2 Chronicles 2

Ilonggo (Ang Biblia (1982))

← Chapter 1 Jump to: Chapter 3 →

1Karon si Salomon nagtuyo sa pagpatindug sing balay nga sa ngalan sang Ginoo, kag isa ka balay nga sa iya ginharian.

2Kag si Salomon nag-isip sing kapitoan ka libo ka tawo nga manugdala sang mga lulan kag kawaloan ka libo ka tawo nga mga manugpulud sa kabukiran, kag tatlo ka libo kag anum ka gatus nga magatatap sa ila.

3Kag si Salomon nagpasogo kay Huram nga hari sang Tiro: “Sono sa imo paghisayo sa kay David nga akon amay kag nagpadala sa iya sing mga cedro sa pagpatindug sa iya sing balay nga puluy-an, sa amo maghisayo ka man sa akon.

4Yari karon, buut na ako mapatindug sing balay nga sa ngalan sang Ginoo nga akon Dios sa paghalad sini sa iya sa pagsonog sa atubangan niya sing maamyon nga mga pahumut, kag sang dalayon nga tinapay nga pahayag, kag sang mga halad-nga-sinonog sa kaagahon kag sa kahaponon, sa mga inugpahuway kag sa mga lati kag sa pinat-ud nga mga piesta sang Ginoo nga amon Dios, subong nga pagsolondan sa gihapon sa Israel.

5Ang balay nga ginapatindug ko daku, kay ang amon Dios labaw sa tanan nga dios.

6Apang sin-o bala ang makasarang sa pagpatindug sa iya sing balay, sa ginatan-aw nga ang langit, bisan ang langit sang mga langit, indi makaigo sa iya? Sin-o bala ako niyan nga magpatindug sa iya sing balay, luwas lamang sa pagsonog sing incienso sa atubangan niya?

7Busa karon padalhi ako sing tawo nga sampaton sa pagpangabudlay sa bulawan, sa pilak, sa saway, kag sa salsalon, kag sa purpura, sa carmesi, kag sa asul, nga mahibalo maggutib sang tanan nga bagay nga mga paggutib, nga mag-upud sa mga sampaton nga mga tawo nga yari sa akon sa Juda kag sa Jerusalem, nga gintigana ni David nga akon amay.

8Padalhi man ako sing mga kahoy nga abeto, sing mga kahoy nga cedro, kag mga kahoy nga sandalo gikan sa Libano, kay nahibaloan ko nga ang imo mga alagad makahibalo magpulud sing tablon sa Libano. Kag ang akon mga alagad magaupud sa imo mga alagad,

9sa pag-aman sa akon sing tablon nga bugana, kay ang balay nga buut ko patindugon mangindaku kag makatilingala.

10Magahatag ako sa imo mga alagad, ang mga manugpulud nga magapulud sing tablon, sing duha ka pulo ka libo ka coro nga trigo nga binayo, duha ka pulo ka libo ka coro nga cebada, duha ka pulo ka libo ka bat nga alak, kag duha ka pulo ka libo ka bat nga lana.”

11Niyan si Huram nga hari sang Tiro nagsabat sa sulat nga ginpadala niya kay Salomon, “Bangud nga ginhigugma sang Ginoo ang iya katawohan ginhimo ka niya nga hari sa ibabaw nila.”

12Si Huram nagsiling man, “Pagpakamaayohon ang Ginoong Dios sang Israel, nga naghimo sang langit kag duta, nga naghatag kay Hari David sing anak nga maalam, nahiyasan sing kaalam kag paghangup, nga magpatindug sing balay sa Ginoo, kag sing balay nga sa iya ginharian.

13“Karon nagapadala ako sing tawong sampaton, nga mahinangponon, nga iya ni Huram nga amay ko,

14anak sang babayi nga gikan sa babaying mga anak ni Dan, kag ang iya amay taga-Tiro. Sia sampaton magpangabudlay sa bulawan, sa pilak, sa saway, sa salsalon, sa bato, kag sa tablon, kag sa purpura, sa asul, kag sa lino nga manipis kag sa carmesi, kag sa paggutib man sa bisan anong bagay sang paggutib kag pagpadugi sang bisan anong padugi nga tangdoan sia sing duug, upud sa imo mga tawong sampaton, upud sa mga tawong sampaton sang akon ginoo, si David nga imo amay.

15Busa karon magpadala ang akon ginoo sa iya mga alagad sang trigo kag sang cebada, sang lana kag sang alak, nga napamolong sang akon ginoo;

16kag kami magapamulud sing kahoy sa Libano sono sa kinahanglan mo, kag dalhon namon ini sa imo sa mga linantay paagi sa dagat tubtub sa Jope, kag ikaw magdala sini pataklad sa Jerusalem.”

17Niyan gin-isip ni Salomon ang tanan nga manlulugayaw nga yara sa duta sang Israel, sono sa isip nga ginhimo sa ila ni David nga iya amay; kag nasapwan nga isa ka gatus kag kalim-an kag tatlo ka libo kag anum ka gatus.

18Ginbutang niya sa ila ang kapitoan ka libo nga manugdala sang mga lulan, kawaloan ka libo nga manugpamulud sa kabukiran, kag tatlo ka libo kag anum ka gatus nga mga manugtatap sa pagpapangabudlay sang katawohan.

← Chapter 1 Jump to: Chapter 3 →