2 Chronicles 16

Ilonggo (Ang Biblia (1982))

← Chapter 15 Jump to: Chapter 17 →

1Sa ikakatloan kag anum nga tuig sang paghari ni Asa, si Baasa nga hari sang Israel nagtaklad batok sa Juda, kag nagpatindug sang Rama, agud nga indi niya mapagowa ang bisan sin-o ukon mapasulud kay Asa nga hari sang Juda.

2Niyan si Asa nagkuha sing pilak kag bulawan gikan sa mga bahandi sang balay sang Ginoo kag sang balay sang hari, kag ginpadala sila kay Ben-hadad nga hari sang Siria, nga nagpuyo sa Damasco, nga nagasiling,

3“May kasugtanan sa tunga nakon kag nimo, subong nga may yara sa tunga sang akon amay kag sang imo amay; yari karon, ako nagapadala sa imo sing pilak kag bulawan; lakat, bugtoa ang imo kasugtanan kay Baasa nga hari sang Israel, agud nga magbiya sia sa akon.”

4Kag si Ben-hadad nagpamati kay Hari Asa, kag ginpadala ang mga pangolo sang iya mga hangaway batok sa mga banwa sang Israel, kag gingubat nila ang Ijon, ang Dan, ang Abelmaim, kag ang tanan nga banwa nga suluptan sang Neftali.

5Kag sang pagkabati sini ni Baasa, nag-untat sia sa pagpatindug sang Rama, kag ginpadolog ang iya buluhaton.

6Niyan gin-agaw ni Hari Asa ang bug-os nga Juda, kag ginhakot nila ang mga bato sang Rama kag ang iya mga tablon, nga ginpatindug ni Baasa, kag sa sini ginpatindug niya ang Geba kag Mizpa.

7Sa sadto nga tion nag-abut si Hanani nga manugpanan-aw kay Asa nga hari sang Juda, kag nagsiling sa iya, “Bangud nga nagsalig ka sa hari sang Siria, kag wala magsalig sa Ginoo nga imo Dios, busa ang kasoldadosan sang hari sang Siria nagpalagyo gikan sa imo kamut.

8Dili bala ang mga Etiopiahanon kag ang mga Lubim madamu nga kasoldadosan nga may mga kangga kag mga manugkabayo nga lakas kadamu? Apang bangud nga nagsalig ka sa Ginoo, sia nagtugyan sa ila sa imo kamut.

9Kay ang mga mata sang Ginoo nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya. Sa sini nakahimo ka sing binuang; kay kutub karon may mga inaway ka.”

10Niyan si Asa naakig sa manugpanan-aw, kag ginsulud sia sa balay nga bilanggoan, kay naalipungut sia sa iya bangud sining butang. Kag ginpigus ni Asa ang iban sang katawohan sa amo nga tion.

11Ang mga binuhatan ni Asa, nahauna kag katapusan, nasulat sila sa Tolon-an sang mga Hari sang Juda kag Israel.

12Sa ikakatloan kag siam nga tuig sang iya paghari nagbalatian si Asa sa iya mga tiil, ang iya balatian matama sing lakas; apang sa iya balatian wala sia magdangup sa Ginoo, kondi sa mga manugbolong.

13Kag nagtolog si Asa upud sa iya mga ginikanan, nga napatay sa ikakap-atan kag isa nga tuig sang iya paghari.

14Ginlubung nila sia sa iya kaugalingon nga mga lulubngan nga ginpakutkut niya nga sa iya kaugalingon sa banwa ni David. Ginpahamtang nila sia sa higdaan nga ginpuno sing mga pahumut nga maamyon kag sarisari nga bagay sang mga pahumut nga gin-aman sa padugi sang mga manugpahumut; kag naghimo sila tungud sa iya sing tama gid kadaku nga sonog.

← Chapter 15 Jump to: Chapter 17 →