karon, nasulat sila sa Tolon-an sang mga Hari sang Israel kag Juda.

← Chapter 34 Jump to: Chapter 36 →