2 Chronicles 10

Ilonggo (Ang Biblia (1982))

← Chapter 9 Jump to: Chapter 11 →

1Si Rehoboam nagkadto sa Siquem, kay ang bug-os nga Israel nag-abut sa Siquem sa paghimo sa iya nga hari.

2Kag sang pagkabati sini ni Jeroboam nga anak ni Nabat (kay didto pa sia sa Egipto, diin nagpalagyo sia gikan sa atubangan ni Hari Salomon), niyan si Jeroboam nagbalik gikan sa Egipto.

3Kag nagpadala sila kag ginpatawag sia; kag si Jeroboam kag ang bug-os nga Israel nag-abut kag nagpamolong sila kay Rehoboam,

4“Ang imo amay nagpabug-at sang amon gota. Busa karon pamag-ana ang mapiot nga pag-alagdan sang imo amay kag ang mabug-at nga gota nga ginbutang niya sa amon, kag magaalagad kami sa imo.”

5Nagsiling sia sa ila, “Balik kamo sa akon sa tapus ang tatlo ka adlaw.” Gani ang katawohan nagtaliwan.

6Niyan si Hari Rehoboam nagpakigsapul sa tigulang nga mga lalaki, nga nagtindug sa atubangan ni Salomon nga iya amay sang buhi pa sia, nga nagasiling, “Ano bala ang ilaygay ninyo sa akon nga isabat sa sining katawohan?”

7Kag nagpamolong sila sa iya, “Kon ikaw magmalolo sa sining katawohan kag magpahamuut sa ila, kag magpamolong sing maayong mga polong sa ila, niyan sila mangin-imo mga alagad sa gihapon.”

8Apang ginbayaan niya ang laygay nga ginhatag sa iya sang mga tigulang, kag nagpakigsapul sa pamatan-on nga mga lalaki nga nagtubo upud sa iya nga natindug sa atubangan niya.

9Kag nagsiling sia sa ila, “Ano bala ang ilaygay ninyo nga isabat naton sa sining katawohan nga nagpamolong sa akon, ‘Pamag-ana ang gota nga ginbutang sang imo amay sa amon’?”

10Kag ang pamatan-on nga mga lalaki nga nagtubo upud sa iya nagpamolong sa iya, “Amo ini ang isiling mo sa katawohan nga nagpamolong sa imo. ‘Ang imo amay nagpabug-at sang amon gota, apang ikaw magpamag-an sini sa amon’; amo ini ang isiling mo sa ila, ‘Ang akon kamalingking daku pa sa mga balikawang sang akon amay.

11Kag karon, bisan ang akon amay naglulan sa inyo sing mabug-at nga gota, ako magadugang sa inyo gota. Ang akon amay nagsilot sa inyo sa mga putik, apang ako magasilot sa inyo sa mga iwiiwi.’”

12Gani sa ikatlong adlaw nag-abut si Jeroboam kag ang bug-os nga katawohan kay Rehoboam, sono sa ginsogo sang hari, “Balik kamo sa akon sa ikatlong adlaw.”

13Kag ang hari nagsabat sing matigdas sa ila, kag si Hari Rehoboam nagbiya sang laygay sang mga tigulang,

14nga nagpamolong sa ila sono sa laygay sang mga pamatan-on, nga nagasiling, “Ang akon amay nagpabug-at sang inyo gota, apang ako magadugang sa sini; ang akon amay nagsilot sa inyo sa mga putik, apang ako magasilot sa inyo sa mga iwiiwi.”

15Gani ang hari wala magpamati sa katawohan; kay nagikan ini sa Dios agud nga mapalig-on sang Ginoo ang iya polong, nga ginpamolong niya paagi kay Ahias nga Silonhon kay Jeroboam nga anak ni Nabat.

16Kag sang nakita sang bug-os nga Israel nga ang hari wala magpamati sa ila, ang katawohan nagsabat sa hari, “Ano bala ang bahin namon kay David? wala kami sing panublion sa anak ni Jesse. Ang tagsa ka tawo magkadto sa iya layanglayang, O Israel! Karon tatapa ang imo kaugalingon nga balay, David.” Gani ang bug-os nga Israel nagpauli sa ila mga layanglayang.

17Apang sa katawohan sang Israel nga nagpuyo sa mga banwa sang Juda, si Rehoboam naghari sa ila.

18Niyan ginpadala ni Hari Rehoboam si Adoram, nga nagdumala sa mga tawo sa takay, kag ginbato sia nga napatay sang katawohan sang Israel. Kag si Hari Rehoboam nagdalidali sa pagsakay sa iya kangga, sa pagpalagyo pakadto sa Jerusalem.

19Gani nagribuk ang Israel batok sa panimalay ni David tubtub sining adlaw.

← Chapter 9 Jump to: Chapter 11 →